Remna Ni (rawtna)
Mizote hian hnam pum huapa a nawlpuiin hlim taka kan hman tlan theih ni pawimawh kan nei lo hle. Kohhran ni pawimawh tak tak chu a awm hlawm nain a lawm danah kohhran pawl hrang hrang kan tam a, tihdan a lo inang vek hek lo.
Mizoten Kut hrang hrang kan nei a, Mim Kut, Pawl Kut leh Chapchar Kut te lahin mual min liam san a ni thawthang tawh a, Chapchar Kut erawh kan han tharthawh leh deuh ngial nain Kohhran lamin a la ral thlir miau avangin mipui nawlpui ang chuan kan hlim pui dan a la rual hleithei bawk si lo.
Chutiang dinhmuna kan awm mek laiin kan pi pute aṭanga rawn inchhawp chhuak pawh ni lo ram leh hnam hawiherin a hrin chhuah 'Remna Ni' (June 30) kan lo nei ta; he ni hi a hlu hle a ni. Kan hotuten inremna thuthlung an sign zan te tak kha aw! Mizo mipuiin khatiang ema lawmna a huhoa kan tawng kha a awm ngai lo.
Remna Ni chu kum 29 zet kan lo hmang liam ta, zep nak emaw kum tin a hun a lo thlenin politics-a party inbeihna tel loa thusawi ziktluak a vang hle. Thusawi ṭha tak tak karah party inbeihna thu tlem a lo tel zeuh khan mipuite thinlungah chuan thu ṭha a chhilh bo a, tur phul angin a thawk tawh mai ṭhin a ni; a chhan chu he ni hi ni ropui 'Remna Ni' a ni tlat a ni.
Remna Ni hi kum 2016 aṭang chuan mipui huapin ropui tak leh hlim tlang takin hmang ila, Remna Ni lawm chungchang hi Central YMA kutah awm phawt mai teh se, tih hi ka rawt duh a ni. CYMA tih hian a hmun a zira a zawlpui YLA (Lairam) tih leh MTP (Maraland) sawinaah ngai nghal bawk ila. Ni 30.6.2016 hi Remna Ni kum 30-na champha a ni dawn bawk a.
Remna Ni a lo thlen theih nana hnar kaitute palzutna lam ni loin he ni pual hian mipui chanvo ti tam ila, mipuiin kan hlut lehzual theih nan her rem hret hret ang u.
Mizote thinlungah hian 30th June hian hlimna, phurna min pe se, a phu a ni. Suangtuahnain a dap thui zel a, sawi zel lo mai ila, Remna Ni atan bik hian Mizo hnam hian ei tur bik tlanglawn tak neih tum ila, thawmhnaw bik leh symbol hrang hrang te nei ila. Nakinah phei chuan mimal, chhungkua, veng, Kohhran leh pawlho inkar ṭha lo awm inremna ni atan remchang takin hmang bawk ila a duhawm ngawt mai.
He rawtna hi kan duh ṭheuh ka ring a, mah se engtin nge bul kan ṭan ang le? Hmangchang hria lo penchhuak zel teh u.