Chapchàr Kût banner siam ṭhat a ngai e

Chapchàr Kût a hnai ta hle mai, naktip nakthai mai khi a ni ta. Mipuiin hlim taka kût an hman theihna turin kût huaihawttu lama mawhphurhna hrang hrang neite chu an buai map map viauin a rinawm. Chutih laiin, mit timîmtu a awm tlat mai!

Chapchar Kût banner–Lammual chhunga official gallery-a târ (main banner) bakah, kawngpui aṭanga Lammual luhna kawngka (gate) chunga tàrahte hian thupui 'Zonun ze mawi–Hawihhawmna' tia ziah a ni a; 'Zonun' tih ziah zawm tak hi a ni ka mit timîmtu chu.

'Zo' leh 'nun' tih hi ziah zawm loh tur a ni a, 'Zo nun ze mawi' tia ziah tur a ni. 'Zo nun ze mawi' tiin sawrkar lehkha ṭhenkhatah pawh an ziak nghe nghein ka hria.

'Zo' tih hi 'Mizo' tihna tluk a ni a, mi tu tute emaw chuan 'Mizo' tih aiah 'Zo' tih an hmang ṭhin. 'Zo nun ze mawi' tih chu 'Mizo nun ze mawi' tihna tluk a ni. 'Zo' leh 'nun' ziah zawm a, 'Zonun' tia ziah a nih hian dik hmêl fúin kan hria a ni mai thei; mahse, 'Zo' aiah hian 'Mizo' tih han hmang chiah ila, a dik lohzia chu a chiang mai. 'Mizonun ze mawi'–a dik thei lo.

'Zo' hi hnam (hming) sawina a ni a, 'Zo nun' kan tih chuan 'Zo (hnam) nun' kan sawina a ni. 'Zo' aiah hian hnam dang hming–'Bengali' emaw, 'Spanish' emaw han dah ta ila. 'Bengalinun ze mawi', 'Spanishnun ze mawi', a dik lohzia a chiang kêk kâwk viau! 'Bengali nun ze mawi', 'Spanish nun ze mawi' tiin a dik thlap. Zo, Bengali, Spanish, etc. hi hnam hming vek a ni a, 'Zo' a nih tâk avanga 'nun' nen ziah zawm bik chhan tur a awm lo. Tin, Mizo ṭawngah 'Zonun' tih hi a hranpain thumal pakhat angin a awm lo hrim hrim bawk a; mimal hmingah erawh chuan a tam mai.

Kan sawi tum chu kan man ang chu maw? Chuvangin, kumin Chapchar Kût puala Lammual luhna gate chunga 'Zonun ze mawi–Hawihhawmna' tih tàr hi ṭawng ziah dan dik loa ziah a nih avangin thlâk hrâm ni se a ṭha hle ang. Banner print hun atan darkar hnih/khat bak a ngai lo ang; a la tlai lo, hun a la awm e.

Kum hmasa lamah phei chuan 'ze mawi' tih pawh hi zawmin, 'zemawi' tiin an ziak ṭhin a, kuminah chuan 'ze mawi' tiin dik takin an ziak ta; a lawmawm. 'Ze' hi 'zia' (mizia) modified form a ni a, noun a ni; 'mawi' hi noun (ze/zia) sawifiahtu adjective a ni thung. Noun leh adjective hi ziah zawm tur a ni lo.

Mizo ṭawngah hian sawrkar leh sawrkar hotu te, officer-te hi an fimkhur a va ṭul em. Sawrkar lehkha chhuak, Mizo ṭawnga ziah rêng rêngah punctuation dik lo a tam lutuk ṭhinte hi a zia lo; heti lutuk tur hi chu a ni lo.

Sawrkar hian ṭawng dik a ngai pawimawh tur a ni a, ṭawng dik a humhalh tur a ni a, mipuiin ṭawng dik an hriat theih nan ṭan a la tur a ni. Sawrkar berin a ngaih pawimawh loh chuan, tihngaihna a awm lo; Mizote'n kan ṭawng dik kan hre lo tulh tulh dawn tihna a ni mai.

Engpawhnise, Chapchâr Kût banner hi siam ṭhata thlâk ni hram teh se.

- Kezo