Arbâwm hâl ang

Tunlai khawvel ram zau zawk thlir lovin, mahni ram, India ramah hian kan buaipui em em reng chu, educated unemployment, corruption, healthcare, women safety, tribe conflict, religious conflict, adt. a ni a. Hengte avang hian buaina chi hrang hrang sorkar hian a hmu âwl lo a ni. A tawi zawngin sawi ta ila, vaiho hi an buaipui kawngah chuan an bei nasa hle a; Mandel Commission hun lai pawhin an intihlum hmiah a nih kha. Thil thleng mek, ram leh hnam tana him lo ‘burning issue’ hi hnam dang chuan an chiang a, an bei hram hram ṭhin.

Vantlang inkawmna a ṭha tawh a, chhim tawpa thil thleng pawh hmar tawpa miin a lo zawm ve nghal a. Khawtlang kila thleng pawh khawchhak pain a thlen rual rualin a lo insawhpui ve thei ta. Heng thil thleng hi ûm zuitu azirin mipuiin kan tuipui a, duh zawng kan vawrh hluai a, an lar mai a. Mahse, chuti teh lua chuan an lar rei lo lo.

Kan ramah thihna lungkuai deuh te, mualphothlak deuhte kan hre zung zung a. Mimal vanduaina pawh kan ûm zui nasa a, mi chêt chhiatna lah kan hre hneh. Tunlaiin kan sawi deuh luih chu–mi hausa damdawi chhemi sumdawnna atana lo hmang hi a ni. Mipuiin kan hriat meuh chuan kan ṭhalai za têlin an lo ngai hman tawh. Chhungkaw tam tak rûm vawng vawnga min siamtu hi kan hua a ni. Kan thin a rim hle a, mahse, kan thinrimna hian eng chen nge a daih ang. Kan rîkpui chûl hi kâr lovah kan kalsan leh mai dawn. Tute’n emaw sabzek dang an rawn ṭheh ang a, kan kawi leh dual mai lo maw?

Keini zawng ‘Arbâwm hâl ang’ chauh kan ni. Thil ṭha lo, ram leh hnam tana him lo, chhungkua, khawtlang ram thlenga min tichhetu pawh ni se, kan ri hluai a, tu’n kan vei zui lo; kar a vei a, kan tuipui chu a dang leh daih ṭhin.

Tunah pawh hei, Aizawl khawpui lailia mi hausa chu ruihhlo zawrh avangin man a ni a, social media-ah chuan kan pâwr hle. A thinrimthlak tak zet a ni. Mahse, rei lo teah bail-in emaw dan hnuaiah an rawn chhuak leh mai dawn. Court ní-ah tu nge pung khawm peih ang? Tu mahin kan peih lo vang.

Hetiang mai mai hi kan ni. Ri hluai ila, awp leh rup ila kan inhmeh ber. Arbâwm hâl pawh a alh hluai a, rei lo têah a vâp awp rawp ang kan ni e.

- Rosangzela, Vh