Mahni thawh chhuah ring ila

Mizoram pawn aṭanga lo lutte hian hnathawh kawr an rawn ha sa lo va, hnathawhna hmanrua an rawn keng lut lo. A ṭhente chuan a ṭulna apiangah mahni ei tur thawh chhhuah ve an tum laiin, a tam zawk chuan a awm sa ringa rawn awm tumte an ni hlawm. Chhan hrang hrang vanga lo lutte hian mahni thawh chhuah ringa an intodeh ṭul hle.

Kan ram khawpuiahte chuan mi thatchhia leh mi taima kan inkal pêl suau suau va, a tam zawk hi chu mi thatchhia, thawh tur pawh zawng lem lo, mi thawh chhuah sa ringa awm an ni. Hengte avang hian kan ram chu intodelh lovah min thlen a ni. Eitu tam si, thawk chhuaktu tlem si, thawh chhuah tlem si awmna kan ram hi a ni mek a nih hi. Mahni thawh chhuah ringtu aiin mi dangte thawh chhuah ringtu kan tam zawk chuan kan ram a intodelh thei dawn lo.

Kan ramah hian chhungkaw khawsak harsa tak tak tam tak an awm a, chung mite chuan mahni kea an dinchhuah ve theih nan intodelh tura bul ṭan ṭhat an duh a; mahse, hmalak ngaihna an hre lo; an khawngaihthlakin an ngaituahawm em em a ni. Heng mite hian anmahni thawh chhuah ngei chu an tan hnianghnar taka an rin ve theih nan sawrkarin bul ṭanna dik hmangin khai chhuak thei se a va ṭha dawn em?

Bawhchhiatna vanga LALPA hremna chu pumpelh tum mai bik lovin, mi hausate pawhin sum an ngah avanga bawp khawkherh chunga mi dangte thawh chhuah sa ring mai bik lovin, mi dangte tan an tha leh tuite chu bianga thlan tui luang khawpin hmangin thawk chhuak ve se la, a va han ropui dawn ve le! Chutih hunah chuan thawkrimte thinlung nge, mi hausa awm âwl thinlung LALPA-in a hnaih duh zawk i hre chhuak ang.

Zo khuaah chuan chhunah mi hmuh tur an awm tlem hle ṭhin. Chhungkaw tinte chhuna mahni chhungkaw puala intodelh an tum a, ram lamah kut hna thawkin an thangbo vek ṭhin. Kan ram khawpuiah chuan chhunah mahni hnathawhna hmuna awm lo kan inkal pêl suau suau mai a nih hi. Mi taimate thawh chhuah sa ram pawn leh zokhua lam aṭangin silh leh fen bakah, ei turte a lo lut ruih ruih a; chungte chu thawh chhuah lei ve tur nei lote’n an zuar a, thawh chhuah nei ve lo bawk sum ngah site’n an lei ṭhin.

Kan ramah hian mi taima sum ngah lote chu mi harsa, dinhmun chhe zawka awmah kan ngai tlat a, thawk chhuak ve lo sum ngah em emte chu mi awm thei, hausa, dinhmun sanga awmah kan ngai thung. Chutiang ngaihdan avang chuan thawkrim lova sum hai luh dan awlsam kan zawng ta zawk a, chu chuan kan ram mite nunphung a tichhe zo va, kan ram pawh intodelh lovah a thlen ta a nih hi.

Engpawhnise, kan awm âwl chhung te, kan hahchawlh chhungte ai hian kan hna thawh chhung a lo rei zawk theihna turin mi tin hian ṭan ila thar ang u.

- H. Neihchungnunga, Durtlang North