FIMKHUR HUN TAK A NI

Oct ni 16-ah khan, inkhawm chhâwk ṭan theih ni mai tawha ringin rawtna ka ziak a. A hnu kár khat chhunga hri darh chhoh dan en hian (khaw lianah chuan) a la hun hrih lo mai ni lovin inkhung leh invèn a ṭul lehzual ta zawk niin a lang.

Thawh Khatna: Pawn lam aṭanga kan dawn, hri léng kan paltlang a.

Thawh hnihna: Hnu chhui theih chin kan han paltlang leh deuh duak a. Ram pumah a tlakhniam ṭan deuh bakah, kan state hian kan thihpui lo bawk a, a ziaawm chho turah ngaiin, biak-in leh zirna inte pawh hawn ṭan theih mai turah kan ngai hman a.

Thawh Thumna: Mahse, hri kàina hriat loh leh hnu chhui theih loh, a thawh thumna chuan min nang ta tlat mai a. Inchhui sèn loh khawpin kan zingah a darh ṭan ta tihna a ni. 

Kan ngaihdan dik tawh lo, kan tawnhriat aṭanga  lo langte chu:

Ngaihdan 1: Kum naupang lam tan a hlauhawm lo

Thutak: Hri vei zingah kum naupang lam, dam chhuak mai lo an awm ṭan.

Ngaihdan 2: Kan tuar na vak hlei nem. Kan rama hri leng hi a dal bik a nih loh vek chuan kan do hneh bîk a ni.

Thutak: Dam leh an tam rualin thihpui kan awm ṭan. Mizo nih vangin kan do hneh bik ta chuang lo va, kan rama virus léng hi a nêp bîk chuang lo tih kan hre ṭan mek.

Ngaihdan 3: Hri danna (vaccine) kan dawng ṭêp a, Krismas hmain kan fel duak ang.

Thutak: 1. Sorkar laipuiin min tiam ang hunah kan dawn hman loh a rinawm zawk.

2. Kan indaih nghal dawn lo.

3. Vawn ṭhatna siam leh sem darh a hautak, hun a duh ang.

4. Hri la kai lo chauh a veng thei, hri kai tawh a veng thei lo. Vaccine a awm tih hriat hnua dawng hman si lova thihpui hi thil awm thei a ni dawn.

Khaikhawmna: Sorkarin min kharkhip loh pawha mahni thua inkhung a ṭul ber hun kan thleng ta tak zet tihna ni zawkin a lang.