Ringlo ring zawk

Ni 17 Vanglaini chhuaka "Ringlo kan ring zawk" tih thupui hmanga Pu R. Vanlalzaua ziak kha, a ṭhahnemngaihna kha a fakawm a. Amaherawhchu, a ṭang ulh deuh niin ka hria a, tlem a han thawi ve hlek ka duh a ni.

Thil han inthlak vut vut tur chuan a hmaa kan rilrua intuh hmasa hi tihdanglam a ngai ṭhin a, hun hian a la rawn hrilhfiah zel mai dawn a ni. In ring tawn tur chuan rin tlak kan nihzia a lan chian hunah a lo danglam ve dawn a ni.

Chhiatni ṭhatni a kan in enkawlna hi chu tlawmngaihna thil a ni a, mistiri a ruai duh lotu pawh khan a rawih duhloha kha ṭanpui ngaia a awmin a phatsan bik hauh lo ang tih ring ila. Sum leh paia in chhawrna te, hlawh neia in rawihna nen chuan sawi fih loh a ṭha ang; rinna hi a ringtuah ni loin a rina-ah a innghat si a. Sakhuana a in mu leh ar te pawh khawhar inah chuan kan sawi tlang dial dial ṭhin a nih hi.

A mak khawp mai, ringlo kan ring zawk tlat mai hi! A ni tak a, ring tih hi chu nunpui, innghat tihna a ni ber ang chu. Ringlo kan ti thla zen a, anmahni chuan ringlo an inti hauh awm si lo a! Tunhma deuh aṭang khan tirhchhiahah te, dawr nghakah te, ina awmpui turte hian hnamdang hi an thlang zawk zel a, tuna ringlo kan ring zawk titu ngei pawh hi, dawrkai hausate zawta vai emaw hnamdang an duh zawkna chhan chu hretu a lo ni tawh a.

Mizote aia vai an hman duh zawk emaw vaiin hna an thawk ṭha zawk emaw a nih ngat chuan Mizo aiin vaiin rin an nei ṭha zawk tihna a va ni mai awm ve. Chuti ni se ring tih hi engnge a awmzia ni ta ang - kan nunpui si loh chuan. Isua chauh hi Pathian a ni a, a ringtu chu Mizote hi ni ta si ila, nitin kan hnathawha kan rinna a lan si loh chuan kan rina chu kan va ti hrilhhai dawn em. Miin chhawr tlaka min rin loh zawk chuan in enfiah a va ngai nasa dawn em! Tunah hian training chhuak mistiri mi tam tak chhawrtlak an awm tawh niin kan lo hria a, a lawmawm takzet a ni. Chhawr tlaka siamtute phei chu an fakawm lehzual.

Khawzawl khuaah te chuan hnamdang mistiri an ruai duh vak tawh lo a, Mizoho an thawk suau suau mai, hmuh an nuam khawp mai. Hei hi hriat ve fo a ṭha, Mizote hian mi hnuaia hnathawh hi kan thiam lo fo ṭhin. YMA, MHIP, Upa Pawl leh Kohhrana awm kan thiam laiin, sum leh pai tela hnathawhho hi kan thiam lo fo mai. Cooperative Society pawh a ṭha viau a, a rei deuh hian tlak hniam lam kan pan leh mai ṭhin. A hlawhtlingte chu chhungkuaa society dinte hi an ni duh viau.

Kan ramah corporation eng emaw zat a awm tawh a, dinchhuah lam aiin tlak hniam lam kan pan deuh vek a ni. Chuvang chu nge ni, kan corporation te hian hmun danga mimalin an zawrh ṭhin a senchi zawrh hnate an thawh tak hial ni.

A chhan dang han zawng leh ila. Mizote hi mahni inringtawk tak hnam kan ni. Kum za liam ta mai aṭang khan keimahni aia rin kan nei ta tlat mai a, 'a zo ṭiah ṭiah' tih te chu thil ṭhing lam sawi nan kan hmang ta fo mai. 'A sap zaih mai' tih chu thil ṭha lam sawi nan kan hmang leh daih ṭhin a nih hi - he rilru hi kan thlak a hun ta khawp mai.

Ral lu la ṭhin ṭheuh ṭheuh 'Mi lu la hnam' intih bikte hi bansan ila. 'Ṭhian chhan thih ngam hnam' hnam huaisen, tlawmngai hnam tih te hi kan rilruah lian tawh zawk rawh se. Chutianga kan rilru kan thlak theih phawt chuan Mizote hian Mizote hi kan la ruai duh em em ang. Kan ṭhiante Israel ram kal chuan Israel te tih dan an sawiah chuan dawr inang rengah pawh "Hnamdang hi chu dawr suh u, an thil zawrh hi a lem vek a ni," an ti duh a ni. Chutiang ni ve thei tur chuan kan rilru kan siam a ngai khawp mai.

Amaherawhchu, tuna mistiri zir chhuak te u, beidawng reng reng suh u. Tun hma deuh khan in hma lawkah Mizote chhawr nuam vak lo an lo awm tawh ṭhin a ni mai thei, pute thu thua awm peih lo deuhte an lo awm a nih chuan chu mi sawhkhawk chu in tuar rih a ni maithei. Mahse vawi khat in thawh tawhnaa rawih zui tlaka an hmuh che u chuan in awl rei miah lo ang. Thawh thiam viau a pawimawh rualin thawhho thiam hi a pawimawh hle. Ṭhangtharte hi kan in rintawnna tura hma hruaitu in nih theih ka beisei.

Chhiatni ṭhatnia kan rilru put ang hian sum lama han thawhhonaah pawh hian rilru pu thei ila, Mizo nih vangin tumah hnawl an ni lo ang. Chumi kawng siam ṭha tur chuan in pawimawh takzet a ni. In zirna te, in thiamna te, kan ram tan leh in rin Pathian leh nangmahni tan a ṭangkai zel turin duhsakna ka hlan a che u.