Kohhran hruaitute ram veina

Kum tam tak liam tawh aṭang khan sakhaw rawngbawltute hian ram rawngbawlna hi an lo vei tawh a, an theihtawpa lo au chhuakte pawh an lo awm tawh ṭhin. Martin Luther King Jr, Baptist kohhrana rawngbawltu chhuanawm tak Jesse Jackson, Christian Broadcasting Network dintu Pat Robertson leh Pentecost kohhrana rawngbawltu chhuanawm tak Al Sharpton te leh mi dang dangte chu America rama langsar taka ram veina lam thu tlangaupuitute an ni. Anni bakah hian Nobel Peace Prize pawh lo dawng hial tawh Anglican bishop Desmond Tutu, Catholic puithiam Daniel Ortega leh mi dangte pawh sawi tur an la awm bawk.

Anni ang hian kan ramah pawh kohhran huang aṭanga ram veina lama thu leh hla nei sakhaw puithiam chhuanawm tak tak an awm a. Kohhran huang chhung chauh ni loa khawtlang leh ram veina avanga pawl anga din–MKHC, MPF leh Synod Social Front kan tihte pawh hi kan ṭhatpui viau ṭhin bawk. Chutianga kan ramin hma a lo sawn a, a lo ṭhat phah theihna tura hmalakna an neih avang chuan politics lam thlirna aṭang pawhin namnûl ngawt a theih lohzia leh mipuite pawhin kan ṭangkaipuizia chu hai rual a awm lo. A bik takin political party inepna hmunahte bân phar a ṭul chângin bân an phar a, thu leh hla neih a ṭul chângin an kuangkuah mai ngai chuang hek lo.

Tu kan sawi bik tihna pawh ni chuang loin, kan sakhaw puithiam zingah ram leh hnam a lo ṭhat zawkna tura au ring tak takte an lo awm tawh ṭhin a, chung an au thâwm pawh chuan awmzia a nei em ni tih tur a ni hlawm bawk. Kan sakhaw rawngbawltute zingah chuan mi pathum lek thusawi tawitê têin hetiang hian han tarlang ila.

Revd Chuauṭhuama: Ani kha May 5-8, 2022 chhunga Kolasib khawpuia KṬP Inkhawmpui lianah Speaker a ni a, ram veina lam hawi a sawi ring hle. ‘Tunlai thil awmzia’ tih thupui hmanga a thusawinaah chuan kan rama hri vei lian tak tak pali – chiahpuam, khehpuam, leipuam leh kuhva phurhpuam te chuan min ei chhe mek a, tangka sum ngainatnain min ei chhe mek bawk a; hengah hian kan inthiar fihlim a ngai a ni tiin a sawi. Heng baka a sawi langsar tak pakhat leh chu – Titia distinction, hna thawha third class, a tak hmuh tur awm si lo ram hruaitu hi thlak a hun tawh a, hna thawk thei mi dik, ram roreltu kan mamawh a ni tih thu a sawite chu a ring ṭha hle.

Rev. MS Dawngliana: Ani pawh hian November 22, 2022-ah Vanapa Hall-a MPF Annual General Meeting vawi 15-na neihna hmuna a thusawi chu a ring ṭha hle mai. ‘Party ruih chilhnain ram leh mipui a nghawng dan’ tih chu thupui atan a hmang a. Sam 22:28 thu ‘Ram chu Lalpa ta a ni a, hnam tin chunga roreltu a ni si a’ tih chu chhiarin thu a sawi a. Political party chu ram siamṭhatna turin a ṭul a, kan ramah pawh kum 1972-a UT kan nih aṭangin mahnia rorelna kan neiin, MLA term sawm kan lo paltlang tawh a, chung MLA atan chuan mi ṭha leh fel tak tak kan lo thlang chhuak tawh ṭhin. Mi fel leh ṭha tak tak mah ni se la, kan duh leh beisei angin ram rorelna an nei ngai chuang lo.

Party ruih chilhna hian kan ram a ei chhia a, hman aṭanga tun thleng hian min la ei chhetu ber pakhat pawh a ni. Party ruih chilhna chuan politician-te rilru tipiangsualin, mipui tam takte ât min sotir bawk avangin ram ṭhan a tiṭhu ṭhin. Politics hrim hrim chu ram tana thil ṭha leh ṭangkai tak pawh a ni a, nimahsela, party bil ruih chilha hleih nei taka rorelna hi Pathian pawi sawina a ni. Kristian ramah hian Bible pêla ram rorelna kalpui a nih chuan Pathian malsawmna kan dawng lo ang. Hengte hi Rev. MS Dawngliana sawi tlangpui chu a ni.

Rev. R. Lalbiakliana: Ani pawh hian February 12, 2023 khan Mizoram Baptist Mipa Pawl (MBMP) inkhawmpui lian, Hnahthiala neihah ‘Ram leh hnam tan min tiharh leh rawh’ tih thupui hmangin thu ṭha tak a sawi. Kan ram siamṭha tur hian Nehemia anga mi rinawm leh eirukna laka fihlim kan mamawh a ni tiin a sawi a. Chu mai bakah chuan, kan ramah hian ram hmasawnna tur sum leh paite hi ṭhahnem tham tak a nih laiin, a hmanna tura hman a nih loh avangin kan ram hian a nih tur ang a ni phak lo ṭhin a ni tia sawiin, kohhrana a nihna tur taka sum leh pai kan hman ṭhin angin hman ni se la chuan kum khat chhung lek pawhin Mizoram hi dinhmun sang taka an din theih ngei tur thu a sawi a ni.

Kohhran chuan thawktute hlawh a hun takah kan pe ṭhin a, kan sorkar hian ram enkawl a thiam lo a nih chuan Baptist Church of Mizoram hi term khat min enkawltir rawh u a ti hial a. Kan rama roreltute leh sorkar miliante vang hian kan ram hi tihchhiata a awm laiin, Juda ho zinga kum 12 zet roreltu Nehemia chuan ram a siamṭhain mipuite tan Pathian ṭihna avangin rorelna ṭha tak a kalpui thei. Chutianga Pathian ṭih mi roreltu chu kan ram hian a mamawh a, Pathian ṭihna avanga sual kalsan ngam a, rinawm taka nung ngamtute hi kan ram hian a mamawh a ni tiin ṭhahnemngai takin a sawi.

Vawiinah hian kan sakhaw rawngbawltute ram veina hi la châwl mai lo se la a duhawm hle mai. Bible rama zawlnei leh sakhaw puithiamte au ang khan keini zingah pawh hian ram veina thu sawi a, la au reng tur hian kan rawngbawltute hi ngawi reng lo se la a duhawm a, kan la mamawh reng a ni tih hi hre reng ila a ṭha ang. Politics leh kohhran hi kal hrang tak tak thei lo leh kal kawp rem lohna chin awm bawk a nih vang hian, a bik takin Kristian ramah hi chuan indo thei miah lo a ni a, a tam thei ang bera kal kawp tur a ni tiin sawi ila a dik mai awm e.

Engkim, khawvel thil zawng zawng pawh hi Pathian thua awm niin, kan nunna thleng hian a kuta awm a ni. Ram rawngbawlna pawh Pathian remruatna a tel loh chuan a tluang thei ngai hek lo. Chuvangin, ram rawngbawltute pawhin Pathian thu an ngai pawimawh tur a nih angin, Pathian rawngbawltute thu leh hla an ngaithla fo ṭhin tur a ni a, chumiah chuan malsawmna pawh a awm bawk a ni.

Kohhran hruaitute u, au zel u la, ram leh hnam tana in au thâwm reh suh se.

- Mahmuaka Chhakchhuak