Mizote i induhsak ang u!

Ka ṭhian pakhatin 'Vaiho chuan anmahni vai pui bak chu lu an mehtir duh lo,' a ti ṭhin a. A thusawi kha ka ngaithla liam puat a, a thu sawi kha a dikah pawh ka ngai lem lo. Mahse tun hnua ka han ngaihtuah neuh neuh hian a dik riauin ka hria. Ṭhiante zingah lu met thiam vak an awm loh avangin kum thum liam ta vel aṭang khan sam mehna dawrah deuh chauh ka sam hi ka mehtir ṭhin a. Ka mehtir ve ṭuma sam met tura lo kal ve ṭhin vaiho hian Mizopa sam an mehtir awm hi ka la hmu ngai lo. Anmahni hnam pui chauh an mehtir ṭhin.

Vaiho hi chuan anmahni hnam pui hi kawng engkimah duhsakna chang an hre tlat. Dawra thil lei chungchangah pawh ni se anmahni hnam pui ngei dawr an tum tlat ṭhin a, an dawr deuh ngei ṭhin bawk. Loh theih loh thilte a nih ngawt loh chuan hnam dang hi chu an dawr mai mai lo. Thu mai ni loin a takin an in duhsakzia hi an lantir ṭhin.

Chutiang khawp chuan vaiho chuan anmahni leh anmahni induhsakna chang an hria. Keini pathian nung bia, nangmah i inhmangaih angin i vengte pawh hmangaih rawh, tih hretute hian ti nge kan hnam pui, Mizo ngei hi duhsakna chang kan hriat loh fo ṭhin le!

Vaipa in a ngam huai zawk vanga Mizopa aia vai kan in ruak kan luah tir mai ṭhinte pawh hi a ṭha lo. Sum kan duh luatna avang hian kan hnam pui, kan Mizo pui ngeite chungah hmangaihna leh duhsakna pawh kan lantir thei lo a nih chuan taima taka kan inkhawm ṭhinna leh, Pathian tana thawhlawm kan thawh zozaite pawh hian vanram min thlen lo ang tih te pawh a hlauhawm a lawm.

Zirna avang te, hna vang te, eizawnna avangte in state chhung leh pawn aṭangte in Aizawl hi mi tam takin khawsak nan leh chen nan an hmang ṭhin. Chhungkaw tam takin hmun dang leh khaw dang aṭangin awmhmun nghet khuar tumin chhungkua kuain kum tin an pan a, chumi avang chuan in ruak luah tur zawng an tam thei em em a, in ruak luah tur hmuh mai pawh a harsa ṭhin. A ngam huai lo deuh tan phei chuan in ruak luah mai tur hmuh chu thil namai a ni lo. Chungah chuan Mizote ai vaiho in a tlangpui thuin in ruak luah tur an hmu theiin an hre thei zawk tlat, a mak khawp mai. A chhan pakhat chu vaiho chuan zim deuh pawh to deuha an luah ngam zel vang a ni. Sum duh luatna avangin keimahni chi pui leh hnam pui ngei ai ram dang mi leh hnam dang mi kan duhsak zawk tlat zel.

Mizo dawr nei ve te hi chu an hawih­hawm lo, biak an har si, dawr pawh an chakawm lo kan ti fo ti ru? Ni e, Mizo dawr nei ṭhenkhat hi chu an hawihhawm lo ve deuh ṭhin a lawm, mah se chumi avang mai chuan kan hnam pui dawr siamte hi i dawr loh phah lo ang u. Hawihhawm tak an nih vang ringawtin kan sumte hi hnam dang kutah i luanluh tir ringawt lo ang u. Vaiho hian kan kut aṭanga an sum hmuh hi kan kutah an rawn luanluh tir ve tawh mai mai lo.

Vai mistiri chhawr ai chuan Mizopa mistiri ngei chhawr ila, an rate sang deuh mah se la, mistiri helper atan pawh Mizo ṭhalai an awm chhung chuan Mizo ṭhalai ngei chhawr bawk ang u. Kan bungrua leh thawmhnawte min phurh sak turin Vai mutia ai chuan Mizo ruai ṭhin ila, dawra thawk tur pawn Mizo ṭhalai an awm chhung chuan hnam dang i chhawr lo ang u. Motor khalh tur leh motor zui tur pawhin Mizo ṭhalai an awm chhung chuan hnamdang i chhawr lo ang u.

Mahni hnam pui chauh induhsak chu a va Pathian thu lo ve mawle i ti a ni mai thei, a Pathian thu zawk mah asin. Mi dang tidamtu kan nih dawn chuan mahni kan intihdam hmasak phawt a ngai tlat. A awmzia chu, hnam dang chunga ṭhat kan chhuah dawn chuan kan Mizo puite chungah ṭhat kan chhuah hmasak phawt a ngai tihna a nih chu.

Mizo mipuite pawh duhsak tlaka nun tum ve bawk ila, hmasawn kan ngaihna laiah hmasawn tum ila, mi dangte khawngaih tlak leh hmangaih tlaka awm tum ve ṭheuh bawk ta ila.