Lalmanga Nu vs June ni 21

Mi hre zau zawkten June ni 21 hi kum khat chhunga ni rei ber ni an tih avangin a nawlpui hi chuan eng ang chen taka rei bik nge a nih pawh ngaihtuah lem loin kan ni rei ber ni hman chawm mai a nih hi!

ZONET cable TV hian accuweather.com aṭanga la chhawngin ni rei zawng nitin a tichhuak a, a hnuaia hi ni 15 chhung record ka rawn tarlang e.

A chunga tarlan aṭang khi chuan ni 11 chhung chu (18.6.2015 & 28.6.2015) darkar 13 leh minute 36 chhung khua a eng a, June ni 21 chu ni rei ber ni niin a lang bik chuang lo. A inrei hleihna second lek lek a ni ang e han ti dawn ila, ni 30.6.2015 aṭanga 3.7.2015 (ni 4) chhung lek hian minute khat a kal leh hman si!
Lalmanga nu te ang hunah kha chuan ziak leh chhiar pawh an la thiam si lo. A fing bik a ni ang tiin Sun dial a siam a ni ang te han ti ila, second/ minute leka inrei hleih hriatna khawp tur Sun dial a siam thiam a rinawm si lo. Chu bakah Sun dial chu ni a lan loh chuan a hman tlak awm si lo. Mi tam tak hian kan dah fing em em a - June ni 21 chu 'Lalmanga nu lawm rawih ni' kan ti hial a. Ṭhenkhatin "Lalmanga nu hlawh rawih ni" an lo ti bawk a (Hlawhfa tih hleih loh hlawh te rawih theih ngai emaw ni?).
Pi leh pute khan thla hi thla fang det aṭanga chhiarin Pawl Kut thla, Ram tuk thla tiin an chhiar a. Keini January/ February nen hian a inkhuang rual thlap thlap thei lo.
Entir nan 24.12.2014 khan thla a det avangin Pawl Kut thla de ni ngei tur a ni. Chuti a nih chuan Nikir thla chu 20.6.2015 ah a de a, chu thla de chu 16.7.2015 ah a mang a ni. Chuvangin, Nikir thla hi May thla chawhnu lam aṭanga July thla chawhma lam (May ni 16 - July ni 15) - ni 60 vel chhungah hian a tawlh kual ṭhin ni awm tak a ni.
Pawl Kut thla chu December ni 24 a de ni loin January 2015 a de tur a ni han ti ila, January ni 24-ah thla hmasa ber a det chauh avangin June ni 20 a thla de chu thla 5-na chauh a ni leh si. Chuvangin, kumin Nikir thla chu 19/7 - 17/8 a nih a ṭul ta tlat a ni. Tichuan, ni 24.12.2014 thla de chu Mizo chhiar dana thla hmasa ber, Pawl Kut thla a ni ngei tih a rin theih ta a ni.
Hetia ka thiam ang tawk tawka ka chhut aṭang hian June ni 21 hi kum khat chhunga ni rei ber ni a nih kan rin hriat avangin 'Lalmanga Nu lawm rawih ni' tiin kan sawi let sak ta rawk mai a nih ka ring hial mai. Lalmanga Nu hi nu fing te pawh ni se June ni 21 hi ni rei ni ber a ni tih a hriat dan tur ka chhut sak thiam ve ngang lo.
Kum 1940 a kum 80 mi nia min thihsan ta ka pute kha chuan 'Lalmanga nu lawm rawih thla' tiin an sawi ṭhin. Lalmanga nu pawh hian May - June - July chhunga thla eng hi ni rei lai ber thla a ni tih a hria a nih ka ring ta ber mai - lo chhut ve mah teh.