Ui nena dawr nghah

Ui hlau chi leh ui haw em emtu ka ni a, ka ten hle bawk. Chuvangin, uicho chungchang pawh hi ka ziak hnem tawh hle. Bible-ah pawh hian ui hming lanna chu hmuhsitawm tak zelin a ni. Mahse, heti taka ui hlautu ka ni chung hian, thil mak ve tak pakhat chu, hmâna sumdawnna lama kan hotupa ber chu, amah a fair loh lutuk avanga dawihzep lutukin inven nan ui hlauhawm pui pui 2/3 hi a kawl reng ṭhin a. Chung ui ho chuan ka hmel an hmuh rual hian khum hnuai velah hian an biru chûk chûk tlat ṭhin lawi si a; mak ve tak a ni.

Kolasib-a kan awm laiin Kolasib Sub-Division administrator Civil SDO Pu Lalhuthanga (L), MCS khan ui khuahkhirhna thupek a chhuah a, amah ngeiin silai nen khawlai a fang theuh theuh ṭhin. Ama driver ui ngei pawh a kap hlum hmiah. Kolasib khaw chhung kawng zauhna tur order a siam a, amah ngeiin chempui leh thirtiang nen khawlai a fang ṭhin a; tuna Kolasib khaw chhung kawng zau nuam tak lo ni ta ṭhenkhat khu a hmalakna a ni. Khatiang mi chak, mahni order a taka bawhzui ṭhin mi huaisen khan min liamsan hma lutuka a pawi ka ti hle a. Tunah te la dam ni se, Mizoram hian eng emaw tal chuan kan chhawr ṭangkai ngawt ang. Ex-minister Pu R. Lalzirliana u, Pu R. Lalruata (L), MCS, kei phei chuan mi zawng zawng chunga mi ṭha ka tih mai pawh khan kan SDO (Civil) a nih laiin, khawlaia ran chhuak vai turin min tir a, driver nen, 1V grade pakhat leh police 2 ka hruai a. Ka ṭhiante khan ar tla lai an man thei khawp mai a, tlailam hmeithai ina len meuh chuan sehhmeh a tui duh khawp mai.

Ui nena dawr nghak ṭhintute bakah, customer care lo lutuk leh sumdawn leh eizawnna leh dawrkai zei lo lutuk ho leh, tih tak takna tel lo ho hrim hrim hian ka pawi sawi hran lo mah se, tun ṭum chu kan thai kawi mai mai teh ang.

Min dawrtute lo hmachhawn hmasa ber tura dawr hma lam leh kawngka bul vela hlauhawm taka ui lo melhtir khui ṭhintute hian eng rilru nge an put ang aw ka ti ṭhin. Customer hîp tam zawk nan nge, mi ngaihsan nih beisei vang nge, ât vang nge, chapo vang ni ang aw? Nge, an dawr chhunga thilte chu hralh tak tak pawh tum lem lovin, a rûka thil dang hlawk zawk tih nan an dawr chu an hmang ṭhin zawk emaw ni dawn le? Hetiang mi ho hi an tam lo, mahse, ka hmu leh zeuh ṭhin. Russia President Vladimir Putin pawhin Germany Chancellor Merkel nena an inkawm ṭuma a bula a ui a awmtir vangin Merkel hnenah khawvel hriatin ngaihdam a dil a nih kha.

Kum 2025 Jannuary thla khan Aizawl Bazar Bungkawna dawra ka lut chu, an ui lian deuh, Alsatian thlah pawlh hian min lo dawngsawng hmasa ber a, mi hnîm kual dun dun a, a ke pahnih chu ka hnungah hlângin a ding ang ûr ûr a. Ka awm a nuam lo ngang mai a, ka duh ka lei zawh chuan, “Engati nge ui nen dawr in nghah. A va tih tak tak thlak loh ve. Ui lian deuhin lo melh khui chungin tu nge lo lut chak ang?” tiin ka hau va; an nui ṭhâ ringawt. Anmahni pawh khan he thu hi an lo hmuh chuan an inhre chiang viau ang.

Mi tu pawh hian dawr nghaktute hian kan lawmna leh tlangnêlna tâwk turin min lo ûksâk se kan ti ṭheuh. Kan beisei anga min lo chiauau loh hi chuan kan vui ru deuh ṭhin; zêp tur a awm lo. Vai dawrkai kan tehkhin ru ziah ṭhin a nih hi. Belhchian leh pan tlak, pan châkawm an awm ve ṭeuh tawh lai hian dawr tê emaw, lian emaw, eng eizawnnaah pawh hian a tlangpui thuin, vai dawrkai kan la tluk lo lutuk hlawm a ni. Min chhâng ṭha duh lo te, phûr loh hmel zette leh, en pawh min en mang lo chunga zawitêa min chhang ṭhin te, phone en tlat te, an inlêng be char char te, a man zat zawh hnua kan lei leh loh vanga thinrim ta maite hi ka tawng hnem tawh hle. Kei lah hi ka ngeiawm ve bawk a, dawrkai ho mizia leh an chet vel dan, an awm dan leh an ṭawngkamte hi ka lo chîk ru tlat ṭhin a; ka mit tlung lo fe fe ka hmu fo mai.

Vawi khat chu silipar lei turin ka chhuak a. Silipar hria an lo awm mang tawh lo va, ‘Chapal maw?’ an ti deuh zel. Keiin, 'Silipar pawh in hre nange?' kan ti deuh kher lehnghal hlawm a. Silipar chu ke zungpui leh ke zungpui û inkara a hrui cheh beh, a hnung lam kâk pahnih a chhuat rah chhana inbilh lut hi a ni. Hmanlai chuan silipar hi 'vawthlep' tiin Mizo chuan kan sawi phawt a, chutah a sap hming ‘slipper’ tih kan han hriat hnu chuan, kan ti silipar ta a ni. Chumi hnuah tunlaia chapal ang deuh, a kaihna awm, rawng eng ngei mai kha a lo chhuak leh a, sandak vawthlep kan ti leh zaih mai a. Sandak chu a siamtu company hming a ni. Sandak bun pha kha chu kan induh larh ṭhin. Chumi hnuah savun pheikhawk pum a lo chhuak leh a, mangai pheikhawk kan lo ti leh hmak mai a. Mangai tih chu, vai ṭawngin chah, thil chah, tihna mai a ni a, dawrkaite khan mangai pheikhawk kha an lo mangai ṭhin a ni. Mangai bun pha chin kha chu luck tak kan ni.

Tichuan, silipar ka lei tum chu zawrh pawh an lo zuar ngai tawh meuh lo va. Dawrkai ho min lo dawnsawn dan chu ka chîk ru zel pah bawk a. Phone bih chunga min chhang an tam hle. Hmun pakhat, Dawrpui School kawmthlang, Power House panna kawng chhak lama pheikhawk zawrhna tlarah hian nula la upa vak lo, phone lawm rual awm lek hian phone khawih hauh lovin, kawng aṭanga ka hawi phei chu hmêl nêlawm leh hlim sârh hian min lo au va, phûr takin ka lut a. Silipar pawh chu a lo hria a, "Tikhan dawr lo nghak rawh, kudama mi ka zuk la ang e" tiin, kei, a vawi khat min hmuhna ni si kha, min ring takin a kal ta a. Mak ka ti hle. Tichuan, ka thil zawn ngei, silipar ka bun tawk chiah a rawn la ta. “Engzat pawh chhiar rawh, ka lei ang. Silipar hria i nih bakah, phone i khawih miah loh vang leh customer i deal thiam em avanga dawr che ka nih hi. Hetiang hian ti zel ang che,” ka ti a. Ani pawh a lawm hmel khawp mai.

Dawr kan kaina leh kan sumdawnna leh, ei kan zawnna ṭheuh kawng tinrengah hian tih tak zetna thinlung nena ti leh ti lo kar hi a hla em em. Kan thinlung hi kan hmel leh kan chetziaah a lang vek a, chu chu mi dangte pawhin min lo chhiar thei vek ṭhin a ni tih hi i hre reng ang u. Hetiang lam hi tunah kan sawi vek seng lo vang. Malsawm tlaka hna thawk leh rilru hrisel neite hi chu Pathianin mal a sawm ngei ngei ṭhin tih i hre reng ang u.

- K. Hmingthankaia