AR ram chhuahsan – Setana paradise chang lul suh se
Assam Rifles sawnna tur Zokhawsang ram assessment siamtu hmasa ber pawlah khan ka tel ve a. Chung hun lai chuan a ram a khawro-in tui a vâng em em a; a lum bawk si, hrehawm kan ti thei hle. Sunhlu a tam hle a, sunhlu leh bawngpuparte kha Zema daia 'Atuitling bar' aṭang khan kan ti-serthlum vel ta mai mai khan ka hria. Mahse, compensation pawisa a lo chhuah tak tak kha chuan Kolasib-ah ka awm leh daih tawh. Compensation claim-tu leh a siamtu (assessment titu) zingah hlawkpui fe fe, mahse, chhiatpuitu eng emaw zat an awm. Kei chuan cheng khat pawh ka hlawkpui lo. Kolsib lamah Serlui-B Hydel Project khuah turin a chîm chhiat tur Builum khaw ho sawn chhuahna tur, Kolasib Rengtekawn Bâwktlang kan buaipui leh daih.
Aizawl aṭanga AR sawn chhuah hi kei chuan a tir tê aṭangin ka phûrpui ve lo. Vawiin thleng hian kan tan a ṭha ber ang em, tiin ka la hlauthawng ru reng. A ram hi kan sawp chhe vek ang a, induhâmsiak leh mahni hmasialsiak nan kan hmang ang a, inchirhtheh leh insawichhiat tawn nan, inpuh tawn leh inhnial luih luih nan, intihbuaina hmunpuiah kan la chantir mai ang tih ka hlau a ni. AR awm lai hi kan la ngai vawng vawng mai thei.
Chumi hma, tute mahin a ram chhunga kut an thlak hma hauh pawh hian mi awm ṭha duh lote’n paradise-ah an hmang nghal dawnin ka ring tlat. Sawrkar hian a veng sêng lo ang. NGO tan lah chhun zan zawma kil tin ven sên a ni dawn lo. A ualau lai chu a ziawm deuh mahna, chhuahchhawng, Bethlehem leh Tuithiang lam pangpêr thla zawng zawngte hi a rem lutuk. Family lane leh building ṭhenkhat a’n ruak ang a, sualna chi tin tan hmun remchang ṭha lutuk kan hawnsak a ni mai ang em? Ka va hlauthawng em. Theihtawpa AR hoin an venga an luahlum chung pawhin hengho hi hmuh tur an awm reng tho a, thihna hial pawh a thleng tawh ṭhin si a. A ram leilung lah, hmân aṭanga vawiin thlenga kher ngat ngattu an awm reng bawk si. Tunah phei chuan nêk nuam an va ti tawh dawn em.
Heng zawng zawng hi sawrkar hian a ngaihtuah lawk em? Khawtlang hruaitute leh NGO lu a va hai nasa dawn em. Police battalion khat tal headquarters-a kan siam loh pawhin, company khat tal chuan tun chawpchilh hian an awm chilha an ven kual chhuah tlaivar reng a ngai ang.
Aizawl ti-Aizawltu, Aizawl tinuamtu, timawitu, tizahawma tichhuanawmtu hi kan ti chhe vek ang a, kan tiṭawp vek ang a, induhamsiakna leh inhmasialsiakna hmunpui, insawichhiatna leh innghirnghona hmunpui, sualna tinreng khurpui, Setana lal ram, khawpui leh nuam tàwlna, Setana paradise a chang mai ang tih ka va hlau em.
Chutiang thlentir tur chuan mi chungnung leh thil ti thei ber berte aṭanga michhe hnuaihnung ber leh ṭawphnawk ber thleng hian kan inpeih em em hmel tawh bawk si.
Engpawhnise, Assam Rifles ram rauhsan tur pual hian kan tih theih ropui ber Pathian hnenah venghim turin i ṭawngṭai leh phawt mai ang u.
- K. Hmingthankaia