Pathianin America (USA) a hrem ang em?

Tunlai hian Facebook leh Whatsapp lamah, USA Supreme Court-in neih inang (same sex) marriage a phal (legalised) tak avanga America ram pumpui chu Pathianin a hrem an rin thu an sawi nasa viau mai. Ṭhenkhat chuan Billy Graham-an “Pathianin USA (America) a hrem loh chuan Sodom leh Gomorra mite hnenah ngaihdam a dil a ngai ang” a ti tihte pawh an chhuah a; chubakah Billy Grahama fapain “Obama hian White House veng ṭha sela, a chungah ṭek danna dah belh rawh se, Pathianin ṭek a dentir dawn” a ti tihte pawh an ziak bawk.

Hemi avang hian Mizoram mipui tam tak chuan USA (America) chu kan hmu sakawlh nghal a, a denna tur lung kan lo chhar ve nghal mai niin a lang. USA hi an lar em avangin khawvelin engkimah kan thlir rawn a. Chuvang chuan neih inangte tana inneih phalna an han pe pawh hi ‘hetiang thil te hi khawvelah a thleng ta, khawvel tawp a inṭan ta’ kan ti luai luai mai a nih hi. USA hi neih inangte tana inneih remti ramte zinga a hmasa ber a ni hauh lo. Kan ngaih ang hian hrem tur ni ta se, khawvel sawrkar 18 lai Pathianin a hrem tawh ang. Khawvela neih inang te tana inneih phal hmasa bertu ram chu The Netherlands a ni a, April 1, 2001-ah khan inneihna hmasa ber pawh buatsaih a ni daih tawh. Chumi hnu aṭang chuan ram hrang hrangin an phal (legalised) ve leh ta a ni.

Belgium-in 2003 kumah an passed a, Spain leh Canada-in 2005-ah. South Africa-in 2006-ah, Norway leh Sweden-in 2009-ah. Portugal, Iceland leh Argentina ten 2010-ah, Denmark-in June 2012-ah an passed a. Hemi hma hian Denmark hian 1989-ah khan ‘Civil Partnership’ tiin an lo remti tawh a. April, 2013-ah Uruguay leh New Zealand ten an passed ve leh a, New Zealand hi Asia Pacific-ah neih inangte inneih phalsak hmasa ber a ni.

Kum 2013 April thla khan France sawrkar Upper House-in an passed a, tlem tidanglam hretin Lower House-in 2013-ah an passed ve leh a, France ramah neih inangte inneih chu phal a ni ta a ni. Brazil sawrkar chuan 2013-ah an passed ve leh a, amaherawhchu dan ang taka an inneih pawm a nih theihna tur chuan nupa pangngai ang takin in khatah an khawsa dun ngei tur a ni. United Kingdom pawhin 2013-ah an pawm a, July ni 18th 2013-ah Lalnu-in remtihna a pek aṭangin Dan anga inneih theih a ni ta a ni. Luxembourg sawrkar chuan 1994-ah partnership an remtihsak a, kum sawm hnu 2014-ah Luxembourg sawrkar Dan siamtuten pawmin bill chu a duh lam vote 4-a an chak avangin passed a ni ta a ni. Ireland sawrkar pawhin May 22, 2015-ah an pawm a, chung hnuah chuan USA Supreme Court chuan 26, June 2015 khan a lo passed ve ta a ni.

Hetiang hi khawvel sawrkar hrang hrangin an lo pawm tawh dan a ni a, USA telin sawrkar 19-in an pawm ta tihna a ni a, USA hi a 19-na a ni. USA (America) hi Pathianin he thil avang hian a hrem dawn a nih chuan heng 18-te hi a lo hrem hmasa tawh ngei ang. A hrim thuin mi an sualna avanga Pathianin hrem tura duhna hi Pathian rilru a ni lo tih Zoram Kristiante hian kan hriat a ṭha khawp mai. Pathian chu mi sual thihnaah hian a lawm ngai lo a, an nunnaah zawk a ni a lawm ni. Lalpa chuan “A nuna ka nun chhung chu, mi suaksual tihnaah hian lawmna reng ka nei lo va, mi suaksualin a awm dan a kalsan a, a nun hi ka lawmzawng a ni zawk....” a ti (Ezekiela 33:11).

Sodom leh Gomora Lalpan a hrem dawn khan Abrahaman a ngensak a, “Chu khuaah chuan mi fel sawm nga tal an awm mai thei asin, mi sualte nen i tihlum vek dawn em ni” a ti a, Lalpa chuan mi fel sawm nga an awm chuan khawpui chu ka zuah ang... sawm an awm pawhin ka zuah ang” a ti hial a nih kha. Mi felte avangin mi sualte pawh a zuah phah zawk ṭhin a ni.

Jerusalem a hrem dawn ṭum phei chuan Lalpan “Jerusalem chu ngun takin zawng teh u, mi fel pakhat tal an awm em, mi fel pakhat pawh in hmuh chuan Jerusalem chu ka zuah ang” a ti a nih kha (Jeremia 5: 1, 2). Chu chu Krista rilru chu a ni. ‘Keini zawngin Krista rilru kan pu a ni’ (1 Korinth 2:16) titute hi mi sual hremna tur thuah hian i phur viau teh suh ang u. Jona ang maia an simna tur thu hril te te a, Pathian hremna thleng tur nghaka ṭhuthmun rem sauh sauh hi kan lo ni ve mai palh ang e, i fimkhur ang u.

Lalpan a hrem lohna chhan tur mi fel eng zat nge America hian a neih? A neih tam tawk theih nan ṭawngṭaisak ila; Mizoramah ngei pawh thim thuah hnih emaw thuah thum emaw a thlen lohna chhan tur Lalpan mi fel eng zat nge a neih. Chung mi felte zinga chhiar chu ka ni ve ang em? tih hi i ngaihtuah zawk ang u.