World Social Work Day 2025 (Strengthening Intergenerational Solidarity for Enduring Wellbeing)

ENG NGE SOCIAL WORK?

Mizorama subject tharlâm, college chin aṭanga kan hmelhriat ve chauh ‘Social Work’ hi hre lo emaw, bêl chiang lem lo kan awm pawhin a hriatthiam awm viau mai. Social work hi thiamna (profession) niin, classroom piah lama a taka va tih emaw, hman chhuah (practical) emaw ngai chi a ni a; professional course tam zawk ang bawkin degree neih theihna a ni. Mimal, chhungkua, vantlang leh ram siam ṭhat hi social work tum ber a ni, a tih theih ang.

WORLD SOCIAL WORK DAY

‘Social Work Day’ tih hrim hrim hi chu kum 1983 khan Jack A. Kamaiko hovin New York-ah hman a ni tawh a, Vau Thla (March) leh Ṭau Thla (April) remchangahte an hmang mai ṭhin. Hun a kal zel a, awmze nei, tum mumal leh inbuatsaihna felfai zawk nena kalpui niin, kum 2007-ah phei chuan social work profession-a body lian ber IFSW (International Federation of Social Workers)-in khawvel huapin World Social Work Day hman ni se tiin a rel a. A thupui (theme) atan ‘Social work–Making a world of difference’ tih vuahin kum tin Vau Thla (March) Thawhlehni vawi thumnaa hman zel turin an ruahman ta a ni. Vau thla puma láwm sawi tur pawh an awm leh nawlh zel.

Kumin thupui atan hian "Strengthening intergenerational solidarity for enduring wellbeing" tih hman a ni a. Ram hrang hrangah mahni remchan dan mil zelin World Social Work Day hi hman a ni ṭhin a; thupui mil leh a zûlzui deuha kalpui a ni tlangpui. He hun hi social work subject inhmelhriattirna atan te, social worker hnathawh (mimal, chhungkua, khawtlang, vantlang leh ram siam ṭhat) a ṭangkaina leh a nghawng theih hrang hrang inzirtirna atante hman a ni ṭhin. Hmachhawp sawi hawn nan, tawnhriat inhrilh tawn nan leh changtlung zawka social work kalpui zel dan tur sawi ho nante pawh an hmang bawk.

KUMIN THUPUI

Kumina thupui (theme) hi ‘Strengthening intergenerational solidarity for enduring wellbeing’ tih a ni a. Kan thlahtute finna chhawm nung zelin, ṭangrualin khawvel nuam leh ṭha zawk siam a. Hun lo la kal leh zel tur atana boruak muanawm leh chhenfakawm zawk siam hi kumin thupui chu a ni e, ti ila a tawi felin a huam kim ber awm e.

PI PUTE RO THIL HLU A NI

Mizo hlaah te, thawnthu leh thuziakahte pawh kan hmu a; hmasanga kan pi leh pute thiamna, hriatna leh finna te kha a lo ril ngawt mai. Tun thleng hian khuang, thembu, tuthlawh, chemkawm, fasuar leh thil dang dangte pawh kan la hmang ṭangkai em em a. Chempui, êm leh hnam, thlangrá, hmunphiah, túlthîr leh thil eng eng emawte phei chu in tinin kan la kawl fur awm e. Kan pi leh pute kha ṭawngkam mawi leh hawihhawm chuh hram hram ṭhin an ni a, mi dangte tana ngaihthlak nuam tur an zawng fo ṭhin.

Min thlahtute nunah khan chhawr zui tlak tak tak a tam a. Ṭawngkauchheh pakhatah chuan, ‘Nu leh pate chu hmuh theih Pathian an ni’ tih a ni a, ‘Kan lei Pathian an ni’ ti an awm bawk. Thil ei nikhuain ‘Aia upa an bâr khalh ngai lo’ tihte hi tun thlenga thufing a la tling. Aia upate tirh an hnial ngai lo a, kum upa lam deuh phei chu tuichawi, thing fawm leh rawngbawlahte pawh an âwl ṭhin. ‘Upa sa kah’ tihte an la nei cheu. Hengte aṭang ringawt pawh hian anmahni aia upa zawkte an zah ṭhinzia chiang takin kan hmu thei awm e. Ram kalnaah naupang an hnuhnuntir ngai lo va, thil insem dawnin duh an thlan hmasaktir bawk ṭhin. Hengte pawh hian naupang an duat thiamzia chiang takin a lantir a ni.

Upate’n ‘Piansual leh phâr chârin tlai luat a nei lo’ an lo tih ṭhin pawh hi tu mahin kan hma lam hun kan hre lo a, rualbanlo leh piangsual thei dihmunah kan ding leh vek thei tih a tilang chiang hle. ‘Lungpui pawh lungtêin a kamki loh chuan a awm thei lo’ tih te, ‘Mai lêng an ûm ngai lo’ tih te, ‘Zangkhua a la bungbu thei’ tih te, ‘Ṭhenawm khawnvengte do aiin khaw sarih do a thlanawm zawk’ tihte leh an nunphunga khawtlang tana hnawksak nih an duh lohziate hi thlir kual ta ila; thawhhona ṭha, inzah tawnna leh inpumkhatna an ngaih pawimawhzia chiang takin kan hmu thei awm e.

Kan pi leh pute khan sa an ei duh loh tur an kap ngai lo. Nungcha te, hnam ro hlu–thing leh mau thleng pawh hian an phâk ang tawka zahin an humhalh a, ṭul lovah an tichereu ngai lo. Khaw tinah a pui a nawia mawhphurhna leh chanvo an nei ṭheuh ṭhinte khan an inrelbawlna ṭhatzia a lantir a. In lam leh ram lamah pawh an theih chin chinah mi harsa leh chhumchhia zawkte an dâwm kâng ṭhin. ‘Mipa tan hmeichhe kutthlak a mawi lo’ an tihte pawh hi tunlaia kan dan dinglai leh social work zirna nen a la inhne rem thlap mai. Hemi piah lamah hian beiseina, hawihhawmna, thawhrimna, awm dan mawi, taimakna leh tlawmngaihna thleng hian an inzirtir zu nia.

TUN LEH NAKIN ZEL ATAN

Kan tunlai khawvel hi han thlir hmasa ta ila. Mihring chen hona atan a tlak em? Dan hian ro a rêl tak zet em? Kan ram leilung, nungcha leh sik leh sa siamṭha zel turin hma kan lakna a ṭha tâwk em? Kan kalphungah hian thlak ngai emaw, siam rem ngai emaw a awm em? Eng nge kan thlah kal zel turte tan kan hnutchhiah? An tana chenna tlak leh chhenfakawm khawvel kan siam theih nan engtin nge hma kan lak zel ang? Hengte hi inzawt ta ila; kan phak ang tawka ṭan lain, hmasawnna rahbi hi ṭangrual takin i dai ho teh ang u.

- Daniel Lalrinfela, Information Secretary, Mizoram Professional Social Workers Association (MPSWA)