Kaikuang nge Chemtatrawta?

Mizote’n thawnthu kan neih lar tak Chemtatrawta thawnthu kan chhiar a, kan ngaihthlak a, kan nuihpui nasat em em ṭhin hi a châng chuan eng eng emaw thil thleng leh thil tawn aṭangin kan hmehbel ṭhin a, kan duhna lai aṭangin tehna pawh kan siam ṭhin a nih hi. A thawnthu hrim hrim hi nuihzat tura phuah a nih ngei a rinawm rual hian, a phêna thu awmze nei zir chhuah tur hi a tam hle.

Kei pawhin tun ṭum ka thuziakah hian he thawnthu hmang hian eng eng emaw ka’n puah chhuahpui teh ang.

Chawlhkar hnih liam ta vel khan zanah ka naute nen kein kan tei chhuak a; zing ‘walk’ ai a ni mai tiin zan boruak thianghlim hîp ang kan ti bawk a. Kan in, Mission Veng aṭanga chhuakin hmar lam hawiin kan kal a ni. City Park kan thlen chuan mihring kalna tura siam kawng chu kan zawh a, khuar lian angreng fe fe a lo awm thluah mai (hei hi nizan lawkah pawh khan a la awm a, a awmna a rei tawh hmel ka ti viau bawk)! Ka naute chu kawng en tur leh fimkhur turin ka hrilh phei mawlh mawlh a. Khuar pathum kan pelh hnu chuan chhak lam, Governor Bangla lama Lianchhiari Lunglen Tlang lem chu ka kawhhmuh a, chumi rual chiah chuan khuar palinaah chuan ka tla ta a nih chu! Ka khûp ka sawh a, ka bâl hle bawk. Tluk hian nuih a za a, a zahthlak deuh bawk nen, “A na lo,” tih leh rang taka thawh kha kan tih hmasak ber a nih fo angina, kei pawh ka tho rang hle tih chu ka chiang khawp mai. Kar khat vel ka bâi a, zan khat inkhawm ka ṭhulh phah bawk.

Nimin mai khan ka fapa MZU kal tur chu Ebenezer Hospital thlen hma deuhah scooty-in a tlu a, a hmaa tlan pawh an tlan chak loh avangin amah pawh hi a tlan chak lo viau. PWD kawng siam, a chungláng tihfai loh leiṭhîl vanga tlu a ni.

Keini tawn aia rapthlak, kawng chhia avanga two wheeler-a chesual, na tak taka hliam leh thihna hial tawngte pawh an awm tih kan la theihnghilh loh ka ring.

Thu dang, tun hnaia sawrkarin sawhthing a lei chungchangah, sawhthing ṭha tâwk lo eng emaw zat a awm avanga a dang pawh lei tura insiamrempui tawhte’n an rilru an thlak titih thu kan chhiarin kan ngaithla a nih hi.

Thil duhawm lo a thlena phun vak vaka phun lungawia theihnghilh zui mai ṭhin Mizote hian ‘kaikuang’ zawn aia ‘Chemtatrawta’ nui chunga mawhpuh mai hi a hahthlak lovin a awlsam zawk kan tih avang te, a kaikuang zawng tura kan taihmâk tâwk loh avangte leh, keimahni mimal leh chhungkua a taka a nghawng loh avangte a ni thei em tih hi inngaihtuah a va hun tawh em.

Kawng khuara tlua khûp sawh kei kha kawng ka en uluk loh vang te, chhak lama Lianchhiari Lunglen Tlang lem ka en avangtea tlu ka nihna kha nuihpuiin, ka tlûkna thlentu, mipui kalna tura duana khuar dahtu, hun rei tak ngaihsak zui ta lo hi kan chhût thleng peih lo mai thei.

Kawng ṭhat loh avanga two wheeler-a chesualte hi anmahni thiam lohna lai chauh thlirin, mi dang tam tak tlu ve lote changchawiin kawng enkawlnaa mawhphurtute kan fihlimtir hlauh ṭhin em?

Kaikuang khan Chemtatrawta kha chep lo se la, khatiang chhiatna tam tak thleng zui zut mai kha a thleng kher lo vang. Eng ang pawhin Chemtatrawta kha lo ṭhu duhdah pawh ni se la, kaikuang khan cheh ena a en loh tlat chuan a hêl ang a, a hnu lama thil thleng duhawm lote kha a thleng lo mai tur hi a ni.

Miin min chhui tak tak chuang lo vang, hei hi ka tih a ni tih tu mahin an hre chuang lo vang, tiin tuartu awm thei pawh ngaihtuah lovin kan hmaa thil dik lo tih zeuh tur awm hi hêl lovin kan chep chat chat a ni thei ang em?

City Park bula kea kalnaa khuar hi chhîn nei tura hisâp sa a ni ngeiin ka ring a. Tun thlenga chhin a nih tâk lohna chhan hi a thawktu tana hlâwkna a awm vang nge, tu mahin an hre zui tak tak lo vang tih rilru avang zawk ni ang, khatianga a awm reng mai le?

Kawngpui siama zawh felfai loha zo anga kalsan, lirtheia kal tan mai pawh ni lo, kea kal tan thleng pawha hlauhawm awm ṭhin hi tu mawhphurh nge?

Kan sawhthing ip chhunga hmuh theih loha a ṭha tâwk lo dahtu hian eng rilru nge a put ang? Tu ma’n min hre chhuak dawn chuang lo tiin hlâwkna a ngaihtuah a ni mai em? Thil tidik lotu dem ngam lo khawpa mipui ngainat beiseia Chemtatrawta zawk pho lang tlat a, a cheptu kaikuang zawng lo lui politician-te hian mipui rilru an siamṭha ang nge an tichhe zual zawk ang?

Mizote hian Chem-tatrawta thawnthu aṭang ngei hian a tâwpkhâwkah chuan thil fel tâwk lo a lo thlenin a kaikuang hi zawng chhuak turin taihmak zir ang u. A ṭul leh kaikuang chu tuiah kan thlâk ang a, a dáng bím bém ang a; a nih loh leh meiah kan rawh ang a, a sen vít vêt anga a ni mai dawn lo’m ni?

- Dikteii Hnamte