Vanglai nun

Thu thiam takte’n han ti zawk se la, a ngaihnawm zawk ngei ang. Mahse, keiin tih kan tum ve miau si a, theihtawp chhuah kan tum ang e.

Vanglai kan tih hi eng ang hun lai nge ni ber; tleirawl/rawlthar kan tih hun lai hi a ni ber ang chu maw. Bible-ah pawh hian vanglai hun hi theihtawpa hman a phal a, mahse, vaukhânna erawh a siam. Hmeichhia phei chu an hman ṭhat loh chuan a buaithlak lehzual. Keini Mizo-ah chuan tleirawl sualte kan ti a, nei lo chu an tam vak lo ṭhinin ka hria. Mihringin kan hun tawn chhohah ṭhat ber lai, fuh ber laite kan nei ṭhin; chutiang bawkin ram pawh hian vanglai a nei ṭhin. Zaithiamte pawh hian vanglai an nei ṭhin, hetiang hun lai hi chuan Ruotmawi, R Lalbiaksanga, C Lalrinmawia te leh a dangte an pui vet vet viau a ni. Thusawi thiamte pawh a hun lai chuan mipuiin kan bawh ruih ruih ṭhin a nih kha.

Pi pute hun lai

Kan thlahtute, pi pute kha vawiinah chuan kan awt lo tlang ngawtin ka ring, anni pawh khan min awt bik chuang loin ka ring. Tumah tihbuai ngai lovin buh thar ṭha tak tak ei tur an intodelh a, chawhmeh pawh thlai chi hrang hrang ṭha tak tak an intodelh a; luiah sangha, chakai, chengkawl an intodelh bawk. Mi harsa leh chhawmdawl ngaite an ngaihsak tlangpui a, râl laka an him nan zawlbuk ropui tak an nei ṭhin. Kût chi hrang hrang an nei a, hlim takin an hmang ṭhin. Ram a hrisel a, nula leh tlangvalte pawh an hmel a ṭha ṭhin a ni ang, thawnthuahte pawh kan hre ṭhin. Lal leh khawnbawlte tih loh chu an khawsak/dinhmun a inang tlangpui vek. Kan vawiin dinhmun hi han ngaihtuah ta ila, Silchar kawng a pin chuan kan buai zo vek. Mi hausate pawh an awm ve a, tam tak hi chu a bâ (loan)-a intimilian an ni hlawm. Kan sawrkar pawh hi bâ a neih tam thu kan hre zing.

Kei ka vanglai

Tlai khat ka haw chu miss-call a lo awm a, ka’n biak let chuan, ”E, nang i ni maw,” kan inti hê hâw a, college kalpui ṭhin a lo ni a. Kan chanchinbu (thla tin)-a i thu ziah ṭhin kha tun kum chu chawimawina (award) pek che kan tum a, chumi hmun leh hunah chuan i lo kal thei ang em a rawn ti a. A tukah chuan Synod Conference Hall pan chuan ka kal ta a. Dawhsanah (stage) kan lawn chho a, trophy chu kan lek ta a. Tute emaw ang deuh khan thlalakna a de zuai zuai a. Mite ang chu ni lo mah se, hei bak chu awm thei tawh lo vang. Ṭhian hlui group (WhatsApp) lamah pawh mithiam leh fel tak takte chuan fiamthu ti tak deuhin, jindabad jindabad an ti a, min rawn lawmpui a. Hei bak chu a awm leh tawh lo vang, kei atan chuan ka ti a ni. He chawimawina hi a tirah chuan ka ngai ho ang reng viau a, mahse, vawiin thleng hian a dang tluk tur ka nei ta chuang lo.

A her liam ta

Vawiinah chuan rilru lam chu eng ang pawhin han fit mah se, tun hma la hriat ngai loh calcium-te chu ei ve deuh reng a lo ngai ta. Mit chuan duh han thlang ve ṭhin mah se, taksa chuan a tlin tawh meuh lo. Hmelṭha ve deuhte chu lo kal hnai pawh ni se, tihngaihna a awm tawh lo. Upa hri chi hrang hrangte kha zêp hleih theih pawh a ni lo. Nula ho tan chuan, ‘E khai’ tia kal bo nghal vang vang a ni tawh mai. Suangtuahna lama duhthu sam chiam chiam hi tih theih tawk a ni ta ber mai. Siamtu’n min duan dan a ni miau a, ṭhalai ang tak tur chuan a awm ve hleih theih tawh loh. Nia, mipate chu kan la vannei zawk alawm, hmeichhe léngrei ho phei chu tlangval ho hian an melh tawh lo reng reng niin ka hria. Keini chu, kha khan nupui a nei dawn, tih a awm leh zauh ṭhin. Nia, hmeichhe lengrei ṭhenkhat pasal nei an awm ve zauh ṭhin bawk.

Hunpui (Krismas & kumthar) kan hmang zo, mahni ṭuanna mual mualah kan tih hnu, March thla chho vel lai, ni a êng kulh, reh deuh ruih bawk a. FM-Zoawiah chuan vai aw thiang fân fiah ṭha tak chuan, ‘Dil ka rista’ tih hla kha a rawn sa a; a remna rimawi ring vak lo, pawlh tawk chiah, benga a’n ri vang vang mai chu, ngaihtuahna a pawt khawm a, suangtuahna chuan thil dang a ngaihtuah thei tawh lo. Rilru leh taksa chu a châwl hahdam, eng dang mah ka ngai tawh chuang lo. Theih ni se, mi zawng zawng hriat tura han herh rin chiam mai a châkawm. Duhthusam ram min thlentute hi a ni lawm mi kan zawn ṭhin.

Vawiinah chuan lungawina famkim nei thei turin engtin nge kan tih ang? Chan tâwka lungawi thiam zir ila, chumi nei thei tur chuan Pathian hnen aṭanga kan zir a ngai. Bible kha han chhiar mah the; i chhiar i chhiar chuan a tawpah lungawina chu i hmuh ka ring. Chuta ṭang chuan nun awmzia i zir chhuak ang a, Pathian mizia (duh dan) leh mihringte chungchang, lungawina kim i lo neih hnu chuan chan tâwka lungawina, taima taka thawk chung siin i lo nei thei ang. Vanglai nun ngaihawm takte chu a khat tawkin i nei ve leh mai thei. A rorel dan, a duan dan tih i hriat chuan lungawi takin kum za dam tur angin hna i thawk ang a, naktuka thi mai tur angin i ṭawngṭai theih ka beisei.

- Lalchhandama Colney, Ph 9862982321