Zirtirtu ngawichawi vai mistiri hnuaia inhlawhfa ka hmu

Kan ṭhenawm maiah hian Mizo tlangval, vai hnuaia inhlawhfa ka hmu a. An hnathawk chawlh laiin kan be zawk a, zirtirtu (teacher) a lo ni reng mai a. Zirtirtu inhlawhfa ka hmu chu a mak ka ti hle a. Kan zawt zau deuh a, an thawhpui thingtlang lama khawsa ho phei chuan Krismas bazarna tur pawh meihawl rawhin an intuak tihte min hrilh ta deuh deuh a. Hreh tak chungin an hlawh ka zawt a; a lo tlem em em mai hi a lo ni a. Ka ngaihtuah loh lam a nih vang nge mak ka tih a zual ta deuh deuh a.

Eng emaw ti lai khan kan sawrkar thar hian zirtirtu ṭhahnem tak a bàn (terminate) ni khan ka hria a, mahse, sawrkar liam tain zirtirtu a lak, sawrkar tharin a ban (terminate) ve reng reng loh an awm thu te, chu'ngte chu vawiina zirtirtu cement chawka vai hnuaia inhlawh ka hmuhte hi an lo ni tihte ka hriat phah ta zel a. Anni hian media-ah pawh voice nei lovin an hnaah buai em emin an lo bung ṭhin tihte ka hre thar a. SSA teacher tih te, CSS teacher tihte hi chu media-ah hian kan lo hre ṭhin a. Mi fel leh taima tak tak an ni ngei ang ka ti ṭhin.

Hetih lai hian media-a hming kan hriat tam loh tak, mi 800 chuang an bàn vek emaw tia kan lo ralkhat hriat kha kan sawrkar thar hian a lo bàn reng reng lo. Kan ṭhenawm naute kalna school-ah pawh an thawk a, an school-in hma a sawn nasatzia leh zirlai an pun nasatzia ka hriat hnuin chu'ng ho chu tute nge, tiin belh chian ka chak ta riau mai a. A zawh theih theih ka zawt a, RTI-te pawh ka hmang ṭangkai ve chhin ta a. Kan RTI pawh a lo ṭha narawh e. Anni ka sawi hmain sawrkarin a ban (terminate) takte kha tute nge tih i sawi hmasa teh ang.

MNF ministry khan an flagship programme a hlawhtlinna turin indaih lohna hmunah SEDP teacher a la ṭeuh mai a. A lak dan pawh DPC through lo, party unit hruaitute duh ang zawng zawng kha an la tam ber a ni mai a ngem aw a tih theih. ZPM ministry a lo piang a, policy hrang hlak nei an ni a, MNF flagship programme kha an chhunzawm kher kher kha an ba lo ve bawk a. SEDP teacher-te kha an thawh zawmtir ta lo va. Hetah hian sawrkar thar demna tur a awm hauh lo.

Kan thupuiah i lut dawn teh ang. Sawrkar thar lo piang pawhin a khawih chet ve miah loh MNF ministry piang hlim mo thar tha zâ an neih laia zirtirtu an lak, media-a inlar ngai lem lo ṭhahnem tak, Zoram zirna (elementary education) chawi kâng dawrhtu an awm a, anni hi a ni ka sawi châk chu – heng ho hi MR teacher tia hriat an ni.

MR TEACHER LAK DAN KHA

Mizoram zirna elementary stage-ah khan zirtirtu post ruak sang khat dawn a awm a. Khawtlangin an rawih te, MLA-in an hlawh aṭanga zirtirtu an rawihsak thute hmun tam takah sawi tur a awm. Indian National Congress (INC) ministry khan NLUP an sem nasa a, post ruak a hnawhkhat hman ta lo a ang ber mai. Kum 2019 khan zirtirtu, a nghet lovin mi 800 chuang MNF ministry khan a la a. Eng vangin nge MPSC a laktir loh tiin zawhna a kal nghal. A chhanna lo lang nghal pakhat a awm. MPSC-in zirtirtu 152 lakte kha Congress sorkar khan July 2017-ah Cabinet-in a phalna a pe a; MPSC-ah October 2017 velah hna lak phalna, la tura hriattirna an pe. Kum 2018 June/July thla velah written test an buatsaih a, February 2019-ah written test result a chhuak a ni. Zirtirtu 150 vel la turin kum 2 chhung deuh thaw an hmang a ni tih Mizoram Assembly budget session (2019)-ah khan sawi chhuah a nih kha. Zirtirtu 800 chuang la turin engtia rei nge hun a duh ang le? Hei vang hian MR teacher tih hming a rawn piang ta ni berin a lang. A thuhrimah, MPSC-in a lak tam tak hi an post-ah rei awm duh lovin, chhuanlam chi hrang hrang nen transfer an dil a; thingtlang kilkhawrah post a ruak leh mai ṭhin. MR teacher an lak dan kha a khaw mi an awm chuan lak tur, an awm loh pawhin a hnaih bertu khuaa mi dil an awm chuan lak tur tih kha a lo ni a; a ṭha phian niin a lang.

RTE Act-in a phût chu zirtirtu atana lak tur chu train chhuak bakah TET (Teacher Eligibility Test) pass-te an ni tur a ni a. Kha tih hun lai (2019) khan Mizoramah TET nei tawh chin kha primary school level-ah mi 1,510, middle school bik chauh nei 1,090, a pahniha nei kawp mi 752 an ni. An vaiin TET nei tawh mi 4,109 an awm tia sawi theih a nih laiin, a tak takah chuan chuan TET nei mi 3,352 an ni. Mahse, kha'ng TET neite kha zirtirtu thawk lai regular tam tak an awm a, SSA, RMSA-a thawk tam tak an awm a, sumdawng ta daihte tam tak an awm ni awm tak a ni. Kum 2019-ah khan zirtirtu ni duh, Employment Exchange-ah TET nei hna zawng lai mi 149 chiah zuk awm a maw le.

RTE Act 2009 Section 23(2)-ka google fuh hlauh va, ‘The Right of Children to Free and Compulsory Education Act, 2009, where a state does not have adequate institutions offering courses or training in teacher education, or teachers possessing minimum qualifications as laid down under sub-section(1) are not available in sufficient numbers, the Central Government may, if it deems necessary, by notification, relax the minimum qualifications required for appointment as a teacher, for such period, not exceeding five years, as may be specified in that notification; Provided that a teacher who, at the commencement of this Act, does not possess minimum qualifications within a period of five years.’ Mamawhna a san em em laia danin a phût qualified candidate state-in a neih zawh loh chuan kum 5 aia rei lo ngaihnathiam theih a ni tihna a ni ber ang. Hei hi a ni ngei ang tiin kum 2019 Council of Minister Meeting (22 April 2019)-in MR teacher a lak ho kha MTET nei lo pawhin he hna hi dil theih (five years relaxation siamin), kum 5 chhunga MTET nei lote’n nei vek tura an tihna chhan kha tiin ka ngaihtuah.

AN SERVICE KA THLIR A

Sawrkar tharin a bân ve loh, duat taka a enkawl mek zirtirtu ngawichawiho hi an dinhmun (service) ka hmuh dan sawi chhuahsak ka chak hle a. Zirtirtu hi dinhmun sang tak, sawrkarah pawh group B employee an ni. Chutih mek laiin group B ni si, muster roll-a chhawr an ni. Sawrkara MR dangho chu provisional employee (PE)-ah kaisantir vek an ni tawh. MR teacher ho hi PE-ah an kaisang ve thei lo. PE chu group C leh D tana siam a ni a, MR Regularisation Act-in a huam ve thei lo. He MR Regularisation Act hi group B tan a ni ve lo. (Vide No.F.12015/1/2019-POL). Kum 2019-ah group B MR-a awmte contract basis-a let (convert) vek tawh tura dan leh thuchhuah a ni tawh a (The Mizoram Gazette No.A.12034/48/2018-P & AR; GSW of Dt. 4th March, 2020).

MR Skill-II level hlawh pein minimum wages rintir an ni. Minimum wages lah chu kum tin hlawh pun a awm ve si lo. Group B employee-in Skill-II level hlawh a la reng hi meihawl rawh nen lo chuan khawsak a harsa a nih pawhin a mawh lo ve.

Sawrkar tharin casual teacher fair takin a la a, MR teacher middle school-a thawkte aiin casual teacher lak thar M/S-a thawkte hi an hlawh a sang zawk leh ta nghal a. Chuti chung chuang MR teacher-te hian media-ah voice an nei lo va, an aia kum 5-a junior casual teacher-te kan hre lar leh tawh zawk.

Zirtirtu ni tur hian pass ngai a tam em em. Zirtirtu training pass chhuah mai a tawk tawh lo va, TET paltlang ngei ngei a ngai a, computer thiamna nei certificate neih a ngai bawk. Chuvangin, hetianga MR Skill 1/2-a dah mai mai lo hian an pay structure hi ngaihtuah ran a ngai a ni. A ngheta thawk (regular) leh contractual basis-a thawkte ang hian graduate leh under graduate-in an pay hi siamsak an hun hle mai. Kum 5 chuang an service tling tawh a, an phu hliah hliah a ni.

Zirtirtu, harsatna vanga inhlawh ngai khawpa chan chau ka hmuh hian ka awm mai mai thei lo. LESDE hnuaia minimum wages ringa hlawh pek reng chuan, nakin zelah zirnain a tuar leh mai awm mang e tiin ka ngaihtuah a. Kan sawrkar, thil ṭha tih duh tak, thil tam tak pawh siamṭha mek hian hmanhmawh taka an ngaihtuah a ngai a nih hi.

- Sangzeli Pa