Hats off to Prof Dougel

Prof J. Dougel hi tun hmain a hming chauh kan lo hre ṭhin. ANI interview lamah chiang, fiah, felfai, thu dik behchhanin, academic takin Mi­zoram leh Assam ramri buai chung chang a rawn sawi fiah ta kak mai a. A lawmawm ka ti a. Prof. Dougel-a, lukhum phawk meuhvin zahna chibai ka buk ta a ni. 

Prof. Jangkhogam Dougel hi MZU Pol. Science deparment-a zirtirtu a ni a. Inter­national level seminar vawi 10 chuang a tel tawh a ni. National level seminar pawh vawi 25 chuang tel tawh, paper tam tak ziak tawh a ni. A specialised-na subject chu, Sixth Schedule chungchang a ni. 

Mizoram Univer­sity-ah hian mithiam tak tak, Doctorate degree nei, Professor mi za rual kan nei ta. An university campus chhunga naupangte zirtir ngawr ngawr hi an duty a ni lo. Mipui vantlang ṭhatna leh bengvarna tura an thiam finna hmang tura beisei an ni. 

Kan ramin Assam ram nen ramri buai kan nei kumkhua a. Politician te, journalist ten anmahni version ṭheuhvin an ziak a, an sawi bawk ṭhin a. Mipui zingah a vei deuh, a taima deuhvin reference an neih ang angin an sawi nuaih nuaih a. Chanchinbu leh social media-ah chhiar sen loh kan hmu leh mek a ni. A ṭha khawp mai. 

Kan university chhuan em em, India ram university ṭha thlan zingah pawh hming lang pha, kan innghahna Mizoram University zirtirtu Prof. Dougel-a  rawn che chhuakin sapṭawng fiahfai takin, historical facts nen chiang em em maia kan harsatna a rawn sawi piap piap mai hi a va lawmawm em. A va ropui em. Hnam chhanna, ram chhanna a ni. He thuchah a sawi hian ram pawn a thleng thui hle ang a, awmzia a nei hle ang. 

Prof Dougel-a ang hian kan professor rualte rawn che chhuak ve hlawm ula. In thiam leh finna te kha ram mipui chhawr theih turin rawn pholang zel teh u khai. 

Professor rualte u, kan zah che u a, kan ngaisang lutuk che u a nia. Nasa lehzualin ram tan contribution rawn nei zel teh u.