Enchim loh aw… Vau Thla

Kan ram rorelna sâng bera kan aiawhte ṭhukhawm hi han en ila, a holam zawnga thlir chuan ropui lo ve tak a ni. Kohhran lama an nihna te, an hawihhâwmna leh ze ṭha zawng zawng dahṭhain, a thiam zawk nih inchuhin an inhnial luih luih a. Keini hmingṭha ila, anni lamin hmingchhiatna leh mualphona khum se tih rilru an pu ta vek em ni tih tur a ni a. Thil ṭha titu nih an inchuh laiin a ṭha lo lam erawh lehlam chan atan an beng per zel a; khawi chin nge âwiha âwih loh tur tih pawh mipui tan chuan hriat thiam a har khawp mai.

Ram rorel tura kan thlante hian social media game an khel ta mah mah em ni tih tur a ni a. An inhnial bup bupna thute lah hi an sawina zâwnah chuan a dik reng mai ṭhin a, mitdel sai khawih kan sawi ang chauh an ni. Ṭhenkhatin 2+2=4 an tih laiin, ṭhenkhatin 1+1+2 = 4 zawk alawm an lo ti a, a hre deuh lahin 1+3=4 zawk a ni an lo ti ve bawk a; thil hi a buaithlak zo ṭhin a ni e. A sawi hmasatuin rawng vâr hi a vâr a ni a, rawng dang a ni lo an tih mek laiin, lehlam pawl lahin a sen hi a vâr a ni lo, a dum phei chu a vâr a ni lo rêng rêng an lo ti ve bawk. Mi thiam leh puitling tak tak nia kan ngaihte’n anmahni lam chan sawi mâmna atana thu an thiam viau laiin, an thu inchuh hi a lo ropui lo ve thei khawp mai a nih hi.

Social media lamah ni se, channel neitute’n en hlawh an nih theih nan an lo bâwl phuan suah suah a; mipui lah anni ho thil siam en hman tawk lekin kan lo hman ve êm êm bawk si. Neutral ṭan lam nei kan sawi ang kha a tam zawk an ni a; thu dik ai chuan a puarpawlêngin min chiah hneh a, ngaihdan siam thiam lo tan phei chuan kan thil hmuh leh hriatte avanga ât chhawihna tham a ni e.

Engpawhnise, politics ngaihven, ram rorelna kalphung hriat duh vânga kan aiawhte rorel inkhawm en peih tak tak kan tam ta a. Kan aiawhte nihphung chu rorelna ina an khawsak phung aṭang hian kan hre chiang khat viau awm e.

Sawhthing leh hmunphiah hralh chungchanga kan inhnial luai luai lai te, rorelna ina kan aiawhte an insîk bup bup laite hian Chakma ho hian lehkha an lo zir char char bik em tih chiang lo mah ila, kan ram thingkung zinga pâr mawi ber pakhat vaubê te erawh an lo vul leh ta chî chiâi mai. Zin veivâk mi tan phei chuan kawngkam khâm bakbahâi tak taka an lo pâr chhing chhengte hi hmuh an nuamin nun an va tihlim tehlul êm! Vaube pâr chauh pawh a mawi tih tawh nâka laia farṭuah pâr nen an han vul dun meuh chuan, vawi khat tal fakna thu chhâk chhuak lova thlir liam mai mai theih pawh a ni lo. Kut zungchalte hi mi dang kawh nan chuan huatthlala viau mah se, heng pangpârte kawh nan erawh duh aiin a tawi mah mah a ni. Khaw lum leh ṭhâl romei zâm karah hian an mawi bik a, fûr khaw thiangah phei chuan mawi zual tak an ni.

Mizoramah chuan ṭhâl lai hi kan hun hrehawm lai tak a nih dan a awm a; khua a lum a, tuihnâ a lo kang a, tui kan harsat êm êm lai a ni a. Kum chhiat kumah phei chuan in kâng, ram kâng sawi tur a tamin, nunna kan chân phah hial châng pawh a tam. Lo neitute tan lah kângvar ni sen sa vawl vawl hnuaia hna thawh chu hah a zual bik hliah hliah mai a. Thingtlang lamah phei chuan chawhmeh vân lai a ni a, a ngai hi kan ring tlut tlut mai a ni. Vitamin tam lua angin lang lo mah se behlawirêp, thangṭung zîk, aidu sentil nen kan tlalam mai mai thei a; a lût a tam na nâ nâ chuan taksa pawhin ṭhatpui tâwk a lo nei ve a ni chêk ang, kan insawisel bik lo ve.

Kan ram sik leh sa thu-ah ṭhâl lai hi kan han sit deuh tak nâ a, he hun tluka hun lunglenthlak hi a awm lo mai thei. Mi lunglêng ṭhin kan hla phuahtute hla han en ila, ‘romei zâm, ṭuahpui leh vâu’ tih hi a tam êm mai. Mizote’n kan kûtpui ber Chapchar Kût pawh hi fûr, favâng, thlasik laia hman chi ni miah lo chuan. Khua a rovin tui a har han ti deuh mah ila, ṭhâl lai na nâ nâ chuan tui lian leh lei min vânga chhiatnate kan tâwk lo va, tunlai ṭawng takin side ‘B’ lam hi a tam ve êm mai.

Ramngâw leh ruahtui tlêm leh tam hian inkungkaihna a nei em tih sawi lo pawh hian Vâu thla erawh lui kalna hun ṭha a ni tih a chiang. Kîltheihrawk a lo hrâm a, savate’n inthlahpun hna an thawk ṭan tak tak a ni tih hriain sairawkherh kan dahṭha a; chutih rualin, lui kal a hun chho a ni tih kan hre ve leh chat bawk a. Khaw lum tlansana kawr tê daia chawhmeh zawn, tumbu khawrh, chakâi khawrh, tui theh kang, kaikuang thil, sangha vuak, chengkawl khawrh te hi water park-a kal aia a nawm lohna a awm chuang miah lo nia.

- R. Lalfakawma, Seling