Inthlang leh tur pawh kan ang lo
Kum 2018-ah MLA kan thlang leh dawn tih hi kan sawi chhuak fo a nih loh chuan tuna kan sorkar kal dan leh opposition kal danah hi chuan inthlang leh tur pawh kan ang lo a ang ber mai. Sorkar hian tumah hlau lovin chhiah an tisang a, zu an zuar a, an duh chu an kaltlangpui hmak hmak a, opposition lamin engmah an dodal ngam lova, tunah hian kohhran lam ṭang nih tumin an tlawn mek bawk a, kan kal dan hian ka mang a tiang ru a ni kei zawng.
Congress hian a nihna takah chuan tumah an hlau lo. MLA an ngah si. Tunah hi chuan tlak an hlauh loh bakah kum 2018-ah hian tlin leh an inring a nih ka ring. An hotute hi MNF ai khan eirukna leh hlemhletna lamah an fihlim phian a, hei hi an intihtheih chhan a niin ka hria. Kan ngaihtuah chian chuan eiruka fihlim hi intihtheihna tur a ni lo, an nihna tak tur a ni. Mipa si tuai an nih hian an zahpuiawm a, tuai piangthar, rawn inti mipa ta hi lawmpui tur pawh an ni lova an nihna tur angin an kal ve ṭan dawn leih leih chauh a ni zawk.
Congress hi tun hmaa eirukna lama mualpho tawh an ni a, tun term hnihah an la mualpho lo hi fakna tur a ni lova, mipui beisei angin (an la tlin lo hle nachungin) an kal ve ṭan dawn ang velah ngai ila a dik thei ang. Tuna mi anga tuma hmai zah nei lo leh ngaihsak lova an kal mawp mawp chuan an tlo tak tak lo vang. Eiruk loh a tawk lo, thil ṭha tih leh ram tana rotling siam a ngai. Congress hian sorkar hi an kaltir thei ngawr ngawr a nih hi, thil ṭha chhuan tham pawh an thawk lo.
Politics-a thil pawi chu 'weak opposition' tih a ni ṭhin a, chu chu kan ramin a tawng mek. Zirlai pawl hming invuah, zirlai pawh ni tawh lova college-a zirlaite tha leh number behchhana inhâm puar chawp mai maite leh kan opposition-te hi an thawm len dan a inzat vel nia. Opposition hian sorkar hi do ngawr ngawr se ka ti lova, opposition hian mipuite hi 'hope' siamsak se ka ti zawk a ni. "Kum 2018-ah chuan anni hi thlang ila a ṭha ang," tia itawm hian an la awm chhin lo a nih ber mai hi maw! Kan hmelhriat sa leh tling tura kan rin si lohte hi oppositon-ah hian an inzui kawi leh dem dem a nih chuan khua a var lo.
Tlawmngai pawl leh eiruk do pawl anga politics-a luh tumna nei, 2018 vela MLA-a din tumna rilru neite pawh hi an awm ru reng a, a ṭhente chu an intelkhawm mek niin an sawi a, hengte hi a ṭhat ṭhin nen anmahni lam hi chhui chian an dawl loh avangin an zuih ral leh mai ṭhin si. Mipui hian movement thar buatsaih emaw, ruling leh opposition party liana hruaitu lawk inthlak emaw a thlen loh chuan Mizoram hi tuna mi ang hian rei tak kan kal theih ka ring. Pawisa nei lo, development pawh nei lo, mipui tlem zarah rethei ngawih ngawih si lo, ṭhenawmte phak bawk si lo hian he state hi rei tak chu a la kal ngei dawn a nih hi.
Kum 2018 hi a hla tawh lova, tunah kum 2015 kum laihawlah kan awm mek tawh a, thil hian hawi lam a neih a ngai tawh tih hi rilru hmanhmawh deuhte ngaihdan a ni tawh. Tunah hi chuan engmah hian hawi lam a la nei lova, ruling a awm a, opposition an awm leh a, an awm hmun ve ve hi awm hlen tum niawm takin an khawsa niin kei chuan ka hmu. Zoram hian movement lian tham a neih thut loh chuan kan hmabakah hian 'a ngai tho' a awmin ka hria a ni.