Budget Thlirna-I : Revenue Expenditure

Kum 2025-26 chhunga Mizoram budget tur cheng vbc. 15,198.76 chu pharh a ni ta a; a ṭhat leh ṭhat loh lamah chuan thlir duh dan azirin ngaihdan a inang lo viau ang. Mithiam zawkte thusawi ka ngaihthlak aṭangin budget ṭha tak tia sawi tur chu ni loin ka hria a, budget chhe taka chhuah erawh a dik chuang hauh lo ang.

Kei chuan budget pharh a nih reng rengin sorkar hnathawk hlawh, pension hlawh, sorkar inrelbawlna, medical reimbursement, etc. (Revenue Expenditure) leh hmasawnna hnathawhna tur (Capital Expenditure) hi ka ngaihven hmasa ber zel. Kan budget hi Revenue Expenditure leh Capital Expenditure-ah ṭhen hlawk theih a ni a, Mizoram mipui aṭanga chhuta 10% pawh tling mang lo turte chan pual bik tura sawi theih Revenue Expenditure hian kan budget pumpui aṭanga chhutin hniam lam pan zel se tih hi ka duhthusam a ni. Chutiang budget a nih chuan thil dang chu eng pawh lo ni se, kei chuan budget ṭhaah ka ngai ngei ang.

Tun ṭum budget pharh tur ka nghahhlelh em emna chhan pakhat chu, ZPM kaihhruai sorkarin anmahni puala budget an pharh hmasak berah inrenchem kum (year of consolidation) an puan hian Revenue Expenditure lamah a ṭha zawnga nghawng a neih ngei ka rin vang a ni. Kan budget hman mek 2024-25 budget-ah hian Revenue Expenditure chu 82.97% a ni a, kan budget thar turah erawh 82.51% (cheng vbc. 12,540.20) a ni thung. Kum kal mek ai chuan budget tharah a hniam ngei mai, mahse, ka beisei angin year of consolidation hian Revenue Expenditure-ah nghawng a nei lian lem lo. Chuvangin, kei chuan kan budget thar tur hi budget ṭha taka sawi har ka ti lo thei lo.

Sorkar hnathawk awm tawh sate leh pension hlawh late hi chu an hlawh pek chhunzawm zel hi sorkarin a bat a nih avangin hengah hi chuan Revenue Expenditure tihhniam a har ang. Chutihrual erawh chuan, year of consolidation puan a nih laia ruling party apiangin an duhsak zawng an ruatna ni maia ngaih theih board hrang hrang chairman hlawh tihpun leh staff eng emaw zat leh hamṭhatna dang mamawh Adviser to CM neih ṭeuhte hi Revenue Expenditure hniam hleih theih loh chhan zingah a tel ve theiin a rinawm. A chhan lian ber erawh a ni lo ang. Mipui thlan chhuahte erawh kei chuan ka ngai pawimawh a, corporator leh councillor-te hlawh tihpun chu ṭha ka ti, a hmaa an hlawh ringawt kha chu a tlem lua deuh. VC leh LC-te lawmman pawh tihpun deuh theih ni se ka duhpui ngawt mai.

Keini ang state thawh chhuah nei tlem tan chuan tu pawh sorkar se Revenue Expenditure hi a hniam lutuk thei lo hrim hrim a; chuti chung chuan tun ang em em lo deuh hi chuan mithiam zawkte hi an huaisen chuan a tih theih ka ring tlat. Kan budget pumpui aṭanga 80% chuang em em hi chu a sang lua deuh a ni; 70% velah tal tihhniam theih se kan ramin hma a va sawn phah dawn tak em.

Office expenditure-te hi tun aia tlem hi dah ni se, buai miah loin sorkar hian hna a thawk theiin ka ring tlat. Petrol/diesel man ringawtah pawh strict zawkin kal ni se, sum eng emaw zat kan hum theiin a rinawm.

Sorkar hnathawk ho hian indaih lo an inti a, buai an inti tlangpui hlawm. Chutihrualin, an office-ah hian kal ila, an buaina em em hmuh tur awm lo office in tawng ve ṭhin thoin ka ring. Chhiatni leh ṭhatniah pawh sorkar hnathawk hmuh tur an tam ṭhin viau mai. Hengte ngaihtuah hi chuan an buai tawk lo em aw a tih theih. Chutihrual erawh chuan, sorkar hnathawk buai tak tak, thawk rim tak tak eng emaw zat an awm tih erawh hriat hmaih chi a ni lo.

Hetiang lam kan sawi vakna chhan pawh sorkar hian hnathawk tur a lak dawnin ngaihtuahna fim tak hmang se a duhawm tak zetin ka hria. A nghet lo tur pawh ni se, party worker-te leh chhungte thun duh vang mai maiin thawktu tur lak thar kan ram dinhmunin a tlin lo. Uluk taka ngaihtuahna sen a, ṭul tawpah lo chuan sorkar hnathawk lak loh hi kan Revenue Expenditure thlirin kan mamawh tak zet a ni. Tin, tunlai khawvel thiamnate hmang ṭangkaia mihring mamawh tam lo zawnga hnathawh dan ngaihtuah chho zel a pawimawh tak zet.

Privatisation lamte pawh hi huaisen taka sorkarin a kalpui a ṭul tak zet zetin ka hria. Thawktu awm sate chu sem rual mai theih a ni dawn (privatisation loh department-ah). Chu chuan thawktu lak kawngah nasa takin sorkar a chhawk zângkhai bakah, sorkarin sum a hlohna tam tak humhim theih a ni dawn. Privatisation hnuaiah chuan mipuite'n sum kan lo chawi hnem deuh hret a nih pawhin service mumal leh ṭha zawk kan dawng thei ngeiin a rinawm. Privatisation uar lehzual tur chuan sorkar a huaisen viau erawh a ngai ang.

Revenue Expenditure a san dawn chuan keini ang thawh chhuah nei tlem state-ah chuan mipui pawhin kan tawrh vena chin a awm dawn. A chhan chu pawisa kan chawi a pung ve deuh a ngai ngei ang. Chutihrualin, mipui hian chhiah chawi ngawr ngawr hi kan hreh loin ka hria, a pek dan awlsamin, service kan hmuh ṭhat phah dawn a nih chuan kawng hrang hrangah tun aia tam kan pe hreh hlawm loin ka ring. Tin, chhiah tling khawm hman a nihna hian mipuiah nghawng nei ngei se chuan chhiah pek hi kan hreh lo lehzualin a rinawm.

ZPM kaihhruai sorkarin ration card var tan buhfai man a tito a, petrol leh diesel-ah cess chi hnih a la. An thutlukna hi eng pawh ni se, sorkarin thutlukna a siam tawhah nawrna awm avanga sorkar a hnung tawlh lo hi ka lawm. Sorkar chuan ram leh hnam tana ṭha ber tura uluk takin a ngaihtuah tur a ni a, chumi hnua thutlukna a siam tawhah chuan nawrna awm avanga hnung tawlh tawh loh hi sorkar kalphung turah ka ngai. Kan aiawha roreltute an ni miau a.

Chutihrualin, petrol leh diesel aṭanga cess lakte pawh hi a hmanna dik tak, chhiah pe khawmtu mipuite min hrilh zel hi sorkar bat veah ka ngai. A hmanna a ṭhat phawt chuan mipui hian sorkar hi kan fak phah zawk ngeiin ka ring. Kawlphetha man chu an term chhunga tihpun loh an intiam avangin an tidanglam lo turah ngai ila, tui bill-te hi mi rethei ber leh hausa berte'n litre khat zela kan chawi zat a inangte hi kan ram dinhmun thlirin ennawn a hun tawh viau lo maw?

Revenue Expendtiture

Kum Percentage

2019-20 78.50

2020-21 84.20

2021-22 82.67

2022-23 71.43

2023-24 78.10

2024-25 82.97

2025-26 82.51

- Malsawmdawngzela Hrahsel