Career guidance

Zirlaite pualin, hma lam hun thlîr chunga zir chhunzawm duh tan tun ṭum chu BBA zirna chungchang hi i’n thlûr bing teh ang. BBA in Travel & Tourism leh BBA in Aviation te hi kum thum degree course ve ve a ni a. BBA in Travel & Tourism hian Travel & Tourism hawi zawnga thiamna nei turin naupang a chher chhuak ṭhin. BBA in Aviation hian airlines lama thawk thei turin naupang a chher. Travel & Tourism hi ram tinah a ṭhang chak êm êm a, India ram ngei pawh hian theihtâwp chhuahin zin mite hîp nan project hrang hrang a siam ṭhin.

State tinah hian tourist hîp nan resource tam tâwk a awm a, Mizoram state pawh hian resource chu kan nei ṭha. Kum tina tourist lo lût hi statistics kan chhût chuan domestic leh international a pung chho zel a. Heng zin mite kan lo hîp belh zel nan leh tourism hmasâwn nan leh ṭhalaite tan eizawnna tam zawk a awm theih nana Tourism Ministry hian hma a lak chhoh zel chuan Mizoram hi North-East state zingah zin mite tan kal châkawm takah a siam thei.

BBA in Travel & Tourism hian kum thum chhungin travel & tourism business hlawhtlin dan turin zirtirna a pe a. An zir zawh hian sawrkarah emaw, private-ah emaw hna an thawk thei a, mahniin business an din thei bawk. He course-ah hian travel & tourism hmasâwn dan an zir tam hle. BBA in Aviation hi airport management leh airport operations lama tuimi tan zir chi a ni. He course hi an zir zawh chuan credit control manager, assistant airport manager, airport operations manager, programme manager, baggage officer leh cabin crew lama thawk duh tan thawh theihna kawng a awm.

State tinah mihring kan pung zel a, airport-te pawh a ṭhang chho ve zel a. Metro city airport-te kan en chuan an buai theihzia kan hmu ṭhin awm e. Heng avangte hian ṭhalai tam takin BBA in Aviation kan zir chuan aviation lamah hna kan hmuh theih phah dawn a ni. BBA in Aviation hi foreign lamah pawh scope a tam a; mahse, foreign-a thawk tur chuan experience neih a ngai ve deuh.

Bachelor in Hotel Management (BHM) hi UGC hnuaiah kum li zir a ni a; ei siam chauh ni lovin, hotel enkawl dante zir a ni. Hotel management hi ei siam ringawtah kan ngai a, subject hrang hrang a keng tel ve tih hriat a ṭha. Subject zir ngaite chu–house keeping– hotel enkawl felfai dan leh hotel interior decoration; food & beverage service – international standard-a buatsaih dan; front office – mikhual ṭha taka lo enkawla an harsatna sut kianpui dante an zir.

Heng bakah hian hotel law managements, business environment, accounts, statistics te an zir tel. Institution leh hotel-ah zir kawp ṭhin a ni a, foreign internship-in ram dangah thla ruk an kal thei. Zir chhuak tui chilh tak takte tan hna a tam. Experience nei tan phei chuan cruise industry-ah emaw, foreign lamah emaw thawh tur a tam. Five star chinah pawh India ramah thawh tur a tam.

BHM zir zawh hian hotel-ah manager trainee turin interview an nei ṭhin. Interview-a tlingte chu an duhna department-ah manager an ni nghal thei. Tling lo tan pawh supervisor emaw, associate emaw aṭangin an ṭan thei. Experience neih dan azirin an kai sâng chho zel thei. Kan zir duh hi uluk takin thlang ila, eng nge kan state-ah scope ṭha, foreign lamah kal duh ila eng nge ṭha, tihte ngaihtuahin i hlawhtlin ngeina tur course zir i tum dawn nia.

Heng ka’n sawite hi i ngaihven duh a nih chuan 9774184433-ah i zawt fiah thei ang. Heng course-te hi India ram hmun hrang hrangah zirna a awm. Heti chin hi tun atan chuan duh tawk rih phawt ang aw.

- Lalhmingmawia Ralte