School hlunin ngaihsak a hlawh lo
Kum 1944-a din Mizorama sikul hlun berte zinga mi Govt. Mizo Higher Secondary School, class 11 & 12-ah ringawt pawh zirlai sang chuan awmna chuan ngaihsak a hlawh lo hle a, sorkar aṭangin zirtirtu leh thawktu dang pek loin a awm rei tawh hle.
He school-ah hian Arts stream-ah subject teacher nei loin subject 2 chu kum 2021 aṭang khan zirtirtu an nei tawh lo a, Mizo subject-ah pawh kum 5 kal taah zirtirtu promotion-in a chhuak a, a post kalsan chu hnawh khah loh vangin zirtirtu indaih lo hle a, Mizo leh English subject-ah chuan subject danga mite'n an hmui char char niin min hrilh.
Geography zirtirtu transfer chu kum 4 zet hnuah pawh a aiawh tur hmel an la hmu lo va. Mizo leh English subject-ah chuan an subject danga mite'n an hmui rih bawk.
He school hi building pakhat chauh a nih loh avang leh zirlai leh thawktu an ṭhathnem bawk si avangin tui leh electric bill a sang hle a. Thla khat electric bill ringawt pawh Rs. 26,000 chuang a ni ṭhin.
Hetih lai hian office expenditure (OE) chu Rs. 18,000 quarter khat atan an dawng niin an sawi a. Bawlhhlawh paihna man ringawt pawh an harsat phah hle niin an sawi bawk.
An harsatna dang an sawi leh zingah exam-na atana mamawh science practical hmanrua te, furniture thawm ṭhat leh a thar siamna an la mamawh hle tih an sawi a. Department aṭangin computer set pek pawh dahna tur an nei lo a, laboratory pawh school-in lo inngaihtuah chawp tura tih an ni.
Vocational Education hnuaia trade hrang hrang atana bungrua an dawn pawh a dahna tur room indap chawp ngai tho a ni bawk.
Mizo High School leh Higher Secondary School hi Mizoram tan sikul hlu berte zinga mi a ni a, mithiam tam tak lo chher chhuak tawhtu, Mizoram tan leh Mizo hnam tana mi hlu leh thawh hlawk tak tak ṭhahnem tak lo chhuah tawhtu a ni. Sikul sikul aṭanga zir chhuak ram hruaitu ni zui ta leh kohhran rawngbawlna lama mi pawimawh tak tak tam tak an awm tawh bawk.
Chuti khawpa sikul hlu bik a nih lai chuan kan sorkar hian a ngaihsak tawk lo em ni chu aw tih tur a ni mek a, a zialo tak zet a ni. An harsatna leh mamawhte hi sorkar thuneitute'n zir chiangin phuhru thei se a duhawm hle mai.
- Lalrinmawia