Hla tih lar Spotify ṭha dawn
Vanglaini March 24, Thawhṭanni chhuakah WhatsApp status-ah Spotify aṭangin music a share theih dawn tih thu Ṭhalai huangah a rawn inziak a, beng a verh zak mai.
Mizoten WhatsApp kan hmang nasa em em a, tun lai ṭhalaite phei chuan SMS hunlai an hre pha tawh lo hial a, Kohhran Ṭhalai over tawh leh over ṭepte erawhin ni khata SMS free 100 hlut zia an hre pha dawn. Chutihrualin tunah erawh MUP member-te thlengin inbiak pawhna ber chu WhatsApp a ni tawh thung.
Kum lama upate pawhin tunlai thiamna a hmang thiam zel a, tuna thiam sate an upa zel dawn bawk. Pitar putar te pawhin an status-ah an tu leh fate thlalak te an tar chhuak a, hun bik neia an tarchhuak nasa zual. Tuna WhatsApp an tih changtlung takah chuan an pianchamphaah pawh 'Happy Birthday' tih te pawh a dah tel theih tawh ang chu.
Inbiak pawhna atan bera WhatsApp kan hman tak avangin a changtlung zel hi hmangtu tan malsawmna a ni a, status update ti ngaihnawm zualtu a ni dawn. Contact ngah deuh status chu mi 1000 chuangten an en ṭhin a, awlsam zawka hla a dah theih takah chuan a thlirtu te mit chauh ni loin beng thlengin a tlei tawh ang.
Thil thar awm ta na na chu, kan bihchiang a, status-ah chuan awlsam takin hla a dah theih. Instagram kalphung nen a inang a, mah se WhatsApp lamin hman hun an official-a hman ṭan hun tur an la tih chian miau loh avangin hla a la kim lo.
Spotify-a hla awm te pawh thlan vek theih a la ni lo a, hei erawh a kim thuai turah ngai ila. Chutia nih chuan Mizo zaithiamten youtube-ah chauh ni lo, Spotify lamah hla an dah tel a pawimawh thei ang.
Hla kan ngaihthlak ngunte apiang an lar a, Krismas vuakvetah pawh sawm an hlawh. Instagram reels hmangin hla lar tawh lote a rawn thar leh a, awlsam zawka WhatsApp hmanga hla a dah theih chuan, Mizo hla hlui lar thar tur pawh a awm ngeiin a rinawm.
Mizo zaithiam leh promoter-ten spotify lamah hla han dah ula, keini zaithiam si lo, hla ngaihthlak nuam ti siin status lamah kan thu/thlalak update mil zelin Mizo hlate status-ah kan lo hmang ang e. Kei tak hi chuan, mahni aia rem hre zawkte status thlir/ngaih thlak a ni, ka châk tawh a ni.
- Lalzaidama