Mahni hmasialna designation plate

Chief Secretary-in, "Chief Secretary ka nihna hi ka motor-a tarlan kher a ngai lo e. Kawngpuia ka veivahnaa ka nihna an hriat zel hi thil ṭul lo tak a ni e," tih rilru pu chungin a designation plate a hlip thla ngam a, a ropui ka tih nen officer dang designation plate dah ngam ka zui lo hi mak ka tiin an zahpuiawm ka tih thu hi ṭawngkam hriam hrek hrawka ziah ka duh a ni.

Designation plate vuah ṭhatna an han ziak ta thluah thluah a, an ziah hi ka pawm theih tam tak awm mahse keia zawhna ve chu, "Designation plate pawhthlak ruala zahawmna nei lo ang mai tura inngai officer chu a hnathawhah ni loin a nihnaah a zahawmna a awm tihna a ni a, miin a nihna inziak an hmuh loh chuan an zah lo a nih chuan a zahawm lo mai ni lovin a zahpuiawm hle a ni dawn lo'm ni?" tih hi a ni daih a ni.

Ngaih theih loh deuh ka neih chu mipui vantlang kawngpuiah an tlan a, an office-a an nihna an tar lang vu vu mai a, a zahthlak ka ti. Zahthlak ka tih chhan chu India ram khawpui lian hi ka zin ve deuh vek tawh a, an VIP leh VVIP ni lo hi chuan an office-a nihna hi an ziak mang lo. Ka hmuh lohah inziak chu a awm ve tho ang a, mah se mipui nuai 10 vel awmna ram Mizoram anga inziak tar tuarh hi chu hmuh tur a awm lo chu a nih hi mawle ka unau!

Chu chu hriain India ram khawpui liana thawk tawh, IAS pachal, Mizoram Chief Secretary ni phak ngat chuan, "Kei chu a zahthlak ka ti. I pawtthla vek ang u," tih rilru puin a designation plate chu a pawtthla ta rup mai. A hnuaia miin lo la vuah vu vu hi a zah pawh hi an zak lo em ni aw? tihte hi ka zawhna chu a ni.

Chief Secretary ber pawhin ṭul lo a tih hi officer tenau zawkte hian ṭul lo ti ngam ve mai teh u, mahni hmasialna mai mai a ni in designation plate hi. A ṭhen chuan an nuih ru tawh che u a nia.