Zu aiin corruption zawk le!

Zu aia kan do zawk tur leh a bo theihna tura kan beih nasat zawk tur chu corruption hi a ni. Retheite chan ai laksaktu, ram hmasawnna tur daltu, hlawh phu loa in leh lo ṭha nei thei, kan moral tichhe mektute hi zu ni loin eirukna hi a ni.

Zu kan duh lohzia kan lantir nasat ang hian corruption hi kan do lo a, kan huatzia kan lantir tlat lo. NGO's pawl tam zawk leh kohhrante pawh hian zu zuar thawhlawm dawn kan iai em em laiin corruption pawisa erawh kan dawng hreh der si lo. A eiru tih hriat ngawih ngawihte hi kohhrana an nihna hlihsak kan neiin phuar kan nei tawh reng em, eng kohhran pawh hian?

Tangka sum ngainat hi sual tin reng bul a ni tih Bible-ah kan hmu a, enga ti nge sual tin reng bul tangka sum ngainatna sual eirukna (corruption) hi tihtak zeta kan do miah loh?

Eirukna vangin kan kawngpui a chhe hma a, sawrkar project tam tak a hlamzuih bawk a, ramin hma a sawn loh phah fo asin. Ram intodelh kan lo nih theih nan te, mitinin kan chanvo tur ṭheuh kan dawn theih nante lungrual takin zu ni loin corruption hi i do zawk teh ang u. Zu do ai chuan kan ṭhatpui zawk ngei bawk ang. Tunah hian do loh tur zawk kan do a ni mai lo maw?

Eirute thawhlawm kan dawn loh avangin kohhran hi a tluchhe ngai dawn lo a, a pachhiat phah hek lo ang. Kohhran hian biak in mawi tak tak a sak loh phah chuang lo ang a, missionary a tirhchhuah theih loh phah hek lo ang. Kohhran sawmapakhatin a tawrh phah lutuk chuang hek lo ang a, kohhranin a neih duh ang thilte a neih loh phah chuang hek lo ang a, kohhran member a kiam chuangin a rinawm lo bawk.

Do loh tur zawk doa kan hmanhlelhna hian rah ṭha chhuah ai, nghawng chhe zawk a dotuteah a thlen palh ang tih kei zawng ka hlau ru tlat. Retheite retheih leh zualna thlentu eirukna hi zu ai hian i do zawk ang u hmiang. Do tur dik do hi kan Pathian duhdan ber pawh a nih a rinawm.