Kawngpui ningkhâwng (Traffic rules–signal chungchang)
* Kawng pêngṭhuam i thlen dawnin i kal/pên duhna lam chiang taka signal pein mi dangte hriattir ṭhin ang che.
* Police control-na hmun pengṭhuamah chuan i kal duhna lam signal i pek bakah, police signal ngaichâng la, zâwm ṭhin ang che.
* Signal hi pengṭhuam thlen hma metre 20 velah emaw, motor tlan chak theih lai leh tlan chakna hmunah chuan motor speed azirin metre 50-100 aia hla aṭanga pek ṭan pawh a ṭul ṭhin.
* Signal hi mahni kalna lam tur leh nêk lam tur hriattir nan chauh hman tur a ni a, min tlan pêl rawh tih nan hman tur a ni lo. Hnunga tlan pelh diltu chein i signal hmu lova an pelh mai ngam loh che chuan, a theih anga veilam nêk chungin indicator veilam tihênsak la, thlamuang takin a pêl thei ang che.
* Hmaa mite tlan pelh dawnin signal emaw, horn pein emaw dil phawt a, i pelh turte’n i pêl duh tih an hriat a, signal an pek che hnuah a himah chauh pêl ṭhin ang che. Kawng kual laiah mi tlan pêl suh.
* Min pêl rawh tih nan i indicator dinglam tiêng suh. Chutianga i tih chuan signal dik lo a nih avangin dân hriate i tibuai (confuse) ṭhin.
* Police control lohna hmunah, kawng tê zawk aṭanga kawngpuia i luh dawnin i kalna lam tur signal pein kawngpui dunga tlan laite ngaichâng phawt la, tibuai lovin, a him hunah chauh lut ṭhin ang che.
* Kawngpui aṭanga i pên dawnin i kianga mite’n i tih tur an hriat theih nan i pênna tur i thlen hma deuh aṭangin i pênna lam tur chiang taka signal pein pêng ṭhin ang che.
* I signal pek chu mi dangin an hmuha an zawm (re-act) hmain nangmahin bawhzui nghal thut suh. Mi dangin i signal an hmuha an zawmsak che hnuah chauh chêt la ṭhin ang che. Signal pek leh chêt lak i rual mai chuan mi dang an inrin hman loh avangin accident a thlen phah ṭhin. Chutiang avanga accident a thlen chuan i thiam loh a ni ang. I signal chuan a chhan thei lo ang che.
* Signal reng reng hi mi dangte hmuh leh zawm atana pek a ni a, mi dangin i tih tur an hriat sa loh avangin signal i pek rual rualin an zawmsak nghal thei lo che tih hre reng rawh.
- PC Hmangaihzauva