Tunlai harhna kan thlir dan hi
Tunlai Zoram dung leh vanga harhna lo thleng chungchangah hian sawi leh selna lam hawi lek lek hriat tur a lo awm leh zauh ṭhin. Chutianga sawi duhtu tan chuan mipui tam tak zingah harhna thlarau chan dan pawh a inchen reng a ni.
Hetihrual hian Zoram mipuiten kan hriat thar leh atana thil pawimawh tak chu : Zoramah Thlarau Thianghlim harhna a lo thlen theih nan Kohhran hrang hrangin Pathian hnenah kan dil ṭhin a. Chu kan dilna chu tun hunah hian chunglam chhanna Zoram hian kan dawng mek a nih hmel.
He harhna hi Kelkang aṭanga inṭanin tunah hian Zoram hmun tinah a darh zau zel a. Puitling leh naupang lam chan dan pawh a dang chuang lo, khawimaw laiah chuan he harhna thlarau hi lo chang chhah deuh pawh awm theih tho a ni.
Harhnain a hrin chhuah sual thupha chawi nana inbingbileh, khuangchawm, Zoram sualna zawng zawng ngaihdam kan nih leh theih nana saiip puan sina kawng zawh, ṭawngṭai, hnehna puanchhuahte hi mahni inpek ralna aṭang chauh lo chuan thiltih theih ni pawhin a lang lo.
Hlimna thlarau changtute lo ralthlirtute tan chuan nuih tiza leh sawisel tur pawh a tam ang. Mahse chutiang zawng ni loin keini ringtute chuan hetih hunah tak hian kan theihna zawn ṭheuhah kan lo ṭawngṭaipui fan fan zawk tur a ni. Heng zawng zawng titute nunah hian tirtu a awm ngei a ni tih chu hairual a ni lo. An nun aṭanga in enlet turin keimahni lam zawk lo inbuatsaih ang u.
Zofate sualkawng thuk taka kan tluk luh tawh avanga chunglam thinurna lo thleng tur laka Zoram mipui kan dam leh theih nan Pathian Thlarau Thianghlimin he harhna hi min buatsaihsak a ni mai thei asin.
Ram chhung chanchinbu leh media lamahte khawimawlai Kohhran hlimna thlarau chang chhah deuhte hlimna lo ral sawi chiam hi a la hun rih lo. Kohhran huang chhunga awm an ni a, Kohhran chhunga thil thleng chu kohhran hruaituten an ching fel thei em em ang.
Kan ram sualna zawng zawng tidam leh tura Kohhran hrang hrang sual thuphachawina leh tunlai thilthleng hi hmuhnawm thlira lo thlir mai lo leh sawisel mai loin anmahni aṭanga zirchhuah tur awmte zir ila. A tam thei ang ber lo ṭawngṭaipui hi tunlai boruakah chuan a finthlak ber ang.