Sawrkarin khalh ngiltu a mamawh
Sawrkar lai apiangin NGO te hi hnawk an ti niin a lang a, an opposition velah hnimhnaih an tum leh fo ṭhin. Party ṭhenkhat phei chuan Kohhran hi hnawk tihna chen te pawh an nei ni awmin a lang.
Sawrkarin kalphung thar a siam apiang hian mipui leh zirlaite aiawh YMA, MSU, MHIP, MZP leh MUP te hi inrawlh ṭhin se ṭha ka ti. An pawl ngaihdan leh hmuh dan te hi sawi chhuak fo se. Chutiang a nih loh chuan mimal tute mah hian sawrkar kalphung hi a tak takin kan do ngam lo.
Facebook leh Whatsapp vela sawrkar dik tawk lohna sawi chiam hian tute ngeng mah a chhun zo si lo. Chuvangin, sawrkarin kalphung thar a duan apiang hian a inrawlh awm pawlte hi chu inrawlh zel se, chu chuan rah ṭha a chhuah zawk ngeiin ka ring. Sawrkar kalphung kha do ngawr ngawr se ka tihna lam ni lovin, sawrkarin policy leh programme thar a kalpuite hi chipchiar takin lo zir ṭhin se, a fuh tawk lohna lai a awm chuan sawrkarah thlenin mipuite tana a ṭhat zawkna turin thurawn pe ṭhin se.
Khalh ngiltu nei lo leh thurawn pek theih loh sawrkar chu a tlusawp fo ṭhin. Kan political party-te zingah Kohhran mamawh lo anga inngai an awm a nih chuan an mamawhzia hriattirin an awm bawk ang.
VC/ LC te pawh hian khalh ngil an mamawh a, mipui emaw pawlin an kalphung kan sawi a, kan sel ngam loh chuan VC/ LC member ṭha an ni thei ngai lo ang. Fuke kim lo AMC phei hi chuan khalh ngil a mamawh lehzual, member-te pawh hian NGO leh Kohhran thurawn hi dawngsawng thiam se a lawmawm hle ang.
Kan NGO hrang hrangten inrawlh ngai nia an inhriatnaah tha leh zung, ngaihtuahna an sen apiangin ṭul ti lem lo pawl an awm ve fo, a bik takin ruling party worker hawi zau vak lote an bengchheng thei hle. Anni ang ho thurawn ka pek duh chu an party thil tih a nih avang ngawt hian a ṭha vek kher lo tih hi a ni. Mahni awmna party thuchhuak a kawi a ngila kan zawm fo pawh hi a fuh ber lo bawk.
Kan journalist-te pawh hian thil an ti thei fu mai. Media kaltlanga sawrkar kalphung dik tawk lo an puanchhuah ngawt pawh hian mipuiah awareness ṭha tak a pe a ni.
Aw le, eng pawh sawrkar se, khalh ngiltu nei lo leh thurawn pek tlak loh sawrkar chuan thil ṭha pawh tiin inhre mah se a ziktluak tak tak thei lo. Kan NGO te pawh han ṭang deuh deuh se, anni lo hi sawrkar khalh ngiltu kan nei chuang lo. Kohhran pawh a bang thei lo. Kan sawrkar hian khalh ngiltu a mamawh a ni.