Chapchar Kût thupui leh Donald Trump

Kumin 2025 Chapchar Kût thupui chu Zo nun ze mawi – Hawihhawmna a ni. Kan thupui hi chhiar leh sawi liam puat ang mai hi a ni lo. Han bêl chiang ila zawm har tak, zawm leh hman chuan mi zawng zawng inkara min thlung nghettu leh min hnûk hnaitu a ni thei. Sap ṭawngin eng ber hi nge ni ang – politeness nge, good manner kan ti ang? Chu pawh chuan a phawk zo lo. Hawihhawmnaah chuan hmangaihna a tel a, duhsakna leh hlawhtling se tih duhna a tel bawk.

28/2/2025-a White House Oval Office-a America President Donald Trump-a leh Ukraine President Volodymyr Zelenskyy te inbiakna kha an hawihhawm lo dun hle mai tih kan hmu thei ang. A bik takin Donald Trump-a ngat phei hi chu mi ti phut phut leh mi chapo tak, a character leh a thusawiah mi hawihhawm lo tak a nih chu kan hriat sa a ni. Khami zana a Vice President JD Vance-a pawh kha ṭhian ṭha level pui inbiakna, hawihhawmna tel lo chungtlak tum sa taka biak a ni tih a lang reng bawk. Donald Trump-a te khan a hmaa kûna thuhnuairawlh takin Volodymyr Zelenskyy chuan ‘Ji sap, Ji sap’ ti mawlh mawlh se an duh a nih hmel hle. Putin-a laka tlaktlum loh hlauh vang a ang ber zawk.

Ka ngaihtuahna a kal thui hle ṭhin. District Council hun lai leh UT laia kan kamdingte kan biak ṭhin khan, thingtlang mi, pawr tete kan ni vei râwl nen, kamding kan han bia a, thu kan han zawt a; kan hria ang tih hlau awm tak, fiah si lo tawi deuhin min han chhang hmuk mai ṭhin kha chu rilru a na thei hle. Han zawh nawn leh ngam chi a ni tawh lo. Khang ram hlui zia kha tunah chuan ziaawm tawh hle. Nimahsela, a la bo vek lo a nia nge, sawrkarin aikal lak an khapa, Civil Hospital nurse ho chu an vîn leh tawh lutuk an tih chu! Kan thupui ‘Zo nun ze mawi – Hawihhawmna’ a va han pawimawh em!

Party ṭhenkhat an han inthlang a, sawrkarna an chang a, minister-te an han nei a. An minister ta chêng a, han bia ila, ṭhenkhat phei chuan en pawh en lo hian min chibai a. Inthlan lehah chuan a tlakna ngaihtuah ve ngar ngar chu kan duty a ni an ti ve mai ṭhin. Mizo ze mawi hawihhawmna hman a va han ṭul ṭhin tak em?

Donald Trump-a te ang nun zia khu a lawm keini mi hângte tan chuan ngei awm ni. Kan pian zia hrim hrimah hian min hmusit sa phawt mai a. Kan naupang zirlai bu hmasa lamah khan ‘Mingo an fing ber a, an huai ber’ tihte an ziak a, India an awp lai pawh khan mi hang rank leh mingo rank an siam hrang ṭhin. Mizo kamding hmasate pawh khan hei hi an lo copy a, kan rama mi hmasa ho inti lal lutk kha an lo kham tho ṭhin. Mizo Union pawh khan sap an huatna bul chu an intilal leh an hawihhawm lo kha a ni, a rang thei ang bera lal ban an policy chhan chu ni.

Ṭhenkhat phei chuan sap nun hi a ṭha emaw an ti a, an hmingah Mizo ni reng si sap hming pu tlatte an awm. Kei chuan Mizo ni si sap hming pute hi Mizo hnam phatsantuah ka ngai. Sap nial nual, Mizo nial nual ṭul ka ti lo. Mizo hi a ni ropui ka tih chu. Mizo nun mawi–hawihhawmna chuan a va han nghawng thui ta em!

A tawp berah chuan, Zo nun ze mawi–hawihhawmna hi a takin office-ah, sawrkar rorelnaah, kan inṭhenawmnaah, kan Kristiannaah i nunpui zel ang u. ‘Zo nun ze mawi – hawihhawmna’ vul zel rawh se.

- C. Lalaudinga, Ramhlun Venglai, 9862769948