Kohhranin thawhlawm thawh zat a tihlan hi

Ṭum khat chu social media-ah kohhran pakhatin an kum tin chhût chhuah (annual report) zinga an tihlan ni ngeia ngaih pho chhuahna ka hmu a. A thawh tam berin kum khata a thawh kha Rs 10,04,750 a tling a, a fakawm khawp mai, Pathianin mal sâwm zel se kan duhpui hle mai.

Thawhlawm thawh zat kohhran annual report-a kohhranhote'n an tilang ṭhin hi chu a ṭha reng mai; kohhran pawisa kum a lo tawpa thawh zat hre lote tan leh tihsual palh awm leh awm lohte hriat nan a ṭha a ni. Pathian ram zau zêlna atan a ni a, thawh tam zual chhungkaw sawmte pawh khan ṭan la zel se. Pathian teh dan lam erawh chu mihringin kan va hre phak lo va.

Thawh tam lam hi chu kan thawh bâk (a la bâng=balance) aṭanga chhûtin, Krista rilru dek che tham a nih leh nih loh chu a hriat chauh vang. Hmeithai pakhatin dâr tangka derê pahnih a thawhin Isua hnen a thlen dan kha kan hre hlawm ang a (Luka 21:1-4). Thawhlâwm thawh sâng zinga a hmasa ber (topper) thawh kha Sawma Pakhat emaw, a aia tam emaw a lo nih erawh chuan Pathian hnen a thleng ngei ang tih erawh chu Bible aṭangin kan hre thei thung a (Mal. 3:10).

Amaherawhchu, kohhranah hi chuan mi lian leh mi tê, hausa leh rethei thliar hrang lo va, Kristaah mi zawng zawng inang tlang vek kan nih avangin, annual report-a thawh zat chhuah baka a thawh sang zualte han tihlan leh erawh hi chu Krista'n a kohhran a din dan kalphung nena han hmeh bel thiam a harsa deuh va. Mi harsa zawk Rs 1,000 aia tlem thawhte pawh awm theih a nih bakah, retheih vanga thawh lêm lo thlengin a awm theih si a (kei pawhin hetiang hi ka hria).

Thawh tam tur nei ve lo, Isua nen an inzawm avang leh kohhran hlat hi mahni tan a ṭha lo tih hria a, inkiltawih leh ṭi dêk chunga rawn inkhâwm hrâm hrâmte tan chuan hmuh a nuam lem lo maithei. A thawh sang zual top 10 tih ang chi hi chu tihlan aiin tihlan loh chu a kohhran zia zawkin a thlanawm zawk mai ang em tih ngaihtuah theih tak a ni.

Kum tina kohhranin ('Kohhran' common noun hi kohhran sawi bîk, kohhran mal kan sawina a nih loh chuan 'Kohhran' tia ziah loh tûr) a member, Krista taksa pêng hrang hrangte thawh zat a tihlan hi chu chhunzawm zel a ṭhat lain, thawh sang zual tihlan kher erawh hi chu tih loh theih ni se, a thawh sang zual hi chu mi nâwlpui hian kan hre tho ṭhin si a.

- Dr J.T. Vanlalngheta