Khawi lam mi nge hmanah heng hi?

Kan ṭhianpa pakhat chuan Face­book-ah a status-ah heti hian a ziak a, "Tuna kan chawimawi ṭhenkhat hi kum 10 em pawh ni lo, kum 5 vel kal taa tunge an nih pawh kan hriat loh te, a ṭhen chu an hnathawhna hmasaa mi hmingchhe takte an ni. Sum hian min bual â zo ta a nih hi," a ti a, ka han chhu zui ve lawk ang e.

Aizawla pa hausa tak tupa a ni a, a sawi dan chuan Mizoram mipui kan tam lova, sumdawnna fair taka kalpui tan vawi leh khatah a hlawk thut theih loh. Mi an rawn lansarh thut chuan compensation tam tham an la thut a nih loh chuan an pawisa neih dan hi chhui a ngai tih lam a sawi a, ka rilru a vâk thui hle a ni. Tuna Mizorama mi hausa anga kan sawi lar, a ṭhente phei chu FB hmang rual ṭhalaiin mi fair leh ṭha taka an ngaihte hi an pawisa neihna lam chhut a ngai.

Vanglaini lamah hian ka chhiar tawh chu, "Damdawi zuar an hausa," tih lam hawi kha a ni a, mipui nuai 10 vel population-ah damdawi dawr a tam tehlul nen a dawr neitu an hlawk deuh ṭhup ṭhup leh damdawi dawr nei hausa lian an tamin ngaih a tihṭhat loh thu an ziahte kha chhiar liam mai mai atan a uiawm hle mai.

State dangah dan anga fair taka dam­dawi zawrh hi, mipui tamnaah pawh vawi leh khata hausakna a ni phak lo.

Miin tunah pawi­sa a nei a ni thei e, hman deuhah khan tu nge a nih? Khawi pawisa nge a hausak­pui? A hlawk thut nge thil dik lo a ti? Hausak thutte hi thil theih a ni em? Sorkar hnathawk tan hausak hi a theih em? Chief Secretary hlawh zat hre tan Mizorama sorkar hnathawk hausa hi engtia ngaih tur nge? Sum ngah ringawt hi zahawmna anga kan ngai a nih chuan an sum siam bul ṭan dan hi kan ngaihthah dawn em ni? Mizoram hian sum nei apiang hi a pathian dawn em ni? Sum hian min bual â zo tak tak a ni tawh mai lo maw?

Tunah in vengah pa hausa eng ang pawh awm se, i zawhna tur chu, "Hman deuhah tu nge a niha engtin nge a hausak thut theih?" tih zawt rawh. Tunah hian Mizorama mi challang ṭhenkhat hi an thawhpui hlui te, a ṭhen chu an sumdawn puite leh anmahni hre chiangtute hian an ngaisang lo, sum an ngah hnua hmelhriat chawp tute hian an ngaisang mai mai a lo ni awm e.

Khawi lam mi nge hamah hei hi, tunah puan ropui sinin!