Kelkang kal kher

June 30, 2015 Vanglaini chhuakah khan R.E Ralte khan a rawn ziak ṭha viau nain tlem han sawi fiah ve duh a, Kelkanga kal chak lo khawpin miin an lo chhiar palh ang tih te ka hlau rum rum mai.

Ni e, Thlarau hruai leh Thlaraua khat ni turin "Punkhawm tam a ṭul chuang lo a ni mai thei, tin, Delhi-ah khan ABC ropui deuh bik an zir chuang lo pawh a ni mai thei.

Bible-a kan hmuh dan chuan Namana phar natnain a bawm khah tlat mai kha Jordan lui ṭawp takah kher kher khan vawi sarih inchiah a ngai tlat. Jordan lui ni lo, lui thianghlim deuh leh nuam deuh pawh a awm ngei ang. Mahse Pathian thiltihtheihna lanna turin Jordan lui kher kher kha a ngai tlat. Chutiang bawkin Pathian chu khawiah pawh hmun tinah a awm a, Kelkangah lo pawh a awm nameuh mai. Mahse Kelkangah kher kher hian Pathian hnathawh a lang tlat si a nih hi.

Kohhrana kan rawngbawlna pang­ngaia harh chhuak zo tawh lo tam takin Kelkang an han kal a, theihtawpin Kelkanga hruaitute thu thuin an han awm a, an han ti bawk a, thuawihnain Kelkangah hun an hman zawh hnu­ah Pathianin an­mahniah hna a thawk a. Biakina inkhawm pangngaia kohhran upa te leh rawngbawltu pangngaite thu hrilha harh chhuak zo tawh loten Pathian hmingin ban an phar chhuak a, an lam a, a ropui thlawt a ni lawmi?

A kal ve lote pawh­in kal ve an chak phah a, tunlai ang huna Pathian hnathawh lo lang hi kei chuan ropui ka ti. Kelkang hi ka la kal ve miah lo naa kal ve pawh min ti chak khawp mai.

Kelkangah hi chuan ABC ropui bik deuh leh zirtirtu ropui bik deuh hnathawh chu chiang takin a lang a, Pathiana hlim ngai lo leh Pathian hminga ban phar chhuak ngai lote pawhin zah pawh sawi loin Pathian thlarau an dawn ang angin an lamin an su lawp lawp mai zawng a nih hi.

Hawh u Zoram mipui Kristian intite hian Kelkang harhna hi chhim vek i tum ang u hmiang.