SORKAR ṬAWIAWMIN I ṬANGRUAL TLAT ANG U

Ramri buai chin felna hmasa ber atan chuan dawhkan lam aiin, ram luahtu zawk nih a ṭulin ka hria a. Ramri history in hriat siak a, thil hlui deuh deuh sawi kha a ṭangkai lo tihna lam ni lovin, a luahtu zawk kan nih tlat chuan kan ta a ni mai. 

Kumin 2020 Mizo­ram leh Assam ramri buai chu kum dang a ang lo. Thinghlunah Karimganj DC hovin thlam an rawn hal a, Kuhva hmun an suasam bawk. Saiha­pui V ah Assam police lokalin Mizo IR an vau va. Vairengte lamah  Assam police te fuihpawrhin Lai­lapur vai hovin lungin Mizo IR duty an rawn vawm a. 

Nimin lawkah Cachar DC leh Assam Police DIG Vairengte ah kalin, Saihapui V a Mizo IR police te chhuak turin an rawn ti a. An chhuah loh chuan National Highway dan chah a nih tur thu an rawn sawi a. An sawi ang ngei hian an haw thla a, vai hovin kawng an dang nghal. 

Khawilai aṭang pawhin Assam official, DC, Foresters leh Police ten min rawn ti hmasa char char. 

Thawka phita min hren rilṭam tum a, kan eibar lakna  kawngpui min dan chah khum fo hi a ngeiawm rualin, keimahni in enfiah ve kan ngai hle. Sorkar kal tawh leh sorkar mek, sorkar leh tum zawng zawng party te hian ei bara intodelh hi thupuiah i nei ang u. 

Party leh pawl sawi lovin ṭangrual ila, hun kal tawhah ramri chungchangah kan huai tawk lo emaw, sorkar hmalak danah kan duhthusam lohna te a awm a nih pawhin, in kawk mai lovin, darthlalang atan hmang ila. In siam ṭhat nan hmangin tunah chuan sorkar hi i ṭawiawm tlat ang u. Chutiangin kan Mizoram sorkar pawh hian Assam tihdan ang hian police leh Forester te hmatheh ve sela. A ṭul chuan police te inkap theiin awm rawh se. 

 Heti khawpa min rawn diriam a, Assam official-ten min rawn luhchilh hi, kan sorkar in a chhanlet dan hi kan Mizoram rilru ngam chin a ni ang. Sorkar hi huai takin kal se, mipui chu sorkar hnungah kan kal zel ang. 

Hailakandi DC, Thinghlun thlam haltu leh kuhva hmun suasamtu hnenah Mizo hnam thil, Khiang­kawi iptechei Mizoram sorkar aiawhten an lo present vel te hi ti tawh miah suh se.