Mizoram tlangvalte an fakawm e
India leh Bangladesh inkhel kha TV aṭangin ka thlir a, uluk takin en mah ila Vanglaini-a mi chhiar zui leh loh chuan a la kim tlat lo. March 27, Ningani chhuak phek hnung lam chu ka lo bih vah a, a ngaihnawm hle mai.
Football lam hre ril lo mah ila, pawn lang taka ka hmuh dan aṭangin Mizoram tlangvalte an fakawm hle. Vaivakawn tlangval Lalengmawia Ralte (Apuia) hi India ram midfielder ṭha ber niin ka hria a, Dinthar tlangval Ayush Chhetri pawh khan inkhelh dan hmang a man hlein ka hre bawk.
Vanglaini lamah Apuia thusawi kan hmu a, India international midfielder chuan, "Hmanni lawkah Maldives chu 3-0 in kan hneh thei a, Bangladesh hi Maldives aiin an ṭha lo zawk. Kan huaisen tawk lo a, qualifier match pawimawh tak a nih piah lamah Hamza boruak velin min ti chi ai niin ka hria," tiin a inziak.
Ni e, India team kha an dawih deuh tlatin ka hria. Mahni muala Bangladesh hneh loh hi thil zahthlak a tling a, kan ram team khan a ṭha zawk leh huaisen zawk khelhin an khel tlat lo. Khatiang karah khan Apuia chuan huaisen takin a khel ka ti tlat a, duh dan tak phei chuan Mumbai City defender Hmingthanmawia Ralte (Valpuia) kha han lut ngei se ka ti hle.
"Keima khelh danah pawh ka lawm chuang lo. Defence lamin midfield-ah ball min pe ngam si lo a, kan tan chuan tihngaihna a vang duh hle," tiin Apuia'n a sawi dah zui a ni a, India defender-te kha dem hle. Tawnhriat ngah ve deuh Sandesh Jhingan te pawh kha a lian em em ringawt a, inhliam vanga inlan lo Lianzuala Chhangte rilru ang tal te pu se, ka ti hle a ni.
Mahni hnampui ṭan a na a, ka tehnaah phei chuan midang aiin mark 2-3 in ka pe tam sa. Hei vang tak hian player dang ai pawhin ka hmu ṭha niin ka hria a, hnam rilru ka put vang a ni.
Tichuan, hnam rilru dah ṭhain thlirna tarmit kan thlak a. Chik zawka kan bih chuan Mizote pawh kan chungnung bik chuang lo a, Jeje Lalpekhlua vanglai tih lo chu India team-a nghet taka hmun chang an awm lo. Tun hnaiah erawh Apuia a rawn lang a, ani hi chu a dam ṭhat a, a khelh duh phawt chuan a tan India team-ah hmun a awm niin a ngaih theih. Mahse, chhuan holam ve taka ngaih theih vanga tel loh ṭum a nei tlat–a ho lo pawh a ni maithei e.
Engpawhchunise, Mizo tlangvalte kan ṭan sauh sauh a ngai. India team-ah tun aia tam Mizo player awm ngei se, tih hi kan ṭawngṭaina a ni. Sorkar lam pawhin tihtur an nei a, Shillong-in international match an thleng thei a, Aizawlin eng tikah nge international match an thlen ve ang aw?
- Lalhunchhunga