A LEM LEH A TAK

Ka lehkhabu chhiar pakhat ka han sawi teh ang. Pa pakhat, zu in ngai miah lo hi zan dar sarih velah hian bar (zu zawrhna hmun)-ah zu a lo in a. Chutia ani meuh zu in ta chu tiin an ṭhenawmpa hian a zawtin a zu in chhan chu hriat ngei tumin heti hian an inzawt a, “Ṭhenawmpa engati nge nang meuhin hetia zu i in a, hetia i ruih tak mai le,” a ti a. Ani chuan, “Vawiin chhunah khan bawnghnute sawr ka tum a, a hnute bur ka sawr khat ṭêp tawh tihah chuan bawngpui chuan a ke hnung vei lam hian a rawn pal baw palh a, tichuan a ke chu thingah phuar betin ka han sawr leh a. A khat leh ṭep tihah chuan a ke hnung ding lam chuan a rawn pal baw leh a. A ke hnung dinglam chu hruiin banah ka phuar leh a, ka han sawr leh a, a khat leh ṭep tihah chuan a meiin a rawn vai baw leh ta a. Ka thinrim tawh hle mai a, a mei chu phuar leh tumin hrui ka han zawng a, ka hmuh tak mai lohah chuan ka kawnghrêna phuar tumin ka kekawr aṭangin kawnghren chu ka han paw tchhuak a. Chutia kawnghren ka pawh chhuah lai tak ka nupuiin min lo hmu a, a thinrim a, ka insawifiahna pawh chu a ngaithla duh ta reng reng lo a,” tiin an nupa boruak chhiat chhan chu a sawi a.

He thu hi tak tak a ni nge ni lo tih erawh ka hre hauh lo nâin, tak tak pawh lo ni se la, a âwmang hle mai dawn hi tiin ka ngaihtuah zui a. A nupui ngaihdan tur hi han ngaihtuah ila, bawngpui ke hnung lam pahnih phuar hnua kekawr kawng dul hnuka bawng mei lo vawn reng takah chuan a ngaihtuahna pawh a danglam phah tih a chiang reng a. Chutiang dinhmunah chuan a thinrim pawh chu a demawm hauh loh. Nimahsela, ngun taka ngaihtuah chuan a lan ang ngawt chu a lo ni si lo a, buai lohna turah an nu chu a buaiin thinrim lohna turah a thinrim ta zawk a ni si a. He thawnthu hian ngaihtuahna tam tak min neihtir a, keini tan pawh hian a lo pawimawh dawn mange tihte ngaihtuahnaah a awm bawk a.

Pawn lam lan danin ngaihtuahna a hneh theihzia kan hre hlawmin a rinawm a, a bik takin hmeichhe lam phei chuan an hre lehzual mai thei e. Hmeichhe hoin hmai cheina an lo hman tamzia leh hmel a lo tihdanglam theihzia te hi keini ngaihtuah phak bak a ni hial awm asin. Keini hriat ve kha chu powder leh hnawihsen emaw chauh kha a ni mai a, tunah chuan eye shadow, eye brow, concealed, contour, foundation, blusher leh lipstick chi hrang hrang a lo tam ta hle mai. Heng zawng zawng hian an hmai, khâp tiat lekah chu an han sawngbawl kual vel chu a ni a, hmelṭhat loh ngaihna a awm lo reng reng. Chutianga a lan dan chu kan buaipui tak chiam avang hian alawm kan nun pawhin a lan dan ringawt chu kan buaipui chhunzawm ta zel a, nun tak nei reng ṭhin pawhin ze pawnláng leh ze dik tak kan lo neih phah ta a, a lemin kan nung ta ṭhup ṭhup a nih tak ber hi. Zahthlak hian!

Chhim lam lalnu finna kha Solomona pawhin a khan lo e an ti a. Ṭum khat chu Solomona chuan pangpar a keng a, khuai a thlawh kualtir a. Khuai chu a lem nge a tak a han tih chuan chhim lam lalnu chuan a lem tiin a sawi nghal chat thei a. Chutia a sawi theihna chhan pawh chîk taka a thlirin, khuai chuan pangpar zu chu dâwt a tum miah lo tih a hriat vang a ni a; a fing hle a ni.

Hetiang ang deuh hian tunlai hunah chuan thil reng reng hi a lem nge a tak tih hi fiah hmasak zet a ngai ta zel mai a. Kan ṭawngkam leh nun dan pawh a tak leh a lem a awm tak zel avangin Thelma anga rilru tluang purh tan chuan awm dan thiam har tak tur a ni zo ta. Ṭawngkam ṭhate lah hi kan han ngah hlawm ropui mai si a, a tak tak leh tak tak lo hi rei fe ngaihtuah hmasak zet loh chuan awih ngawt chi a ni ta hauh lo mai.

Zo nun ze mawi – tlawmngaihna kan tih pawh a tak takah chuan ropuiin chhuanawm tak ni mah se la, a phêna thil awm a awm tak zel avangin chawimawi hleihtheih loh a nihna lai hi a lo awm leh ṭhin si. Hmingṭhat duhin miin thil a ti a, hmingṭhat a duh chhan erawh a ropui vak leh si ṭhin lo hi thil buaithlak tak a ni. A hmingṭhat duhna chu eng pawlah emaw hruaitu nih a duh vangte a lo nih leh daih si chuan kan tlawmngaihna hi hmaikáwra hman a lo awlsam phah zo ta hial a. A hmingṭha leh a thangmawi apiangte chu mipui chuan duh thlan awm tak a nih laiin, mipui lam lahin chutiang mi aia in ve zauh zauh theite an han thlan tlin zawk fo chinah phei chuan kan nun dan hi hriatthiam a har a, a mak mang e, tiin kan sawi kan sawi ta mai a nih zel ṭhin hi. Zahawmna pawh hi thawh chhuah tur emaw tih laiin awlsam taka neih tum kan lo la awm zel a. Nihna leh chanvo avanga intihzahawm chawp kan tum ta zawk a, chu lamah chuan khaw hmu lo lêkin kan kal ta vak mai zel ṭhin bawk si a!

Pathian thuin ‘Buh lem leh buh tak chu lo ṭo za rawh se’ a tih angin, thil engkimah hian a lem leh a tak hi a awm ta zel a; a lem chu kan ngaina ta zawk hian a hriat tlat ṭhin bawk si hi a zialo ṭhin ngawt mai. A zialo tih ngawt hian a nihna tak a phawk chhuak zo kher lo ang a, a pawi tak zet a ni tiin sawi ila a dik zawk hial awm e. Hmangaihna lem leh a tak a awm a, duhsakna pawh a lem leh a tak a awm a, sakhuana pawh a lem leh a tak a la awm zel emaw (a awm e tiin ka sawi phal rih lo) tih mai tur a nih hi. Heti reng hian nun hmang ila, eng nge kan thlen ang tih lam phei zawng ka ngaihtuah duh rih lo a, ka suangtuah ngam rih lo. Hetiang kan lo nih zawh tak avang hian alawm Altenford vaukamah pawh khan Thelma pa khan Sir Phillip Bruce Errington-a kha a ngainat mai theih loh ni.

- Mahmuaka Chhakchhuak