Pastor Bankuaia chanchin

January 10, 2025 Vanglaini chanchinbu phek 8-na, Zirtawpni chhuak ‘Thlirna’ Pu Lalhruaitluanga Ralte ziak, ‘Pastor Bankuaia Tlanglam zai’ tih para hnih tlar 7-naah khan kum 1958-ah upat pension-in a chhuak a, hemi kum vek September ni 14-a boral ta angin a ziak a. Hei hi a dik loin ka ring, a kum hi.

A chhan chu, kei hi Hualtu khua ka ni a, 1965 May thlaah nupui ka nei a, Pastor Thansiama a feh bo avangin a hnenah kan inkutsuih a ni. Hemi ṭuma ka ṭhianpa Pu K Zamlova, Tuikhuahtlang, Aizawl pawh a la dam reng a ni.

Pastor Bankuaia thih kum hi ka hrechiang chu a ni bik lo va, mahse, ka hriat ve dan chuan rambuai hnu niin ka hria. Thil nuihzatthlak deuh mai District Council-ah khan CA Revenue (Circle Assistant i/c Revenue) in kan awm a, kan hotu (RO) chu Pu H.Raltawna kha a ni a. Ni khat chu Pu Raltawna hovin chawhnuah Pu Bawlliana, Pastor Bankuaia fapa, a pa thih avanga rál turin Revenue Branch staff ho kan kal phei dal dal a, Khatla Sabinga Lung vel aṭang sawn Kutbuli kan tih mai ṭhin kha kan hmaah hian puan tel ak luah chung hian a kal a, naupangin an chhaih ang deuhin a puanah chuan ka va vawm a. A rawn lehhawi vut a, keini ho kha khatianga chhaih awm hmel kha niin min hmu si lo va, a kal leh mai a. Ka va vawm leh zauh a, a lo hawi rang hle mai ṭhin a. Mahse, keini lo kha mi dang han puh awm a hmu si lo va, keini kha kan inti mitak si a. Pu Raltawna pawhin nui chungin, “Ti ti suh u, in tikhawngaihthlak,” a ti a. “Vawi khat chauh,” ka ti a, lungte ka chhar leh a, ka tin lai tak khan a lo hawi thut a, mi rawn man ta. “Kha, khalaia tlangval kawr ṭial ha kha, kawṭhalovin thi rawh se,” min rawn ti ta nghek mai a, kan nui zo ta hlawm a.

Hemi ni hi a kum pawh ka hre ta mai lo va, 1968 a ni thei ang em? Chhut sual palh chu ni ngeiin a rin theih a. Chuvangin Pastor Bankuaia thih kum dik tak hi chhui chian a ṭulin ka hria a; chiang nial bik chuang si lovin ka rawn sawi ve a nih hi. A thih ni 18th September 1968 a ni thei ang em le. A fapa Pu Bawlliana kan rál ni chuan serṭawk te kan ei a, September nen hian a inmil viau mai.

- Bawiṭhuama, Tuikual C, Aizawl