Kristian-te Pathian biak dan hi

Mizote hi Kristian zaah za niin kan inchhal a, dik pawh a dik ang. Amaherawhchu, kan Pathian biak dan hi a mualpho lam zawngin kan bia a, miin min hria se ti ni awm takin, mi hriat loh hlau ni awm takin ring tawk tawkin kan ṭawngṭai a, kan zai vak vak ṭhin.

Sakhaw dang betu kan hriat ṭhan hnaivai Mosolman te, Hindu te chu keini Kristian ang hi an ni ve lo. Ngawi rengin an Pathian biakah an chiang a, an nghet em em a ni. Ṭawngṭai leh zaiin au ve vak vak lo.

Keini chu tuma pawi sawi lo leh tu tan maha bengchheng leh ninawm loa ngaiin kawtthlerah kan zai vak vak a, ring tawk tawkin kan ṭawngṭai vak vak a, eng teh ual kan ni si lo. Lem kan chang vel mai mai ni pawhin a lang.

Aizawlah ngei pawh hian Hindu tam tak an awm a, Mosolman an tam ta ngiang mai bawk. Keini Kristian angin an inhawr khawm lût lût lo. An sakhaw rinnaah an nghet em em a, ti khawpa Kistian tamna state-ah si hian Kristiana inleh an tum bau lo.

Missionary kan tirh chhuah pawhin ram lak kan tum nasat luat avang emaw ni, state dangah chuan min lo ngaitheilo a, tharum hmangte’n kan rawngbawltute an bei chamchi ta a. A chhan ni bera lang chu, kan rawngbawlna sakhaw dang tana hnawk khawpa ualau taka kan chet vang a ni ber.

Aizawlah hian Hindu bakah Mosolman sakhaw bia an pung zel a, an pung zel dawn pawh niin a lang. Chutih rual chuan, Mosolman ngat phei chu an ri ve teng tung lo. Mahse, an rinna a nghet a, chaw nghei thlaah pawh tih luih ngai loin an zawm ṭha em em a ni. Vawi khat ṭawngṭai rual an nei a, an awm mang lo emaw tih laiin Lammual khatin ṭawngṭaiin an bungbu thei a ni.

Ngawi renga an Pathian ringin an be mai. Keini Kristian te, ringtu ṭha inti em em ho hian mi dang hriat loh hlau ni awm takin Pathian kan au a, kan zai a, mi mut tawh hunah tu mah ngaihsak lêk loin kan ṭawngṭai rual a, mi mu tawh tan phei chuan ninawm duh tak a ni.

Sakhaw zalenna India ramah hian Kristiante chauh hi kan zalen lo tih hriat fo a ṭha. State danga rawngbawltute pawh sakhaw dang betu tan eng nge an hnawksak loh bik ang. Kan Pathian biak dan hi inen let a ngai ta hle a ni; a bikin state pawna rawngbawltu tan ngat phei chuan.

- Lal Rinmawia, Mission Compound, Mission Veng