Serlui B privatise mai thei
Kan Power Minister F. Rodingliana’n budget session-a Serlui-B HEP chu privatize a ni mai thei tia a sawi kha Vanglaini chanchinbuah ka lo chhiar a. Serlui-B project hi Power Minister ka nih ve lai khan kan buaipui hrep tawh a nih avangin private company kuta kan dah dawn chuan ngaihtuah ngun deuh a ṭha awm mang e tiin ka ngaihtuah a. Serlui-B power project hi 8 MW tura ruahman a ni. Construction ṭan hnu lawk khan kan Economic adviser Pi Borthakuri khan, “Serlui-B Power Project hi a economic dawn lo em mai, drop mai rawh u,” tiin vawi hnih min hrilh a. Keiin, “Ka pi, he project siamna tur hian Center sawkarin sum min pe a, kan han thawk zo phawt ang a, a la hlawk ve phian pawh a ni mai thei asin’’ tiin ka chhang mai ṭhin.
Hemi hnu hian kan Power secretary Dunglena (RIP) leh chief engineer Pu Liansanga ten ka office-ah min rawn hmu a. An ni pahnih pawh hian Serlui-B project chu a economic dawn lo a, drop an duh thu an rawn sawi ve bawk. Chutah chuan kei chuan, “Chutia project chhe lutuk thawh zawm tlak loa in ngai a nih chuan drop tur chuan Cabinet phalna kan lak a ngai a, Cabinet Memorandum han siam u la, Cabinet meeting hmasa berah ngaihtuah turin ka lo thawn ang e,” ka ti a. Anni chuan Cabinet Memorandum chu an buatsaih a, keiin Cabinet Meeting hmasa berah ka pu lut a. Mahse, Cabinet Meeting-a kan han sawi ho chuan Cabinet chuan drop a remti ta lo.
Cabinet meeting bân chuan kan Secretary leh Chief Engineer chu ka ko a, “In Cabinet Memorandum siam a convincing tawk lo nge, Cabinet-in drop a phal lo tlat mai,” tiin ka hrilh a. Anni chuan “Kan drop theih loh chuan a va pawi dawn ve aw, a economic loh dan tur a chiang tawh hle asin maw le,” an ti a. Keiin, chutia economic lo lutuk tur a nih chuan Cabinet memo convincing deuh tur han buatsaih leh u la, Cabinet meeting-a kan ngaihtuah hun chuan nangni pawh kan ko ve ang che u ka ti a.
Cabinet memorandum chu rang takin an rawn buatsaih leh a, keiin Cabinet meeting-ah ka pu lut leh a. Kan Secretary leh Chief Engineer chu a economic loh dan tur chiang taka min hrilh turin kan ko bawk. Anni’n a hlawk loh dan tur chiang deuha an sawi hnu chuan Cabinet meeting chuan drop min phalsak ta. Chuti chuan, Serlui-B Project chu drop a ni ta a ni.
Hemi hnu hian MNF sorkar khan 12 MW (6MW + 6MW) pe thei turin an rawn tharthawh ve leh a. Ka hriat dan chuan nikum khan a khawl pakhat a chhia a, khawl pakhat hmangin an run a, tunlai hian 3 MW vel a tichhuak thei emaw, ka hre lo.
Keini hun lai khan Ministry of New and Renewable Energy (MNRE) khuan small project atan 3 MW thleng subsidy a pe thei a. Kan small project ho – Kau Tlabung, Maicham-II, Tuipang lui leh Teirei project-te kha 3 MW pe lo vekin kan siam. Tunah 25 MW thlengin MNRE hian subsidy a pe thei ta a; chuvangin, a subsidy ûm hian kan project-te pawh kan tilian ta a ni mai thei. Mahse, power kan pek chhuah theih tam si loh chuan eng nge a hlâwkna? Uneconomic tak project kan khawl khawm a ni mai lo maw?
Serlui-B project hi privatize ni ta se, 24 MW (12MW + 12 MW)-a tihlen an tum ni awm tak a ni. Mahse, megawatt tam tak chu a pek chhuah hmel loh a ni. Chutah chuan a hlâwkna têl thei awm chhun chu private company, a enkawltu kha an ni mai ang.
- C.L. Ruala