Sawhthingah lo buai vak teh suh u
ZPM ministry chuan a campaign auhlaa a lo neih tawh sawhthing lei leh hralh chu tunlai hian a buaipui mek a. Hmun tam takah an lei khawm a, kudamah tam tak an dah tawh a, a ṭhen phai lamah an thawn nual tawh bawk.
Sawhthing chingtute'n an duh zat emaw, an thar chhuah zawng zawng an hralh thei rih lo a nih pawhin sorkar chuan theihtawp a chhuah dawn niin a lang a. Eptu party-in tluang taka a leisak a hlau a niang e, an lo buai ve em em a. "Lo buai ve vak teh suh u" ka'n ti teh ang.
Congress leh MNF party-te hi kum kha leh chen an sorkar ve ve tawh a, ZPM sawrkar kum khat chhunga thawh ringawt pawh Congress leh MNF term khat thawh hial pawh a awm ang. Sawhthing leh thlai thar lei kawngah ngat phei chuan MNF leh Congress sawrkarte khan hma an han la ve tak na a, a hlawhchham chiang viau. Chuvangin, Pu Duhoma'n inthlan campaign auhla berah pawh thlai thar kan lei ang a, a hralhna kan zawng ang, a tih angin sawhthing an ching ta ur ur mai a, a thar pawh an thar ṭha thawkhat hlawm viau niin a lang.
He hlawhtlinna tura lo lang hi eptu party pahnih chuan an lo helh ve em em a, a hlawhtlin mawlh an hlau emaw tih tur a ni; an hlau tak takin kei phei chuan ka hria. Sawiselna tur ringawt an zawng a, sawrkar han fak emaw, han puih duhna rilru an pu thei reng reng lo hi chuan politics thli chhiain a nuai a ni ngei ang. An sorkar laite khan kuthnathawkte hmakhua ngai ve ang hmiang, tuna taka sawisel reng ringawt mai hi mipuiin kan kham a nia.
Politics hi ram rawngbawlna pawimawh tak, ram tana ṭha tur thawktu turte awmna a nih laiin Mizoramah chuan kan kalsual nasa em em a. Tunah pawh sawrkarin lakhuihthei, grape leh thil dangte wine-a siama thawn chhuak thei turin dan a duang mek a, thawhpui tur leh state pawna lo hralhtu tur a zawng mek bawk. Wine hi zu ngawr ngawr a ni bik lo a, thil ei tur chi khat a ni ve mai. Kan kuthnathawktute dinchhuah nan chuan wine siama thawn chhuah hi a ṭulin a ṭul ngawih ngawih tawh a ni.
Assembly session neih mekah pawh wine siam chhuah leh hralh dan tur an pu lut ngei dawn a. Eptu party rilru khermei deuh chuan an lo helh nghal em em ringawtte hi a dik lo. Thingtlanga an thar chhuah man ṭha zawka state pawna an hralh theihna dawn a nih phawt chuan mahni party thil tih a nih loh vanga sawisel chiam chiam hi a hun tawh lo.
Mizoram kan pachhia a, kan thlai thar chhuah ang angte siam danglama thawh chhuah ve a hun tak zet tawh. Kuthnathawkte manganna hi hriain kan sawrkar hrawn mek chuan sawiselna karah hma a la dawn a, huai takin hma han la teh se.
- Lalkhirhvela