Ram kâng pawizia

Khua a lo ṭhâl a, thlasik khaw vâwtin thing hnah a hmeh thlakte chu lei chung dâpin an inphah leh duai ta mai, han rap ila, a ri riap riap mai a. Khua a roin a lum leh em em tawh a, kângmei chhuah palh a hlauhawm hle a ni. Pangpar ṭhenkhat, ṭhâl lai chauha par ṭhinte pawh an par vul leh chûk tawh a, ‘Kan tlang ram par vulna, ṭhâl khua eng riai romei karah,’ an lo ti mathlâwn loin, tih awm hliah hliah chu a lo ni e. Thing chi hrang hrangte pawhin mawi taka par chhuah a, Pathian chawimawi tumin an zîk no an chhuah hlep hlep hlawm a.

Nungcha tinrengte chuan hlim em emin he ṭhâl boruak nuam takah hian siamtu Pathian fak leh chawimawia zaiin an aw mawi tak chu an chhuah chuah chuah hlawm a nih hi. Ramar leh vahrit nupate chu ramngaw hnuaiah inchhai at at pahin an khuang àl âl a, thlawhbuaah chuan luang hung leh hmunphiah hung velahte chuan laiking pawhin a chánga awr tisen a, a chánga tidum zak zak chungin inbihruksiak ni âwm takin an tlan zak zak a. Khâm chhengchhe laia farṭuah leh vaube te chu a par vul mawi mawiah an ṭang emaw tih mai tur a nih hi. Sathárte chu khâm chhawrdawh velah chuan bahlahna nei miah loin tual an chai a. He kan chenna Zoram khawvel zet hi zawng, Pu Rokunga'n ‘Aw lei mawina thinlai tihlimtu’ a lo tih hi, tih âwm reng zawng a nih hi; Siamtu hian khawvel mawina hi he ṭhâl khaw nuam takah hian a va pho chhuah chiang em.

A ni a lawm, nimahsela, he ṭhal khua nuam leh mawi takah hian tute ramkalin emaw an zial zûk bung an paih fimkhur loh vang te, an mei chhem an tihthih ṭhat loh vangte leh tute huan lo ram hâlin meilam an sah ṭhat loh avangtein kângmei rapthlak tak a chhuak fo si a. Kan chenna ram mawi leh nuam tak mai, siamtu Pathian pawhin ṭha a tih em em hi enkawl tur pawhin a hmangaih em em, Ama anpuia a siam mihringte ngei kutah a dah a. Nimahsela, keini chuan kan duhâm leh hmasialna avangin duat takin kan enkawl si lo a; kângmei rapthlak takin a kâng duai duai ṭhin a ni hi. Pathian thil siam tinrengte thlabâr leh mangang takin an awm fo si a.

Ram kâng duai duai ṭhinah hian khawvel sik leh sá, lum lutuk tur leh vawt lutuk tur vawng tura Pathianin a siam, thing leh mau thil nung tinrengte boruak hîp tur min petu leh kan mamawh em em tuihna siamtu chu a kâng chhe nasa em em a. Pangpar mawi tak takte pawh meivâpah an chang zawih zawih mai chu a ni a. Khâm chhengchhe lai chei mawitu ṭhang leh phûlte lah chu a alh zît puat puat a. Khâm khuai leh sathárte chu eng tin tak awm ang maw? Thawlhbua leh ram ngawte pawh inang rengin kângmei rapthlak tak chuan a vaihma hmiah hmiah zel mai si a le. Hetih lai hian ram kâng bak, ramhnuaiah chuan ramsa chi hrang hrang mangang em emin an tlan kawi zak zak hlawm a, anmahni sahimna bakah an notête chhanhim an duh a ni. Nimahsela, tih ngaihna awm thlawt hek lo, ram kâng rapthlak takah chuan mei khu hâka thiin, meivâpah changin an kâng ral ṭhin si a. Dâwn an tisei mang e.

Nungcha chi hrang hrang leia bawkvâka kalte leh rannung thlawk thei thereng te, khuai leh phengphehlepte tan pawh ram kâng hi meidil a ni ringawt mai. Sava chi hrang hrang kan ram timawia tinuamtute chan rapthlakziate hi aw! Harsa takin bu an chhep ṭhin a, an bu chhehah chuan an tui a, an awp keu a; an notête an thlawh theih hma loh chuan an thlahthlam ngai reng reng lo. Chhunah an notête ei tur zawngin an buai em em a, zanah an notête chu an awp lum ṭhin a ni. Heti anga lungchim taka nun an hman lai hian ram kâng rapthlak tak mai chuan a rawn nang ta ṭhin si a le. An notête chu chhan tumin vir vir mah se la, an theih tâwk a tlem si a; Pathian fate lo lan hun chu an va nghakhlel dawn em! An bu chhehna thingkung leh an notête chu rei lo têah meivâpah a chang zo ta si a; sava nupate chu eng tin tak awm zel ang maw. Mei khu luih luih karah chuan sahimna zawngin an thlawk pil vawn vawn ta a. ‘Kan Zo tlang ram nuam hi chhawrpial rûn i iang e,’ ti ve ang maw?

Mizote hian kan Zo tlang ram hi Pathian duh dan ang takin kan enkawlin i inhria em? Kângmei rapthlak tak takin ram a kan chhiat duai duaite hian i rilru a na ve em? Ram kâng ṭhin hi pawi tihna nei miah lo a, hmuhnawm thlira i thlir mai mai a nih zawngin Siamtu'n eng tin tak ngai ang che maw?

Mizo Kristiante hian i ngaihtuah chiang teh ang u. Kângmeiin thing leh mau a tihchhiat nasat ṭhinzia leh nungchate a tihmanganzia hi sawiin a siak lo asin. Kan ramah hian kan fimkhur loh vang leh inthlahdah vangin kum tinin ṭhâl lai hian ram a kâng duai duai fo va. Chuvangin, mi tinte’n he kan ram mawi takah hian kângmei tichhuak lo turin i fimkhur ang u.

- Hausanga Hauzel