Mizote leh meizial

Pi leh pute aṭang tawh khan Mizote hi meizial zu hnam kan lo ni daih tawh mai a. Khang hun lai aṭang tawh khan meizûk hi duh lo awm thin mah se a ṭul tlat si a lo ni.

A chhan nia lang chu, pi leh pute kha lova an han feh khan thosi leh rannung dang ṭhenkhatin a tibuai ṭhin a, meizial zuk hian eng nge maw chen chu a ṭeng thin a ni. Kan mi hmasa Mizo pi leh pute’n an fehna lama inven nana meizial an lo zûk ṭhin kha mi tin mai hian tun thlengin mahni awmna hmun apiangah intihchangkan nante meizial changkang chi thlengin zuk leh chah an lo uar ta tulh tulh mai. Meizialah hian nicotine a awm niin an sawi a, hei hian addict a tiawlsam niin an sawi bawk.

Meizuk avang hian Mizote hian natna chi hrang hrang kan vei nasat phah hle a, natna ṭhenkhat kan hriat larte phei chu Mizo zingah hian vei nasa an awm nual bawk. India ram chanchinbu hrang hrang zinga lar tak pakhatin hmân deuh tawha a thai lan dan chuan, Mizoram hi meizukah a sang filawr hle a, mipa leh hmeichhiaah state dangte kan khûm vek niin a thai lang. Meizuk hi Mizoramah hian natna enkawl dam hleih theih loh langsar tak pakhat vei an tam em emna chhan niin a lang.

Meizial zuk chungchangah hian Mizoram sawrkar pawhin nasa takin hma a la ṭhin a, puipunnaah te, damdawi inahte leh sawrkar office-ahte meizuk khapna a lo chhuah hial tawh ṭhin.

Meizial zuk nghei hlen hi ta hi tunah chuan chhiar fe tham an awm ve tawh a rinawm. Meizuk nghei hi a harsa lo va, mahse nghei hlen dawn erawh chuan thil harsa a ni a, kan tawrh ve deuh a ngai ṭhin. Meizial nghei lama mi thiam nia sawi Linda Hyder Ferry chuan, a hmasa berah chuan eng vangin nge meizial i zuk chhan han inzawt la, i hun awl tih khah nan nge, i rilru hah chhâwk nan nge, i lo tih ṭhan vang hrim hrim? I ṭhiante’n an tih vang nge? Heng zawhnate hi i chhan hunah meizial zu kher lova tih theih dan zawn tur a ni tiin a ziak a ni.

A dawt lehah chuan, i meizial zûk zat kha chhinchhiah la, kar khatah eng zat nge i zuk hman? Pawisa eng zat nge i sen ral tih chhinchhiah la. I pawisa hman ral ai khan nangma thil pawimawh lei nan leh in chhungkaw thil pawimawh lei nan hmang la a fuh zawk lo maw? I meizial zûk ṭhinte kha lak mai theihah dah lo la, hmun sang deuhah emaw, awm hmun leh ban phak maiah dah loh tur a ni.

Mei zûk lohna hmun siam la, eng emaw chen chu a pui thei ang che. I rilruin mei zu tawh lo angah indah la, miin mei zuk tur an pek dawn che pawhin hnar zel ang che. I ṭhiante nen a rualin nghei u la, chu chuan team work a siam ang a, phatsantu nih bik kha in hreh ang a, a ṭha khawp ang.

Mimal tumruhna hi a tawpah chuan a pawimawh ber a; chuvang chuan, meizial nghei i tum khan i rilru siam fel hmasa phawt ang che.

- George L.Ralte, Vaivakawn