Kan nu Mizoram

Tun hma aṭang tawhin kan nu Mizoram hian kan mamawh engkim min pe a; boruak thianghlim tak te, tuihna tam takte min pe a. A chhunga cheng ramsa leh mihringte tan ei tur chi tinreng min chhuahsak a, ramngaw ṭha pui puite an awm bawk a; chungte chuan kan mamawh engkim kan lamna a ni. Ei tur kan thar ṭhat theihna turin lei ṭha min chhuahsak a, kan nu Mizoram hi min hmangaih bertu a ni.

Chutiang khawpa min hmangaiha min duattu kan nu Mizoram hi a chhunga cheng mihringte hian kan tichhe zo ta. A chhunga cheng duat taka a lo enkawlte chu kan that rêm zo va, a thi bâng tlemtê la awmte chuan ramngaw awm chhunte chu khawhar takin an lo nghak mek a ni.

Mihringte leh ramsate enkawlna atana lo awm ramngaw kan tihchereu avangin kan ram hian boruak thianghlim te, tuihna thianghlim leh hnianghnar min pe thei ta lo.

Kan mamawhna zâwn nia kan hriatah chuan lei kan laih hnan vak zel a, leivûng pawh mahni duhna lai laiah kan paih bawk a. Motor kawng sialnate chuan ramngaw hring dup maite chu a tichhe zo va, an lang râng riai ruai ta mai. Hengte hian leimin a siam bakah, leivungte chuan lui kawrte chu a hnawh nasa a, luia nungcha awmte chu an thi zo ta a ni. Kan nu–kan ram hian a va han tuar nasa tak em!

Hnam ṭhenkhat chuan ram nghet chenna leh hawna tur pawh an neih loh laiin, keini erawh chuan Mizoram hi kan ram kan neih chhun a ni. Khawvel tawpah pawh va zinin va awm mah ila, a tawpah chuan kan ram kan neih chhunah hian kan kir a, kan haw leh ṭhin.

Hnam bo kan nih lohna turin min humtu kan ram hi hmangaih taka kan duat let a hun ta hle mai. Kan nu Mizoram hminga ṭanpuina lo kalte chu dik tak leh rinawm takin kan ram tan bul ṭanna ṭhaah kan luhpui a hun ta a ni.

Diknain Zoram hi chawi sang ru,

Hmangaihna leh Zonunmawi nen,

I duat ang u, kan nu Mizoram hi.

- H. Neihchungnunga, Durtlang