Pu Nguna'n thubuai a nei nge nei lo?

Tun March ni 10 em ni khah, Chief Minister-in Assembly Session-ah zawh belhna a chhannaah Congress ho MLA neih chhun Pu C. Ngunlianchunga'n ACB-ah thubuai a neih thu a sawi chhuak a. Pu Nguna kha rang tak rawn ding chhuakin, thubuai a neih a hriat loh thu a sawi bakah anticipatory bail lak a tum loh thu a sawi a nih kha.

Khami ni vek khan Pu Nguna khan press conference a ko nghal a, chutah erawh chuan thubuai a neih a hriat loh thu sawi tawh lovin, ACB-a thubuai a neih ve dan a sawifiah ta thung niin ka hria, chanchinthara ka lo hmuh danin.

A hnu lawkah Congress Treasurer Dr. Lalmalsawma'n press conference a nei ve leh a, chutah chuan Pu Nguna thubuai neia sawi chungchang a sawi chhuak tel leh a. An Press Statement pawh social media-ah hmuh tur a awm a, chutah chuan "Pu C. Ngunlianchunga hian Anticipatory Bail la turin khawi court-ah nge thubuai a neih Mizoram mipui min hrilh turin kan duh hle a ni," tih a awm a ni.

India danah hian 'thubuai' tih hi eng chin nge ka hre hauh lo a, hnam dangte'n 'thubuai' an tih chin pawh ka hre hek lo. Ka hriat ve erawh chu, Mizote chuan Police te, Excise te, ACB te, Forest thleng pawhin a ni thei ang, case an register chiah hian 'thubuai' kan ti mai ṭhin. Chanchin thar leh chanchinbuah te pawh 'Police-in thubuai an ziak lut' an tih mai ṭhin a nih hi.

Congress Treasurer-in khawi court-ah nge Pu Nguna'n thubuai a neih a tih avang hian court-a thleng chin chauh hi thubuaiah a ngai tihna a nih duh hmel a. Court-a thleng chin chauh thubuai nei an nih a, Police, Excise, etc ten case an register hi 'thubuai' nei an nih loh chuan Congress Vice President leh an MLA neih chhun Pu Nguna chu thubuai nei lo a ni dawn tihna a ni a. Pu Nguna hi thubuai neih lohtir an tum hle tih a lang.

Police te, Excise te, ACB te, CBI thleng pawhin, case an register hian thubuai a la tling lo a, court-a chargesheet thehluh chin chauh 'thubuai' anga sawi chu a dik dawn em ni?

A nih chuan February ni 12, 2025-a Bungṭhuam khua, Mamit district-a pa pakhat tualthihna leh February ni 15, 2025 zana Mualpui, Salem Veng, Aizawla nu pakhat tualthihnaahte kha a la rei lo a, Police-te'n chargesheet la thehlut lo mai thei. Court-ah chargesheet la thehlut lo ta se, heng tun hnaia tualthihna thlenga mi thattua puhte hian thubuai an la nei lo tihna em ni dawn?

Congress Treasurer emaw, an party mite emaw chuan Pu Nguna hian thubuai a nei lovah an lo ngai a, chutiang zawng chuan thu an lo thehdarh a ni thei a. Mahse, Mizote'n kan sawi danah chuan Pu Nguna hian thubuai a nei ngei tlat a ni, a lakah ACB-in corruption case an register miau avangin.

Tin, Pu Nguna hian ACB case a nei tih hre lo anga a insawi hi kei chuan ka ring lo a, CM Pu Duha'n Assembly Session-a a sawi chhuah hma daih tawhin case a nei tih a hriat chian viau ka ring. ACB-in thu an lo zawtfiah ve nual tawh a nih hmel a, bakah case a neih thu ACB-in kum 2022 khan Assembly Speaker an lo hriattir tawh bawk a. Hengte avang hian hriat loh chi a ni lo; hre lo anga insawi vel hi chu lem chan kualna vel mai mai a nih duh hmel e.

- Zodinsanga