Sual bul leh Kristiante

He ka thu ziah leh tun ṭuma zu khap burna dân ennawn chungchang hian inzawmna a nei lo va, Bible ṭawngkam inhrilh thar lehnaah ngai ila a ṭha ang e.

Hla pakhatah hian 'Zu' hi sual tinrêng bul a lo ni e' tih hi ziaha sak a ni a. He hla hi a phuah hun a rei tawh nâin, zu chungchang sawi chhuah a nih hian tute’n emaw a chânga tlar pakhat hi sawi chhuakin, mahni duh dan tihpuitlin nan hman an tum ṭhin a, a zialo ṭhin hle. Hei hian he hla chuai mai tura ngaih hi a tuai thar leh ṭhin a ni.

A châng dang hi chu a ṭha lo tihna pawh a ni lo; mahse, he lai tlar hian Bible a kalh avangin hla hrim hrima hi Kristian nihna tarmit aṭanga thlìrin, hla ṭha lovah a chantir si. Isua zuitu tling lo tak kan nihna rilru aṭanga thlirin, he hla hi Pathian thu nen a inmil lo tih hriat a ṭha hle mai.

Sermon ilova Bible chang sawi/chham sual palh hi chu a inhriat thiam theih a; mahse, patling, nu tling, rawngbâwltu tling ni âwma ngaihte’n sual tinrêng bul anga zu an han chhuah leh ṭhin hi chu kan Pathian Lehkha Thu zah lohna a tling hial ang em?

"Tangka sum ngainat hi sual tinrêng bul a ni si a; chu chu ṭhenkhatte’n an awt a, rinna chu an kal bosan a, anmahni leh anmahni lungngaihna tam takin an inchhun tlang ta chuk a," tih Bible-ah kan hmu a ni (1 Timothea 6:10).

Mizoram Kristian kan nihna pawh kum 130 zet a ni tawh a, ringtu kan nih chuan 'zu' hi sual tinrêng bul a ni lo tih hriat tlân a hun tawh tak zet a ni (Zu sawi mawi erawh chu ka ni hauh lo tih he thu ziah chhiartute hian min hriatpui thung u la). He hla châng avang hian he ṭawngkam pawh hi mual liamtir tawh ila, chutia kan tih chuan kan Pathian chu kan lamah a ṭang ang a, a malsâwmna pawh kan dawn phah bawkin a rinawm.

Bible -in a sawi tum ni lo anga sawi hi chu Diabola hmanrua a ni ṭhin a; hla la phuah zel tûrte pawhin Bible zirtirna kalha kan phuah lohna turin he hla hian kan thinlungah thu sawi mawlh rawh se.

– Dr J.T. Vanlalngheta