Inter Branch YMA Football Tournament ka duh dan takin kalpui a ni dawn ta
MFA leh Central YMA chuan Inter Branch YMA Football Tournament an buatsaih leh dawn hnai a, khua leh veng tam takah YMA branch-te leh football player-te an inbuatsaih ṭanin a rinawm. Tun ṭuma YMA branch-te tan football tournament buatsaih dan tur kalphung hi kan duh dan ang tak a ni dawn ta niin a lang a, a lawmawm hle mai.
Inter village/inter branch YMA tournament vawi tam tak a awm tawh. Hun hmasa lam, kan naupan ve deuh lai chuan khua leh veng mi dik takte chauh an khel ṭhin a, football thiam khua/veng dik tak kan hre ṭhin.
Mahse, hun eng emaw ti aṭang khan champion duh lutukna avangin khua leh veng ṭhenkhat chuan mahni khua/veng mi ni miahte khelhtir an ching a, a bikin Aizawla veng ṭhenkhatin an ching zual. Veng mi ni lo player ṭha lak ching zualte chu local football tuipuitute chuan in hriat kha. Hei hian Aizawl pawn lam pawh a kâng kai zel a, thingtlang khaw ṭhenkhat pawhin an ching chho tawh.
Hengte avang hian Aizawl bikah chuan football thiam veng dik tak hriat theih a ni tawh lo a, tun hmaa football thiam veng kan tih ṭhinte kha tunah chuan an ni thei meuh tawh lo. Football thiam veng aiin, football player ṭha la khawm thei veng an langsar zawk tawh tlat!
Hman deuh aṭanga ka duhthusam ṭhin chu–football thiam khua/veng dik tak hriat leh theih hi a ni. Chutiang tur chuan khua/veng mi dik tak chauh khelh phal a ngai. Tun ṭuma Inter Branch YMA football-ah hian player-te chu YMA member an nihna branch-ah chauh khelh phal a ni dawn a, enfiahna atan voter ID hman a ni dawn. Vote la nei lote chu Aadhaar card hman a ni dawn thung.
Player-te khua/veng dik tak endikna atana voter ID leh Aadhaar card hman tur hi khauh taka kengkawh turin intihsiak buatsaihtute lamin ṭan la se la; thil dik lo ti emaw, document lem leh dik lo hmang player leh team-te chu hrem hmak hmak se la a ṭha hle ang.
YMA branch hrang hrangte leh player-te pawhin dik takin thil ti se, an khua leh veng mi dik tak ngei chauh khelhtir teh se. Dik taka thil tih hi 'Kristian nun dan ṭha ngaisangtu' YMA nihna nen a inhmeh a, dik lo taka thil tih chu YMA nihna nen a inhmeh lo. Player-te pawhin dik takin thil an ti tur a ni a, 'dâwt' hmangin YMA football hi an khel tur a ni lo.
Tournament hming hi tun hma aṭang tawhin 'Inter Branch YMA' tih a ni ziah a, YMA branch-te telna tur leh an inelna tur a ni. Mahse, Aizawl pawn lama khaw ṭhenkhat chu branch ang ni lovin, Joint YMA angin an tel tlat ṭhin. Hetiang hi tun ṭumah chuan a theih dawn tawh lo a, YMA branch chauh tel theih a ni dawn ta niin an sawi a; hei pawh hi ka duhthusam a ni. 'inter branch' tih ni na nâ nâ, branch eng emaw zat intel khawma tel bik kha chu a 'fair' lo tlat.
Dik taka thil an ti tlang a nih chuan football thiam khua/veng dik tak kan hre leh thei dawn ta niin a lang a; a phûrawm tak zet a ni.
- Zothana Khiangte, Local football lover