Assembly session ka chhim ve
Han sawi kûr vak ngaihna pawh a awm chuang lo chungin, ni 12 March, 2025-a Assembly session kha kan department-in kan han chhim ve a, kei tak phei chuan tel veah riak ka inngai! Kan tam tham deuh avangin chawhma leh chawhnu kalah kan inṭhen a, chawhma lam aiin chawhnu lam chu bengvarthlak zawka ka rin avangin chawhnu lama kal thlang zawk ka ni.
Kan vanduai nge kan vannei zawk ni, kan kal ni tak kha Congress ṭhalaiin Pu C. Ngunlianchunga thlavang hauhva Assembly House kawta pun khawm an tum ni tak kha a lo ni a. Khatia police tiang kengte’n ‘barrier’ hmanga Congress ṭhalaite lo dan beh tuma an han innawr dat dat kha a lehlam zâwng taka thlir chuan a hmuhnawm letling phian a! Mizoramah pawh party politics lo lenzia a takin kan hmuh phah a, experience-ah kan ngai hmiah mai . Kan ṭhian ṭhenkhatte phei chu an kaltlang lawk thei lo nghe nghe a ni âwm e.
Assembly compound kan han lut a, ka rin aiin a lo pui lo! State khat rorelna in sang ber kawtlai atan chuan a mâwlmang teh tawp lutuk a, department pakhat compound vel ni âwm a ni. Dar 1:45 pm-ah building chhung kan lut a, security erawh a ṭha ang reng phian a. “Mi an pâwn lam lan dana teh ngawt tur a ni lo” tih ang deuh khan, pawn lam ka hmuh tirha ka beisei a phak loh rilruk teh reng nen, a chhung kan han lut chiah chu a lo puiin a lo zahawm rem rem hle mai. Han ngaihmawh tur leh mit tikham thei thil a awm hran miah lo va, thil reng reng kha a nih dan tur ang takin a hmun takah a awm thluam ni berin ka hria. Boruak kha a reh diak a, a ni khup mai. Tichuan, a chhimtuteho ṭhutna tur visitors gallery-ah kan ṭhu a, dar 2 pm-ah chiah ṭan a ni a. Mizo zia kan ti dawn nge, tlai tâwk pawh an awm ve tho nia! Minute 10 vela tlai pawh an awm. A kal tlai tlai khan an sawi duhthawh emaw tih mai tur a ni lehnghal!
Hemi ni hian Pu K. Sapdanga leh Pu P.C. Vanlalruata te ‘demand for grant’ ngaihtuahho a ni a. Kan kal achinah Pu Lalrinsanga Ralte, Pu T. Lalhlimpuia, Pu Ramthanmawia, Lt.Col. Clement Lalhmingthanga, Pu K. Hrahmo, Pu V. Malsawmtluanga, Pi Prova Chakma, Pu Robert Romawia, Pu H. Lalzirliana, Pu Lalchhuanthanga, Pu Lalrintluanga, Pu V.L. Zaithanzama, Pu K. Laldawngliana, Pu W. Chhuanawma, Dr. Lorrain Lalpekliana, Dr. K. Beichhua, Pu Lalmuanpuia Punte, Nl. Baryl vanneihsangi, Pu TBC Lalvenchhunga, Pu Lalchhandama Ralte te an ding.
He demand for grants huam chhunga an bial mipuite mamawh chi hrang hrang–Prison thawm ṭhat leh jailer-te hlawh chungchang, police lak chungchang, police outpost leh station-te tihchangtlun, disaster management, kuhva, hmunphiah, sawhthing, LMC huam chhung tihchangtlun, agriculture, irrigation, link road siamṭhat, etc.-ahte an duhkhawp lohna leh ngenna an thlen a. An thusawi khar nan demand for grants an pawm thu an sawi liam liam a. An ding kim ta maw tihah demand pu luttu Pu K. Sapdanga leh Pu P.C. Vanlalruata te chu an demand sawifiah tur leh sawi zau tura sawm an ni leh a; an sawi zawhah vote lak niin, ‘remti’ ti tlang vekin lungrual taka pass-in an ṭîn ta a ni.
Ho ang reng si, ka lo chhinchhiah ve tlat si chu, hun vawn (time management) chungchang a ni. House member-te’n ṭhahnem an ngai tlangin an tui em em a. A ding turte tan sawi zauna hun minute 10 lungrual takin an pawm niin ka hria a, a tam zawk chuan minute 2 velin an bawhpelh tlangpui a, minute 5 chuanga bawhpelh pawh an awm nghe nghe.
Tin, Speaker charge inhlan lai kan hmu tel bawk a. Panel of Chairperson member Pu Jeje Lalpekhlua’n Speaker Pu Lalbiakzama a thlak zuai a, rei vak lo hnuah an inthlak leh tho nachungin, a chhinchhiah tlak hranpa ve hrim hrimin ka hria. A dang lehah chuan, current a awm lo ve zuai kha! Rei lo te mah ni se, Assembly session laia current awm lo, a awmna state nih ve kha a dangdai hranpa ve hrim hrim e!
Kan MLA-te kha ti taka House zahawm tak maia an vawng thei kha an fakawm ka ti thlawt. An thusawi mi dangin an nin loh nan ti ni awm fahrana fiamthu han zep zuai a, an han nui dar dar maite kha a hmuhnawm a. A changin mipuite tan tiin thinrim hmai senin han inchaltauh ṭhin mah se, mimal inhuatah an la duh lo va, a hunah an nuihho leh dar dar theihna lai hi an entawn tlak hlein ka hria.
A tir lamah House pawn lam holam vezia kan sawi a nih kha. Tun hnai session-ah CM leh House Leader ni bawk Pu Lalduhoma ngei pawhin pawn lam aṭang chuan Assembly House pawh a an loh thu leh chei ṭhat ni vat thei se a tih thu a sawiin ka hria a; hemi ka hriat vanga rawn sawi uar lui ka ni deuh bawk.
A tawp khar nan he ‘Demand for Grants’ hi a kimchangin han tarlang ve law law ila:
Pu K. Sapdanga Demand for Grants (state budget aṭangin–9.28%)
Demand no. 13: Personnel & Administrative Reforms – Rs 4,35,05,000
Demand no. 16: Home – Rs 8,60,76,50,000
Demand no. 30: Disaster Management & Rehabilitation – Rs 78,37,31,000
Demand no. 46: Urban Development & Poverty Alleviation – Rs 3,30,25,94,000
TOTAL – Rs 12,73,74,80,000
Pu P.C Vanlaruata Demand for Grants (state budget aṭangin 2.18%)
Demand no. 31: Agriculture & Farmer’s Welfare – Rs 1,91,10,70,000
Demand no. 37: Cooperation – Rs 17,77,24,000
Demand no. 47: Irrigation & Water Resources – Rs 91,26,70,000
TOTAL – Rs 3,21,52,93,000
Source: Legislative Assembly, Mizoram https://www.mizoramassembly.in List of Business
- Zonunkima, 6th Semester, Department of Political Science
Government Aizawl West College