Treasury Bazar a va kâng ral chak ve

Treasury Bazar hi Aizawl khawpui laili elkhêna awm, sawrkar hmun pawimawh leh police tlaivara duty awmnate’n a hual vel a ni. A kan hun an sawi hi zing lam dar 3 hnu, zin haw leh eizawnna vang leh exer laa mi tam tak veivah tawh hun a ni a, heti tak maia a kâng fai thei leh a kâng ral hma lutuk hi a mak ka ti a ni.

Treasury Bazar hi zan lam, a ruah vek hnu hi chuan thil han kâng awlsam lutuk tur hi awmin a lang lo. Kawrawng chho vek, bang leh pindanna nei lo, a bang lah chu lehlam lehlamin cement bang a ni mai si. A khat tâwkin ban a ding zeuh zeuh a, sang takah rangva in chung a awm leh a. Dawhkante lah sa sahna dawhkan chhah pui pui, chuti taka han kâng awlsam puat puat tur chi niin a lang si lo. A chhuat lah lei ni bawk si. A kâng ral chak lutuk hi chu a mak a ni.

Treasury Bazar hi a thui thla ve hle a, khawi maw laiah chuan eng emaw lo kâng palh ta pawh ni se, tu emaw chuan hmuh vat awm tak a ni a. A awmdan ngaihtuahin, khawi lai pawh lo kâng ta se, tu tan pawh ṭhelh mih hi a harsat hmel si lo. Hetiang hmun laili, kawng thlang lam leh chhak lam aṭanga kângṭhelh motor-in a phuh theihna, awlsam tea thlen theihna hmun a han kâng ral vek thei leh, building dang sang taka awm PAMRA office a kâng ral vek thei hi chu a mak a ni.

Vanglaini chanchinbuin a sawi danin, ni 17.3.2025 zing dar 3 hnua kâng ṭan, Fire Station-in dar 3:29-ah report an dawng, Khatla Fire Station aṭangin kângṭhelh motor dar 3:36-ah a thleng, dar 7:30 velah an ṭhelh mit thei a ni. Kâng a awm thu an hriat aṭangin kângṭhelh motor chu a thleng hma hle. Mahse, engati nge an ṭhelh mih nghal mai theih loh le? A hmunhma awm dan ngaihtuahin ṭhelh a har hmel si lo. Nge, an thlen hian a lo kâng nasa tawh hle em ni le? Chuti a nih chuan, zing dar 3 hnu vela kâng ṭan, thil kâng chak tak tur awm awm pawh lang lo chu dar 3:36 aṭanga ṭhelh mih mai theih loh chu eng vang nge ni ta ang le? A awm dan ngaihtuahin, a hmu hmasatu tan pawh ṭhelh mih mai theih hmel niin a lang si. Mahse, concrete building chhunga thingpui dawr leh sang taka awm office thlenga a kâng ral vek hi a mak ka ti deuh hlek a ni e. Engpawhnise, Forensic lamin an enfiah mek an tih kha maw.

He laia eizawngte an khawngaihthlak hle mai, kan mi hriat zawngte an awm ve nual si a. A theih ang anga chhawmdawlna leh ṭanpuina hmu ṭheuh thei se la ka ti hle mai.

AMC lamin he lai hmun hi bazar atan siam tawh lo va, a thlanga building ṭha tak, AMC-in bazar tur liau liaua an saka sawn luh vek a tum hi kei chuan ṭha ka ti hle. A chhan chu, he lai kawng hi Treasury Square leh Tennis Court Square kalpawhna shortcut ṭha tak a ni. Thil zuar leh sa rimchhe tak tak leh, chempui lek uaih uaihna karah tâwt takin mipui kan vei lo thei si lo va, a nuam lo thei hle. Sawrkar hian he kawng hi kea kal nan mawi takin chei ṭha se la, a sirah ṭhut hahdamna turte siam bawk se la, khawpui chei nan leh mipui thâwk lâk hahdam nante a ṭha hle ang. Tin, a chung kha neihtir leh ngei bawk se la.

- K. Hmingthankaia