Treasury Bazar sawn ngei a ngai
Treasury Square-a chawhmeh leh thil dang zuarte inzawrhna chu a kâng chiam a, a chanve aia tam a kâng a. Mizoram rorelna sang ber Assembly House sir pawh a kâng nual a, session ṭhutkhawm pawh power supply khaihlak vangin an hunah an ṭan thei lo a nih kha.
He bazar hi mipui tan a ṭangkai em em a, dawr neitu tan lah inhralhna remchang tak a ni. Amaherawhchu, he bazar hi mipui nawlpui tan a hnawk ta. A chim avangin thi an lo awm tawh a, bomb a puak a, a kâng a, ruang chhar thlengin he lai hmun hian a tawng tawh a ni.
Aizawl Municipal Corporation (AMC) chuan he bazar hi chhiatna a tawh denchhenin sawn a tum emaw tih turin hma a la a. Mahse, bazaar sawn tuma hmalakna hi tun hnai mai a ni lo a, kum eng emaw zat aṭanga hmalak a ni zawk a; a tihpuitlin ngei pawh mipuiin kan beisei a ni.
AMC Mayor-in a sawi dan chuan, a thlang lawkah, Tuikual South-ah AMC Multi Complex cheng nuai 1,059 sênga an sakah sawn luh tum an ni. He building-ah hian Treasury bazara ṭhute an leng vek dawn a, kum khat an ṭhut man pawh an awltir (free) dawn nghe nghe a ni.
Hetianga hmun ṭha leh nuam AMC-in a siam a, a hmaa an thu dah nen pawha inzawm tlat a nih avangin AMC thu chu ṭha taka awih mai tur a ni a. An duh loh luih chuan khauh zawka he lai Treasury Square bazaar hmun hi humhalh a ṭhain a âwm viau ang. AMC hmalakna hi mipui pawhin kan thlâwp a rinawm.
Rorelna sang Assembly House kianga hetiang bazar ṭawp tak a awm reng hi khawpui enkawltute tan chuan mit a khamna a rei tawhin a rinawm. He kawngah kalte tan lah a tenawm a, a hrehawm em em bawk. Aizawl Smart City buatsaih lai nen a inrem mawlh lo.
Chuvangin, tuna chhiat tawh denchhen pawh ni lo hian AMC hian a sawn ngei tur a ni. Mi tlemtê eizawnna aia mipui harsatna hi AMC hian a hre reng turah ngai ila. An duh loa an lo innawr deuh a nih pawhin, mipuiin sorkar leh AMC hi kan thlawp tlat a ni tih an hriat a ṭha ang.
Khawpui laili lutuka hetiang hmun rei tak a lo awm tawh hi chinfel vat a ṭul a; han chingfel teh se. AMC hmalakna kan thlâwp e.
- Lal Rinmawia