Thingtlang Maxicab stand tah tichhuak

Hmanni chu Ai­zawlah chiseh lamin lehlangin maxicab service-ah ka kal ve a. Aizawl thlen chuan hmanhmawh takin ka thil lei turte ka lei a, ka rit ta viau mai a. Kan hawna tur sumo ber lah chu hmuh phakah a awm ta der lo, kan motor dinna han thleng tur chuan hla te khua a lo ni tawh si a, ke ringawta han pan ngaihna a awm ta der lo. Thingtlang pa tih takah taxi han hman te chu thih hreh takin kan hreh mai bawk si.

Tih ngaihna dang a awm si lo, taxi chu ka hmang ta a, Rs. 200/- ngawt mai sen a ngai ta. Tichuan, Aizawl aṭanga kan veng thlenga ka sumo chuan man chu hmel hriat an ni bawk a, ka bat phah ta ringawt a, a lungchhiat thlak ngei mai.

Maxicab stand Aizawl khawpui chhung, bazar aṭanga hla vak loa a awm lai kha chuan thingtlang pa tan pawh Aizawl dawra han kal ve a hrehawm lo. Tunah zet chuan Aizawl dawra han kal pawh kan inrawk a ni ta ringawt mai. Heng thilte hi kan Aizawl Municipal Council rawt chhuah niin sawi a awm a, a enga pawh chu ni se kan Aizawl khawpui pawh hi a mahin a ding thei bik lo tih hi kan AMC te pawh hian hria se.

Tuna stand sawn a nih hnu hian traffic jam a nep phah chuang­in a lang lo a, khawpui a thianghlim phah tak pawh kan hre lo. Thingtlang miretheite tawrhna thlen zawng khera hma lak hi zawng a finthlak lo a, a Kristian lo bawk a, sim vat chi a ni e!

Tunah chuan AMC hian thingtlang khawi khua ami tan pawh harsatna lian tak a siam ta. Harsa taka thingtlang mite pawisa lakluh sa hetiang taka kan ren pui lo ta mai hi eng politics boruak nge ni ang le? Heti khawpa inthamlohna leh inrawkna hi kan state sorkar hian a hriatpui ang em? Kan sorkar, mirethei VIP a neihtu hian a VIP-te manganna hi han thaibo sak se kan va ti ve le.

Tunah zet chuan maxicab stand chung chang hi thingtlang khawtin tan manganna lian tak a ni ta vek a, tun ang renga kan sumo stand te hi khawdai pawna min dahsak reng a nih chuan inthuruala nawr a, lungawilohna lantir hun kan la nei ngei dawn. Chutih hunah chuan kohkir theih loh thinrimna kan Aizawl khawpuiah kan leih buak vaih chuan a sawhkhawk a na lutuk palh hlauh dah ang e.

Siam ṭhat theih thil a la nih lai hian kan AMC te pawh hian inti tuavawn a, inti Aizawla thingtlang miretheite lungkham lo tak anga langa ro in rel ṭhinte hi lo siam ṭha hram teh u, a tlai hma hian.