Ṭah ruai chauh ka hmachhuan e

Mizote hi kan tlem ngaihtuahin hla chi hrang hrang hi kan ngah hle a, A bikin khawhar hla (mitthi ngaih hla)-te phei chu kan nei ṭha hle a ni. Mihring nunphungah hian chhungkaw tinah hian nu hi an pawimawh em em a, chuvangin, nu ber boral ngaih hlate pawh ṭha tak tak kan nei a.

"Hrinhniang nau ang a ṭap,

Lunglam ka vai ruai e,

l tel lo chuan awilai riangte,

Lunglai ka hnem zo lo ,

Lo kir leh rawh, Chunnu lungmawl,

Rihsang mual liam ka la tiam lo e."

titein. Hetih lai hian chhungkaw pa ber boral ngaih hla erawh kan ngah lo hle a, chu'ng ang hla kan mamawh em em chu Pu B. Zoramthara hian, "Ṭah ruai ruai chauh ka hmachhuan e," tih thupuiah hmangin a phuah a, Pi Lalsangzuali Sailo-in Raido-ah he hla hi, "Bawihte, i zuapa chhingkhual kal a rei lua e," tih thupui hmangin thiam tak maiin a sa lar ta a ni. He hla hi a phuah dan leh a phuah chhante kan sawi dawn a ni.

He hla chungchang hi sawi kan duhna chhan chu, tun hnaiah WhatsApp lamah he hla chungchang hi dik lo takin ziah a ni a, Mizo mipuiten a dik zawk kan hriat nan ziah ve ṭhain ka hria a ni. WhatsApp lamah chuan tihian an rawn ziak a. "Bawihte, i zuapa chhingkual kal a rei lua e. He hla lo pian chhuanna hi Khawhai khua Pu Lalrawna Khawhai High Sikul zirtirtu chu hna dang zawngin Aizawlah a kal a, hna chu a hmu ve mai a ni awm e, chu a hna thawk tur chuan phai lamah training-in an tir a, lo haw tih reng reng a awm ta lo, a khuangcher bo ta vang vang mai a, a nupui hrilhhai leh lungleng chuan Pi Lalsangzuali Sailo hnenah a pasal chanchin hrilhin hla min phuah sak teh tiin a ngen a, he hla lungkuai tak mai hi Pi Zualbawihin a rawn phuah chhuak ta a ni. Pu Rawna nupui Pi Siami hi Aizawl Ramhlun vengah chak lo takin a la dam nghe nghe" tiin an rawn ziak a. Chuvangin, tunlaiah hla inchuhte a awm fo va, he hla lo pian dan leh a phuah dan hi sawi chian a ngaiin ka hria a ni.

Pu Lalthianghlima leh Pi Lalpianthari Dinthar veng, Aizawlte hi kum 1965-ah an innei a, Pathian malsawmna dawngin fapa hlir pathum an neih hnuah an fa palina tur an pai laiin kum 1978 August thlaah Pu Lalthianghlima ṭhianpa Pu Laldailova Dinthar veng Aizawl chu motor accident-in Bungtlang khaw daiah a boral hlauh mai a, an accident-na hmun en turin Pu Laldailova chhungte chuan Pu Lalthianghlima chu an sawm a, lehlanga va en turin an kal ta a, an rawn haw lamah Baktawng leh Khumtung inkarah chuan chesualin an accident ve ta hlauh mai a, Pu Lalthianghlima chu a boral ve ta a ni.

Tunlai angin inbiak pawhna la ṭha hek lo, Pu Lalthianghlima nupui Pi Lalpianthari-te nufa chuan an pa chu a boral tih hre mai hek lo, A lo hawn hun tur nghakin zanah chuan an tlaivar ta hial a, an ṭhenawm khawvengte pawhin, "Engtizia nge an va haw har em em ve,?" tiin an lo nghahpui hlawm nual a. Chutia an pa zin haw tur an nghah reng lai chuan zing khawvar hnuah an accident thu chu zulkoin an rawn hril ta chauh a ni. He tah pawh hian Pu Lalthianghlima thih thu chu a chhungte hi an la hrilh chuang lo va, Pu Lalthianghlima ruang hian a nupui fanaute chu a rawn deng zui ta mai a ni.

Heng ang boruak thim leh rit takah hian Pu Lalthianghlima nupui Pi Lalpianthari chuan an hma lam hun hman dan tur a thlir a, a fate lah chu, "Ka ei zo vek dawn" ti rual chauh an la niin amah Pi Lalpianthari lahin nau a la pai zui bawk si a, a ṭap ruai ruai nitin zantin ta mai a, Zanah an han mu turte hi an fa naupang ber chuan, an khumah chuan "Apa mutna tur" tiin a zuah awl zel mai a, mi dang mut a phal tlat ṭhin lo a. A zan mu a ṭhangharhte hian a pa chu kuah tumin a dap a dap a, a pa a dap fuh loh avangin a ṭap ta ṭhin a ni. An nu ber Pi Lalpianthari chuan a fapa ṭap chu thlem ve bawk ṭhin mah sela a ṭahpui lo thei si lo a, a mittuiin lukham huh vekin an ṭap ta fo mai a.

Hetih lai hian an ṭhenawmpa Pu R. Thangchungnunga hi thingtlangah sawrkar hnathawkin a awm a, a lo haw chang hian an faten an lo lawmin, a kekawr pawt thla lek lek hian an lo bawr ṭhin a, hetia an pa an lo lawm vel lai hi Pi Lalpianthari fate chuan mittui parawl par chung hian kut zungṭang seh niap niap chungin an lo en reng ṭhin a ni. He an boruak tawn thim tak mai hi Pi Lalpianthari chuan Pu B. Zoramthara chu hrilh vekin hla phuah sak turin a ngen ta ringawt mai a, Pu B. Zoramthara chuan he hla ṭha leh lungkuai tak mai hi a phuah ta a ni.

Bawihte, in zuapa chhingkual kal a rei lua e,

Ka ngaithiam lo, ti em em zawng, a rei lui e,

Tu vangkhawpui a'n nge lungchimte'n tual a len,

Chung Pathian vangkhuaah em ni?.

Aw, a na e, tuarhar min hnem zo an awm lo,

I hraileng leh chun lungmawl hrilh kan hai lua e,

Mi pate chhingkhual kal an haw,

An hrailengten par ang an lawm,

Hrilh an hai lua e, kan hrai ve hi, tiin.

- Hausanga Hauzel